Manoj Tiwari: ਮਨੋਜ ਤਿਵਾਰੀ ਨੇ ਰਿਟਾਇਰਮੈਂਟ 'ਤੇ ਲਿਆ ਯੂ-ਟਰਨ, ਜਾਣੋ ਕਿਉਂ ਬਦਲਿਆ ਫੈਸਲਾ

ਇੰਡੀਆ ਟੂਡੇ ਦੀ ਇਕ ਰਿਪੋਰਟ ਮੁਤਾਬਕ ਮਨੋਜ ਤਿਵਾਰੀ ਨੇ ਰਿਟਾਇਰਮੈਂਟ 'ਤੇ ਯੂ-ਟਰਨ ਲੈ ਲਿਆ ਹੈ। ਹਾਲਾਂਕਿ ਉਨ੍ਹਾਂ ਨੇ ਇਸ ਦਾ ਅਧਿਕਾਰਤ ਐਲਾਨ ਨਹੀਂ ਕੀਤਾ ਹੈ। ਰਿਪੋਰਟ ਮੁਤਾਬਕ ਅੱਜ ਉਹ ਪ੍ਰੈੱਸ ਕਾਨਫਰੰਸ ਰਾਹੀਂ ਇਸ ਦਾ ਰਸਮੀ ਐਲਾਨ ਕਰਨਗੇ।

ਦੱਸ ਦੇਈਏ ਕਿ ਮਨੋਜ ਤਿਵਾਰੀ ਨੇ 3 ਅਗਸਤ ਨੂੰ ਕ੍ਰਿਕਟ ਨੂੰ ਅਲਵਿਦਾ ਕਹਿ ਦਿੱਤਾ ਸੀ। ਪਰ ਹੁਣ ਸੂਤਰ ਦੱਸ ਰਹੇ ਹਨ ਕਿ ਉਹ ਇੱਕ ਵਾਰ ਫਿਰ ਕ੍ਰਿਕਟ ਦੇ ਮੈਦਾਨ ਵਿੱਚ ਵਾਪਸੀ ਕਰਨਗੇ। ਮੰਗਲਵਾਰ, 8 ਅਗਸਤ ਨੂੰ ਮਨੋਜ ਤਿਵਾੜੀ ਇੱਕ ਪ੍ਰੈਸ ਕਾਨਫਰੰਸ ਕਰ ਆਪਣੀ ਰਿਟਾਇਰਮੈਂਟ ਵਾਪਸ ਲੈਣ ਦਾ ਐਲਾਨ ਕਰਨਗੇ।

ਦੱਸਿਆ ਜਾ ਰਿਹਾ ਹੈ ਕਿ ਮਨੋਜ ਤਿਵਾਰੀ ਨੇ ਬੰਗਾਲ ਕ੍ਰਿਕਟ ਸੰਘ ਦੇ ਪ੍ਰਧਾਨ ਸਨੇਹਸ਼ੀਸ਼ ਗਾਂਗੁਲੀ ਨਾਲ ਗੱਲ ਕਰਕੇ ਸੰਨਿਆਸ ਲੈਣ ਦਾ ਫੈਸਲਾ ਲਿਆ ਹੈ। ਦਰਅਸਲ, ਮਨੋਜ ਦੇ ਸੰਨਿਆਸ ਤੋਂ ਬਾਅਦ ਬੰਗਾਲ ਕ੍ਰਿਕਟ ਦਾ ਮਿਡਲ ਆਰਡਰ ਕਾਫੀ ਕਮਜ਼ੋਰ ਹੁੰਦਾ ਜਾ ਰਿਹਾ ਸੀ। ਅਜਿਹੇ 'ਚ ਬੰਗਾਲ ਕ੍ਰਿਕਟ ਸੰਘ ਦੇ ਪ੍ਰਧਾਨ ਨੇ ਉਸ ਨੂੰ ਸੰਨਿਆਸ ਵਾਪਸ ਲੈਣ ਲਈ ਕਿਹਾ ਹੈ।

ਜ਼ਿਕਰਯੋਗ ਹੈ ਕਿ ਮਨੋਜ ਨੇ ਭਾਰਤ ਲਈ 12 ਵਨਡੇ ਮੈਚ ਖੇਡੇ। ਇਸ ਦੌਰਾਨ 287 ਦੌੜਾਂ ਬਣਾਈਆਂ। ਉਨ੍ਹਾਂ ਨੇ ਇੱਕ ਸੈਂਕੜਾ ਅਤੇ ਇੱਕ ਅਰਧ ਸੈਂਕੜਾ ਲਗਾਇਆ। ਉਸ ਨੇ 3 ਟੀ-20 ਅੰਤਰਰਾਸ਼ਟਰੀ ਮੈਚ ਵੀ ਖੇਡੇ ਹਨ।

ਉਸ ਨੇ 141 ਪਹਿਲੀ ਸ਼੍ਰੇਣੀ ਮੈਚਾਂ ਵਿੱਚ 9908 ਦੌੜਾਂ ਬਣਾਈਆਂ ਹਨ। ਉਨ੍ਹਾਂ ਨੇ ਇਸ ਫਾਰਮੈਟ 'ਚ ਤੀਹਰਾ ਸੈਂਕੜਾ ਵੀ ਲਗਾਇਆ ਹੈ। ਉਸਦਾ ਸਰਵੋਤਮ ਸਕੋਰ ਅਜੇਤੂ 303 ਰਿਹਾ ਹੈ। ਮਨੋਜ ਨੇ ਇਸ ਫਾਰਮੈਟ 'ਚ 29 ਸੈਂਕੜੇ ਅਤੇ 45 ਅਰਧ ਸੈਂਕੜੇ ਲਗਾਏ ਹਨ।

ਉਨ੍ਹਾਂ ਨੇ ਲਿਸਟ ਏ ਦੇ 169 ਮੈਚਾਂ 'ਚ 5581 ਦੌੜਾਂ ਬਣਾਈਆਂ ਹਨ। ਇਸ 'ਚ 6 ਸੈਂਕੜੇ ਅਤੇ 40 ਅਰਧ ਸੈਂਕੜੇ ਲਗਾਏ ਹਨ।

ਮਨੋਜ ਨੇ ਇੰਡੀਅਨ ਪ੍ਰੀਮੀਅਰ ਲੀਗ 'ਚ ਵੀ ਚੰਗਾ ਪ੍ਰਦਰਸ਼ਨ ਕੀਤਾ ਹੈ। ਉਸ ਨੇ 98 ਆਈਪੀਐਲ ਮੈਚਾਂ ਵਿੱਚ 1695 ਦੌੜਾਂ ਬਣਾਈਆਂ ਹਨ। ਮਨੋਜ ਨੇ ਭਾਰਤ ਲਈ ਆਖਰੀ ਵਨਡੇ ਜ਼ਿੰਬਾਬਵੇ ਦੇ ਖਿਲਾਫ ਜੁਲਾਈ 2015 ਵਿੱਚ ਖੇਡਿਆ ਸੀ। ਅਤੇ ਆਖਰੀ ਟੀ-20 ਮੈਚ ਸਤੰਬਰ 2012 'ਚ ਨਿਊਜ਼ੀਲੈਂਡ ਖਿਲਾਫ ਖੇਡਿਆ ਸੀ।