Team India Head Coach: ਬੀਸੀਸੀਆਈ ਨੇ ਸਾਬਕਾ ਕ੍ਰਿਕਟਰ ਗੌਤਮ ਗੰਭੀਰ ਨੂੰ ਭਾਰਤੀ ਕ੍ਰਿਕਟ ਟੀਮ ਦਾ ਨਵਾਂ ਮੁੱਖ ਕੋਚ ਨਿਯੁਕਤ ਕੀਤਾ ਹੈ। ਰਾਹੁਲ ਦ੍ਰਾਵਿੜ ਟੀ-20 ਵਿਸ਼ਵ ਕੱਪ ਜਿੱਤਣ ਤੋਂ ਬਾਅਦ ਵਿਦਾਈ ਲੈ ਲਈ ਹੈ। ਜਿਸ ਤੋਂ ਬਾਅਦ ਮੰਗਲਵਾਰ ਯਾਨੀਕਿ 09 ਜੁਲਾਈ ਨੂੰ ਮੁੱਖ ਕੋਚ ਦੀ ਕਮਾਨ ਗੌਤਮ ਗੰਭੀਰ ਨੂੰ ਸੌਂਪ ਦਿੱਤੀ ਗਈ। ਇਸ ਨੂੰ ਲੈ ਕੇ ਸੋਸ਼ਲ ਮੀਡੀਆ 'ਤੇ ਕਈ ਪ੍ਰਤੀਕਿਰਿਆਵਾਂ ਦੇਖਣ ਨੂੰ ਮਿਲ ਰਹੀਆਂ ਹਨ। ਯੂਜ਼ਰਸ ਗੌਤਮ ਗੰਭੀਰ ਦੀ ਤਾਰੀਫ ਕਰ ਰਹੇ ਹਨ ਅਤੇ ਕਹਿ ਰਹੇ ਹਨ ਕਿ ਉਹ ਉਹੀ ਵਿਅਕਤੀ ਹੈ ਜਿਸ ਨੇ ਵਿਰਾਟ ਕੋਹਲੀ ਨੂੰ ਆਪਣਾ ਮੈਨ ਆਫ ਦ ਮੈਚ ਐਵਾਰਡ ਦਿੱਤਾ ਸੀ।
ਇੱਕ ਖਿਡਾਰੀ ਦੇ ਤੌਰ 'ਤੇ ਗੌਤਮ ਗੰਭੀਰ ਨੂੰ ਵਿਸ਼ਵ ਕੱਪ ਜਿੱਤਣ ਲਈ ਜਾਣਿਆ ਜਾਂਦਾ ਹੈ। ਚਾਹੇ ਉਹ 2007 ਦਾ ਟੀ-20 ਵਿਸ਼ਵ ਕੱਪ ਹੋਵੇ ਜਾਂ 2011 ਦਾ ਵਨਡੇ ਵਿਸ਼ਵ ਕੱਪ। ਗੌਤਮ ਨੇ ਇਨ੍ਹਾਂ ਦੋਵਾਂ ਵਿਸ਼ਵ ਕੱਪ ਫਾਈਨਲਜ਼ ਵਿੱਚ ਮੈਚ ਜੇਤੂ ਪਾਰੀਆਂ ਖੇਡੀਆਂ ਸਨ। ਹੁਣ ਜਦੋਂ ਗੌਤਮ ਗੰਭੀਰ ਟੀਮ ਇੰਡੀਆ ਦੇ ਕੋਚ ਬਣ ਗਏ ਹਨ ਤਾਂ ਵਿਰਾਟ ਕੋਹਲੀ ਉਨ੍ਹਾਂ ਤੋਂ ਟਰਿੱਕ ਸਿੱਖਦੇ ਨਜ਼ਰ ਆਉਣਗੇ। 2011 ਵਿਸ਼ਵ ਕੱਪ ਦੌਰਾਨ, ਵਿਰਾਟ ਕੋਹਲੀ ਅਤੇ ਗੌਤਮ ਗੰਭੀਰ ਦੋਵੇਂ ਟੀਮ ਇੰਡੀਆ ਦਾ ਹਿੱਸਾ ਸਨ ਅਤੇ ਇਕੱਠੇ ਖੇਡੇ ਸਨ।
ਸੋਸ਼ਲ ਮੀਡੀਆ 'ਤੇ ਕੀ ਪ੍ਰਤੀਕਰਮ ਹੈ
ਟੀਮ ਇੰਡੀਆ ਦਾ ਕੋਚ ਬਣਨ ਤੋਂ ਬਾਅਦ ਗੌਤਮ ਗੰਭੀਰ ਨੂੰ ਲਗਾਤਾਰ ਵਧਾਈਆਂ ਮਿਲ ਰਹੀਆਂ ਹਨ। ਵੀਡੀਓ ਸ਼ੇਅਰ ਕਰਦੇ ਹੋਏ ਇਕ ਯੂਜ਼ਰ ਨੇ ਲਿਖਿਆ, ''ਮੈਨੂੰ ਅਜੇ ਵੀ ਯਾਦ ਹੈ ਕਿ 2009 'ਚ ਜਦੋਂ ਵਿਰਾਟ ਕੋਹਲੀ ਨੇ ਆਪਣਾ ਪਹਿਲਾ ਵਨਡੇ ਸੈਂਕੜਾ ਲਗਾਇਆ ਸੀ ਤਾਂ ਗੌਤਮ ਗੰਭੀਰ ਨੇ ਵਿਰਾਟ ਕੋਹਲੀ ਨੂੰ ਮੈਨ ਆਫ ਦ ਮੈਚ ਦਾ ਐਵਾਰਡ ਦਿੱਤਾ ਸੀ। ਮੈਨੂੰ ਉਮੀਦ ਹੈ ਕਿ ਇਹ ਰਿਸ਼ਤਾ ਜਾਰੀ ਰਹੇਗਾ, ਹੁਣ ਜਦੋਂ ਗੌਤਮ ਗੰਭੀਰ ਨੂੰ ਮੁੱਖ ਕੋਚ ਨਿਯੁਕਤ ਕੀਤਾ ਗਿਆ ਹੈ।
ਇਸ ਦੇ ਨਾਲ ਹੀ ਇਕ ਹੋਰ ਯੂਜ਼ਰ ਨੇ ਲਿਖਿਆ ਕਿ ਹੁਣ ਇਕ ਨਵਾਂ ਦੌਰ ਸ਼ੁਰੂ ਹੋ ਗਿਆ ਹੈ। ਗੌਤਮ ਗੰਭੀਰ ਨੂੰ ਟੀਮ ਇੰਡੀਆ ਦਾ ਨਵਾਂ ਕੋਚ ਬਣਨ 'ਤੇ ਵਧਾਈ। ਹੁਣ ਜਿੱਤਣ ਵਾਲਾ ਭਵਿੱਖ ਇੱਥੇ ਹੈ। ਇਸ ਕੈਪਸ਼ਨ ਦੇ ਨਾਲ ਇੱਕ ਫੋਟੋ ਸ਼ੇਅਰ ਕੀਤੀ ਗਈ ਹੈ ਜਿਸ ਵਿੱਚ ਰੋਹਿਤ ਸ਼ਰਮਾ, ਵਿਰਾਟ ਕੋਹਲੀ ਅਤੇ ਹਾਰਦਿਕ ਪਾਂਡਿਆ ਦੀ ਜਰਸੀ ਨਜ਼ਰ ਆ ਰਹੀ ਹੈ ਅਤੇ ਗੌਤਮ ਗੰਭੀਰ ਨਿਰਦੇਸ਼ ਦੇ ਰਹੇ ਹਨ।
ਇਸ ਤੋਂ ਇਲਾਵਾ ਇਕ ਯੂਜ਼ਰ ਨੇ ਲਿਖਿਆ ਕਿ ਗੌਤਮ ਗੰਭੀਰ ਦਾ ਦਿਮਾਗ ਆਸਟ੍ਰੇਲੀਆ ਵਰਗਾ ਹੈ ਅਤੇ ਉਹ ਟੀਮ ਇੰਡੀਆ ਦੇ ਕੋਚ ਦੇ ਤੌਰ 'ਤੇ ਪਰਫੈਕਟ ਹਨ। ਇੱਕ ਯੂਜ਼ਰ ਨੇ ਗੌਤਮ ਗੰਭੀਰ ਨੂੰ ਟੀਮ ਇੰਡੀਆ ਦਾ ਕੋਚ ਬਣਾਉਣ ਲਈ ਜੈ ਸ਼ਾਹ ਦਾ ਧੰਨਵਾਦ ਵੀ ਕੀਤਾ।
'ਟੀਮ 'ਚ ਸ਼ਾਮਲ ਹੋਣ ਤੋਂ ਬਾਅਦ ਖਤਮ ਹੋਇਆ ਸਟਾਰ ਕਲਚਰ'
ਇਕ ਯੂਜ਼ਰ ਨੇ ਲਿਖਿਆ, ''ਗੌਤਮ ਗੰਭੀਰ ਕੋਚ ਬਣਨ ਤੋਂ ਬਾਅਦ ਕੁਝ ਵੱਡੇ ਬਦਲਾਅ ਕਰ ਸਕਦੇ ਹਨ। ਜਿਸ ਵਿੱਚ - ਟੀਮ ਵਿੱਚ ਸਟਾਰ ਕਲਚਰ ਖਤਮ ਹੋ ਗਿਆ ਹੈ, ਯੋਯੋ ਟੈਸਟ ਹਰ ਇੱਕ ਲਈ ਲਾਜ਼ਮੀ ਹੈ, ਸਿਰਫ ਪ੍ਰਦਰਸ਼ਨ ਕਰਨ ਵਾਲਾ ਹੀ ਖੇਡੇਗਾ, ਸੈਂਕੜੇ ਤੱਕ ਪਹੁੰਚਣ ਤੋਂ ਬਾਅਦ ਹੌਲੀ ਖੇਡਣ ਵਾਲੇ ਨੂੰ ਬਾਹਰ ਕਰ ਦਿੱਤਾ ਜਾਵੇਗਾ, ਖਿਡਾਰੀ ਆਪਣੀਆਂ ਪਤਨੀਆਂ ਨੂੰ ਟੂਰ 'ਤੇ ਨਹੀਂ ਲਿਜਾ ਸਕਣਗੇ''।