Amritsar News : ਖੇਤੀਬਾੜੀ ਮਹਿਕਮੇ ਦੇ ਅਫਸਰਾਂ ਨੇ ਔਰਗੈਨਿਕ ਖੇਤੀਬਾੜੀ ਫਾਰਮ ਦਾ ਦੌਰਾ ਕੀਤਾ। ਜ਼ਿਲ੍ਹਾ ਮੁੱਖ ਖੇਤੀਬਾੜੀ ਅਫ਼ਸਰ ਡਾ. ਜਤਿੰਦਰ ਸਿੰਘ ਗਿੱਲ ਆਪਣੇ ਖੇਤੀਬਾੜੀ ਸਟਾਫ਼ ਨਾਲ ਡਾ. ਸੁਖਦੇਵ ਸਿੰਘ ਚਮਿਆਰੀ ਦੇ ਔਰਗੈਨਿਕ ਖੇਤੀਬਾੜੀ ਫਾਰਮ 'ਤੇ ਗਏ। ਉਨ੍ਹਾਂ ਨੇ ਕਿਸਾਨ ਨਾਲ ਔਰਗੈਨਿਕ ਗੁੜ ਤਿਆਰ ਕਰਨ ਬਾਰੇ ਗੱਲ ਕੀਤੀ।
ਹਾਸਲ ਜਾਣਕਾਰੀ ਮੁਤਾਬਕ ਕੈਬਨਿਟ ਖੇਤੀਬਾੜੀ ਮੰਤਰੀ ਕੁਲਦੀਪ ਸਿੰਘ ਧਾਲੀਵਾਲ ਦੇ ਨਿਰਦੇਸ਼ਾਂ ਤੇ ਜ਼ਿਲ੍ਹਾ ਮੁੱਖ ਖੇਤੀਬਾੜੀ ਅਫ਼ਸਰ ਡਾ. ਜਤਿੰਦਰ ਸਿੰਘ ਗਿੱਲ ਨੇ ਆਪਣੇ ਖੇਤੀਬਾੜੀ ਸਟਾਫ਼ ਤੇ ਖੇਤੀ ਅਫਸਰ ਪ੍ਰਭਦੀਪ ਗਿੱਲ ਚੇਤਨਪੁਰਾ ਆਦਿ ਨਾਲ ਅੰਮ੍ਰਿਤਸਰ ਦੇ ਪਿੰਡਾਂ 'ਚ ਦੌਰਾ ਕੀਤਾ। ਉਨ੍ਹਾਂ ਨੇ ਕਿਸਾਨਾਂ ਨਾਲ ਮਿਲਣੀ ਤਹਿਤ ਅੱਜ ਪਿੰਡ ਚਮਿਆਰੀ ਵਿਖੇ ਔਰਗੈਨਿਕ ਖੇਤੀਬਾੜੀ ਕਰਦੇ ਤੇ ਔਰਗੈਨਿਕ ਗੁੜ ਤਿਆਰ ਕਰਦੇ ਡਾ. ਸੁਖਦੇਵ ਸਿੰਘ ਚਮਿਆਰੀ ਰਿਟਾਇਰ ਅਫਸਰ ਦੇ ਔਰਗੈਨਿਕ ਖੇਤੀਬਾੜੀ ਫਾਰਮ ਦਾ ਦੌਰਾ ਕੀਤਾ।
ਇਸ ਮੌਕੇ ਉਪਰੋਕਤ ਅਧਿਕਾਰੀਆਂ ਨੇ ਕਿਹਾ ਕਿ ਔਰਗੈਨਿਕ ਗੰਨਾ, ਸਬਜ਼ੀਆਂ, ਫਸਲਾਂ ਥੋੜੀ ਜਿਹੀ ਮਿਹਨਤ ਤੇ ਥੋੜਾ ਜਿਹਾ ਸਮਾਂ ਤਾਂ ਮੰਗਦੀਆਂ ਪਰ ਇਨਸਾਨਾਂ ਆਦਿ ਨੂੰ ਬਿਮਾਰੀਆਂ ਤੋਂ ਅਤੇ ਪ੍ਰਦੂਸ਼ਣ ਤੋਂ ਬਚਾਉਂਦੀਆਂ ਹਨ। ਇਸ ਦੌਰਾਨ ਡਾ ਸੁਖਦੇਵ ਸਿੰਘ ਚਮਿਆਰੀ ਨੇ ਦੱਸਿਆ ਕਿ ਉਹ ਗੰਨੇ ਦੇ ਖੇਤਾਂ 'ਚ ਕੋਈ ਵੀ ਖਾਦ ਜਾਂ ਦਵਾਈ ਨਹੀਂ ਪਾਉਂਦਾ ਤੇ ਆਪਣੇ ਗੁੜ ਬਣਾਉਣ ਸਮੇਂ ਵੀ ਕੋਈ ਵਸਤੂ ਹੋਰ ਨਹੀਂ ਵਰਤੀਦੀ ਤੇ ਵਧੀਆ ਔਰਗੈਨਿਕ ਗੰਨੇ ਤੋਂ ਵਧੀਆ ਗੁੜ ਤਿਆਰ ਕਰਕੇ ਫਿਰ ਲੋਕਾਂ ਨੂੰ ਦਿੱਤਾ ਜਾਂਦਾ ਹੈ।
ਉਨ੍ਹਾਂ ਕਿਹਾ ਕਿ ਉਹ ਆਪਣਾ ਮੁੱਢਲਾ ਫਰਜ ਸਮਝਦਾ ਕਿ ਇਨਸਾਨਾਂ ਨੂੰ ਵਧੀਆ ਗੁੜ ਜੋ ਸਿਹਤ ਲਈ ਗੁਣਕਾਰੀ ਹੋਵੇ, ਉਹ ਮੁਹੱਇਆ ਕਰਵਾਇਆ ਜਾਵੇ। ਉਹਨਾਂ ਕਿਹਾ ਕਿ ਉਸਨੇ ਕਦੀ ਵੀ ਪਰਾਲੀ ਜਾਂ ਕਣਕ ਦੇ ਨਾੜ ਨੂੰ ਅੱਗ ਨਹੀਂ ਲਾਈ ਅਤੇ ਸਾਰੀ ਰਹਿੰਦ ਖੂਹੰਦ ਖੇਤਾਂ ਵਿਚ ਵਾਹ ਕੇ ਵੱਧ ਝਾੜ ਲੈਂਦਾ ਹਾਂ।