ODI World Cup 2023: ਵਿਸ਼ਵ ਕੱਪ 'ਚ ਨਹੀਂ ਦਿਖਾਈ ਦੇਵੇਗਾ 'ਕੁਲਚਾ'? ਸਾਬਕਾ ਚੋਣਕਾਰ ਨੇ ਕਿਹਾ - 'ਚਾਹਲ ਨੂੰ ਵਿਸ਼ਵ ਕੱਪ ਟੀਮ 'ਚ ਮੌਕਾ ਨਹੀਂ ਮਿਲਣਾ ਚਾਹੀਦਾ'

ਸੁਨੀਲ ਜੋਸ਼ੀ ਨੇ ਕਿਹਾ ਕਿ ਭਾਵੇਂ ਵਿਸ਼ਵ ਕੱਪ ਹੁਣ ਤੋਂ 7 ਜਾਂ 8 ਮਹੀਨੇ ਦੂਰ ਹੈ, ਮੈਂ 15 ਮੈਂਬਰੀ ਟੀਮ 'ਚ ਕੁਲਦੀਪ ਨੂੰ ਪਹਿਲੀ ਪਸੰਦ ਵਜੋਂ ਚੁਣਾਂਗਾ। ਸਿਰਫ਼ ਉਸ ਨੂੰ ਆਪਣੀ ਗੇਂਦਬਾਜ਼ੀ 'ਚ ਨਿਰੰਤਰਤਾ ਬਣਾਈ ਰੱਖਣੀ ਪਵੇਗੀ।

Kuldeep Yadav & Yuzvendra Chahal

ODI World Cup 2023: ਸਾਲ 2023 ਦੇ ਅੰਤ 'ਚ ਆਈਸੀਸੀ ਵਨਡੇ ਵਿਸ਼ਵ ਕੱਪ ਦਾ ਆਯੋਜਨ ਭਾਰਤ 'ਚ ਹੋਣ ਜਾ ਰਿਹਾ ਹੈ। ਸਾਰਿਆਂ ਨੂੰ ਉਮੀਦ ਹੈ ਕਿ ਭਾਰਤੀ ਟੀਮ ਇਸ ਮੈਗਾ ਈਵੈਂਟ 'ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਸਾਲ 2011 ਵਾਂਗ ਟਰਾਫੀ ਜਿੱਤਣ 'ਚ ਕਾਮਯਾਬ ਰਹੇਗੀ। ਇਸ ਨੂੰ ਲੈ ਕੇ ਟੀਮ ਦੇ ਕੰਬੀਨੇਸ਼ਨ 'ਤੇ ਚਰਚਾ ਸ਼ੁਰੂ ਹੋ ਗਈ ਹੈ, ਜਿਸ 'ਚ ਕੁਲਦੀਪ ਯਾਦਵ ਅਤੇ ਯੁਜਵੇਂਦਰ ਚਾਹਲ ਦੀ ਜੋੜੀ ਪਲੇਇੰਗ ਇਲੈਵਨ 'ਚ ਇਕੱਠੇ ਨਜ਼ਰ ਆਵੇਗੀ, ਇਹ ਇਕ ਵੱਡਾ ਸਵਾਲ ਹੈ।

ਇਸ 'ਤੇ ਸਾਬਕਾ ਭਾਰਤੀ ਖਿਡਾਰੀ ਅਤੇ ਮੁੱਖ ਚੋਣਕਾਰ ਸੁਨੀਲ ਜੋਸ਼ੀ ਨੇ ਵੱਡਾ ਬਿਆਨ ਦਿੰਦੇ ਹੋਏ ਕਿਹਾ ਹੈ ਕਿ ਉਹ ਯੁਜਵੇਂਦਰ ਚਾਹਲ ਦੀ ਥਾਂ ਕੁਲਦੀਪ ਯਾਦਵ ਨੂੰ ਵਨਡੇ ਵਿਸ਼ਵ ਕੱਪ ਟੀਮ 'ਚ ਸ਼ਾਮਲ ਕਰਨਾ ਚਾਹੁੰਦੇ ਹਨ।

ਸੁਨੀਲ ਜੋਸ਼ੀ ਨੇ ਈਐਸਪੀਐਨ ਕ੍ਰਿਕਇੰਫੋ ਨੂੰ ਦਿੱਤੇ ਆਪਣੇ ਬਿਆਨ 'ਚ ਕਿਹਾ ਕਿ ਭਾਵੇਂ ਵਿਸ਼ਵ ਕੱਪ ਹੁਣ ਤੋਂ 7 ਜਾਂ 8 ਮਹੀਨੇ ਦੂਰ ਹੈ, ਮੈਂ 15 ਮੈਂਬਰੀ ਟੀਮ 'ਚ ਕੁਲਦੀਪ ਨੂੰ ਪਹਿਲੀ ਪਸੰਦ ਵਜੋਂ ਚੁਣਾਂਗਾ। ਸਿਰਫ਼ ਉਸ ਨੂੰ ਆਪਣੀ ਗੇਂਦਬਾਜ਼ੀ 'ਚ ਨਿਰੰਤਰਤਾ ਬਣਾਈ ਰੱਖਣੀ ਪਵੇਗੀ।

ਰਵੀ ਬਿਸ਼ਨੋਈ ਅਤੇ ਸੁੰਦਰ ਮੈਚ ਜੇਤੂ ਖਿਡਾਰੀ ਹਨ : ਜੋਸ਼ੀ

ਜੋਸ਼ੀ ਨੇ ਆਪਣੇ ਬਿਆਨ 'ਚ ਅੱਗੇ ਕਿਹਾ ਕਿ ਮੈਂ ਰਵਿੰਦਰ ਜਡੇਜਾ ਨੂੰ 15 ਮੈਂਬਰੀ ਟੀਮ 'ਚ ਸਪਿਨ ਗੇਂਦਬਾਜ਼ ਦੇ ਤੌਰ 'ਤੇ ਸ਼ਾਮਲ ਕਰਾਂਗਾ ਅਤੇ ਜੇਕਰ ਉਹ ਪੂਰੀ ਤਰ੍ਹਾਂ ਫਿੱਟ ਨਹੀਂ ਹਨ ਤਾਂ ਮੈਂ ਅਕਸ਼ਰ ਨੂੰ ਆਪਣੇ ਬੈਕਅਪ ਦੇ ਤੌਰ 'ਤੇ ਸ਼ਾਮਲ ਕਰਨਾ ਚਾਹਾਂਗਾ।

ਇਸ ਦੇ ਨਾਲ ਹੀ ਚਾਹਲ ਦੀ ਥਾਂ ਵਾਸ਼ਿੰਗਟਨ ਸੁੰਦਰ ਅਤੇ ਰਵੀ ਬਿਸ਼ਨੋਈ ਜ਼ਿਆਦਾ ਕਾਰਗਰ ਸਾਬਤ ਹੋ ਸਕਦੇ ਹਨ। ਰਵੀ ਬਿਸ਼ਨੋਈ ਦਾ ਗੇਂਦਬਾਜ਼ੀ ਐਕਸ਼ਨ ਵੀ ਬਹੁਤ ਤੇਜ਼ ਹੈ ਅਤੇ ਉਹ ਨਿਰੰਤਰਤਾ ਨਾਲ ਗੇਂਦਬਾਜ਼ੀ ਕਰਦਾ ਹੈ। ਭਾਵੇਂ ਵਿਸ਼ਵ ਕੱਪ ਭਾਰਤ 'ਚ ਹੋ ਰਿਹਾ ਹੈ ਪਰ ਹਰ ਖੇਤਰ 'ਚ ਤੁਹਾਨੂੰ ਵੱਖ-ਵੱਖ ਸਥਿਤੀਆਂ ਦਾ ਸਾਹਮਣਾ ਕਰਨਾ ਪਵੇਗਾ। ਅਜਿਹੇ 'ਚ ਕੁਲਦੀਪ ਯਾਦਵ ਨੂੰ ਆਪਣੀ ਗੇਂਦਬਾਜ਼ੀ 'ਚ ਉਸ ਮੁਤਾਬਕ ਬਦਲਾਅ ਕਰਨਾ ਹੋਵੇਗਾ।

ਦੱਸ ਦੇਈਏ ਕਿ ਇੱਕ ਸਮੇਂ ਭਾਰਤੀ ਸੀਮਤ ਓਵਰਾਂ ਦੀ ਟੀਮ 'ਚ ਕੁਲਦੀਪ ਯਾਦਵ ਅਤੇ ਯੁਜਵੇਂਦਰ ਚਾਹਲ ਦੀ ਜੋੜੀ ਟੀਮ ਲਈ ਮੈਚ ਵਿਨਰ ਸਾਬਤ ਹੋਈ ਸੀ ਪਰ ਕੁਲਦੀਪ ਦੀ ਫਾਰਮ ਵਿਗੜਨ ਤੋਂ ਬਾਅਦ ਉਨ੍ਹਾਂ ਨੂੰ ਲੰਬੇ ਸਮੇਂ ਤੱਕ ਟੀਮ ਤੋਂ ਬਾਹਰ ਰਹਿਣਾ ਪਿਆ। ਇਸ ਦੇ ਨਾਲ ਹੀ ਚਾਹਲ ਲੰਬੇ ਸਮੇਂ ਤੋਂ ਉਸ ਤਰ੍ਹਾਂ ਦੀ ਫਾਰਮ ਨਹੀਂ ਨਜ਼ਰ ਆ ਰਹੇ ਹਨ, ਜਿਸ ਲਈ ਉਹ ਜਾਣੇ ਜਾਂਦੇ ਹਨ।