ਦੀਵਾਲੀ ਦੀ ਸਫਾਈ ਦੇ ਸਮੇਂ ਘਰ ਦੇ ਹਰ ਕੋਨੇ ਨੂੰ ਸਾਫ਼ ਕੀਤਾ ਜਾਂਦਾ ਹੈ। ਇਸ ਦੌਰਾਨ ਸਭ ਤੋਂ ਵੱਧ ਨਜ਼ਰ ਆਉਂਦੇ ਹਨ ਮੱਕੜੀਆਂ ਦੇ ਜਾਲੇ।

ਹਾਲਾਂਕਿ ਤੁਸੀਂ ਉਹਨਾਂ ਨੂੰ ਝਾੜੂ ਜਾਂ ਕੱਪੜੇ ਨਾਲ ਹਟਾ ਸਕਦੇ ਹੋ, ਪਰ ਕੁਝ ਸਮੇਂ ਬਾਅਦ ਉਹ ਫਿਰ ਬਣ ਜਾਂਦੇ ਹਨ।

ਮੱਕੜੀਆਂ ਇੱਕੋ ਥਾਂ ਵਾਰ-ਵਾਰ ਜਾਲਾ ਬਣਾਉਂਦੀਆਂ ਹਨ, ਜਿਸ ਨਾਲ ਘਰ ਗੰਦਾ ਦਿੱਸਦਾ ਹੈ। ਪਰ ਕੁਝ ਆਸਾਨ ਟਿੱਪਸ ਨਾਲ ਤੁਸੀਂ ਸਾਲ ਭਰ ਘਰ ਨੂੰ ਮੱਕੜੀਆਂ ਦੇ ਜਾਲਿਆਂ ਤੋਂ ਬਚਾ ਸਕਦੇ ਹੋ।

ਕੁਝ ਥਾਵਾਂ ਜਿਵੇਂ ਛੱਤ ਦੇ ਕੋਨੇ, ਪੰਖੇ ਅਤੇ ਦੀਵਾਰਾਂ ਦੇ ਕਿਨਾਰੇ ਉਹ ਹਨ ਜਿੱਥੇ ਮੱਕੜੀਆਂ ਦੇ ਜਾਲੇ ਵੱਧ ਬਣਦੇ ਹਨ। ਇੱਥੇ ਹਫ਼ਤੇ ਵਿੱਚ ਇੱਕ ਵਾਰੀ ਕੱਪੜਾ ਮਾਰ ਕੇ ਸਫਾਈ ਕਰੋ। ਲੰਬੀ ਝਾੜੂ ਵਰਤੋਂ, ਤਾਂ ਜੋ ਕੋਨੇ ਅਤੇ ਉੱਚੀਆਂ ਥਾਵਾਂ ਆਸਾਨੀ ਨਾਲ ਸਾਫ਼ ਹੋ ਜਾਣ।

ਰਸੋਈ ਦੇ ਚਿੱਟੇ ਸਿਰਕੇ ਅਤੇ ਪਾਣੀ ਨੂੰ ਬਰਾਬਰ ਮਾਤਰਾ ਵਿੱਚ ਮਿਲਾ ਕੇ ਸਪਰੇ ਬਣਾਓ।

ਮੱਕੜੀਆਂ ਦੇ ਜਾਲੇ ਸਾਫ਼ ਕਰਨ ਤੋਂ ਬਾਅਦ ਇਸ ਮਿਸ਼ਰਣ ਨੂੰ ਉਹਨਾਂ ਥਾਵਾਂ 'ਤੇ ਛਿੜਕੋ ਜਿੱਥੇ ਮੱਕੜੀਆਂ ਆਮ ਤੌਰ ਤੇ ਆਉਂਦੀਆਂ ਹਨ। ਇਸ ਨਾਲ ਥਾਵਾਂ ਸਾਫ਼ ਰਹਿਣਗੀਆਂ ਅਤੇ ਜਾਲੇ ਵਾਰ-ਵਾਰ ਨਹੀਂ ਬਣਨਗੇ।

ਅਲਮਾਰੀ, ਘਰ ਦੇ ਕੋਨੇ ਜਾਂ ਘੱਟ ਵਰਤੀ ਜਾਣ ਵਾਲੀਆਂ ਥਾਵਾਂ ‘ਤੇ ਅਕਸਰ ਮੱਕੜੀ ਦੇ ਜਾਲੇ ਬਣ ਜਾਂਦੇ ਹਨ। ਸਫਾਈ ਕਰਨ ਤੋਂ ਬਾਅਦ ਤੁਸੀਂ ਉਨ੍ਹਾਂ ਥਾਵਾਂ ‘ਤੇ ਕਪੂਰ ਦੀ ਟਿੱਕੀ ਰੱਖ ਸਕਦੇ ਹੋ। ਕਪੂਰ ਦੀ ਖੁਸ਼ਬੂ ਨਾਲ ਮੱਕੜੀਆਂ ਉੱਥੋਂ ਦੂਰ ਰਹਿੰਦੀਆਂ ਹਨ ਅਤੇ ਜਾਲੇ ਵੀ ਨਹੀਂ ਬਣਾਉਂਦੀਆਂ।

ਸੰਤਰੇ ਤੇ ਨਿੰਬੂ ਦੇ ਛਿਲਕੇ ਸੁੱਟਣ ਦੀ ਬਜਾਏ ਮੱਕੜੀ ਨੂੰ ਭਜਾਉਣ ਲਈ ਵਰਤੋਂ। ਤੁਸੀਂ ਇਹਨਾਂ ਨੂੰ ਪਾਣੀ ਵਿੱਚ ਉਬਾਲ ਕੇ ਇਸਦਾ ਸਪਰੇਅ ਤਿਆਰ ਕਰ ਸਕਦੇ ਹੋ।

ਇਸ ਤੋਂ ਇਲਾਵਾ, ਘਰ ਦੇ ਕੋਨਾਂ ਵਿੱਚ ਇਹਨਾਂ ਦੇ ਛਿਲਕੇ ਰੱਖੋ। ਇਹਨਾਂ ਦੀ ਖੁਸ਼ਬੂ ਨਾਲ ਮੱਕੜੀਆਂ ਦੂਰ ਰਹਿੰਦੀਆਂ ਹਨ। ਇੱਕ ਵਾਰ ਇਹ ਤਰੀਕਾ ਅਪਣਾ ਲਓ, ਤਾਂ ਕਈ ਦਿਨਾਂ ਤੱਕ ਘਰ ਵਿੱਚ ਮੱਕੜੀ ਦੇ ਜਾਲੇ ਨਹੀਂ ਦਿੱਸਣਗੇ।

ਜਿੱਥੇ ਮੱਕੜੀ ਵਾਰ-ਵਾਰ ਜਾਲਾ ਬੁਣਦੀ ਹੈ, ਉੱਥੇ ਲੱਸਣ ਦਾ ਸਪਰੇ ਜ਼ਰੂਰ ਕਰੋ। ਇਸ ਲਈ 4-5 ਲੱਸਣ ਦੀਆਂ ਕਲੀਆਂ ਪੀਸ ਕੇ ਪੇਸਟ ਬਣਾਓ ਤੇ ਇਸਨੂੰ ਪਾਣੀ ਵਿੱਚ ਮਿਲਾਓ।

ਹੁਣ ਇਹ ਮਿਸ਼ਰਣ ਦੀਵਾਰਾਂ ਜਾਂ ਕੋਨਾਂ ‘ਤੇ ਲਗਾਓ। ਇਸ ਤੋਂ ਬਾਅਦ ਉੱਥੇ ਤੁਹਾਨੂੰ ਇੱਕ ਵੀ ਮੱਕੜੀ ਨਹੀਂ ਦਿੱਸੇਗੀ।

ਅਕਸਰ ਸਫਾਈ ਦੇ ਸਮੇਂ ਅਸੀਂ ਜਾਲੇ ਤਾਂ ਹਟਾ ਦਿੰਦੇ ਹਾਂ, ਪਰ ਮੱਕੜੀ ਨੇੜੇ ਹੀ ਕਿਸੇ ਕੋਨੇ ਵਿੱਚ ਲੁਕ ਜਾਂਦੀ ਹੈ।

ਫਿਰ ਕੁਝ ਸਮੇਂ ਬਾਅਦ ਉਹ ਮੁੜ ਜਾਲਾ ਬੁਣਨਾ ਸ਼ੁਰੂ ਕਰ ਦਿੰਦੀ ਹੈ। ਇਸ ਲਈ ਜਦੋਂ ਵੀ ਮੱਕੜੀ ਦਿੱਸੇ, ਤਾਂ ਉਸਨੂੰ ਨੈਪਕਿਨ ਜਾਂ ਕੱਪੜੇ ਨਾਲ ਢੱਕ ਕੇ ਘਰ ਤੋਂ ਬਾਹਰ ਕੱਢ ਦਿਓ।