ਔਰਤਾਂ 'ਤੇ ਭੱਦੀ ਟਿੱਪਣੀ ਕਰਨ ਵਾਲੇ ਹਾਰਦਿਕ ਨੂੰ ਪ੍ਰੇਮਿਕਾ ਨੇ ਇੰਝ ਪਾਈ ਝਾੜ

ਚੰਡੀਗੜ੍ਹ: ‘ਕਾਫ਼ੀ ਵਿਦ ਕਰਨ-6’ ਵਿੱਚ ਮਹਿਲਾਵਾਂ ਸਬੰਧੀ ਦਿੱਤੇ ਬਿਆਨ ਦੀ ਵਜ੍ਹਾ ਕਰਕੇ ਵਿਵਾਦਾਂ ਵਿੱਚ ਫਸੇ ਹਾਰਦਿਕ ਪਾਂਡਿਆ ਦੀਆਂ ਮੁਸੀਬਤਾਂ ਖ਼ਤਮ ਹੋਣ ਦਾ ਨਾਂ ਨਹੀਂ ਲੈ ਰਹੀਆਂ। ਬੀਸੀਸੀਆਈ ਪਹਿਲਾਂ ਹੀ ਹਾਰਦਿਕ ਪਾਂਡਿਆ ਤੇ ਕੇਐਲ ਰਾਹੁਲ ਨੂੰ ਸਸਪੈਂਡ ਕਰ ਚੁੱਕੀ ਹੈ। ਹੁਣ ਹਾਰਦਿਕ ਦੀ ਸਾਬਕਾ ਕਥਿਤ ਪ੍ਰੇਮਿਕਾ ਐਲੀ ਅਵਰਾਮ ਨੇ ਵੀ ਉਸ ਨੂੰ ਨਿਸ਼ਾਨੇ ’ਤੇ ਲੈ ਲਿਆ ਹੈ। ਦੱਸ ਦੇਈਏ ਕਿ ਕੁਝ ਦਿਨ ਪਹਿਲਾਂ ਉਸ ਦੀ ਇੱਕ ਹੋਰ ਸਾਬਕਾ ਪ੍ਰੇਮਿਕਾ ਈਸ਼ਾ ਗੁਪਤਾ ਨੇ ਵੀ ਉਸ ਦੀ ਰੱਜ ਕੇ ਆਲੋਚਨਾ ਕੀਤੀ ਸੀ। ਹੁਣ ਐਲੀ ਅਵਰਾਮ ਨੇ ਕਿਹਾ ਹੈ ਕਿ ਕੁਝ ਸਮਾਂ ਪਹਿਲਾਂ ਹੀ ਉਹ ਭਾਰਤ ਵਾਪਸ ਆਈ ਹੈ। ਉਸ ਨੂੰ ਇਸ ਸ਼ੋਅ ਬਾਰੇ ਕੁਝ ਪਤਾ ਨਹੀਂ ਸੀ। ਪਰ ਜਦੋਂ ਉਸ ਨੇ ਸ਼ੋਅ ਦੀ ਕਲਿੱਪ ਵੇਖੀ ਤਾਂ ਉਹ ਦੰਗ ਰਹਿ ਗਈ। ਉਸ ਨੇ ਕਿਹਾ ਕਿ ਜਿਸ ਹਾਰਦਿਕ ਨੂੰ ਉਹ ਜਾਣਦੀ ਸੀ, ਉਹ ਬਿਲਕੁਲ ਵੀ ਉਸ ਵਰਗਾ ਨਹੀਂ। ਉਸ ਨੇ ਕਿਹਾ ਕਿ ਜਿਸ ਤਰ੍ਹਾਂ ਲੋਕ ਉਸ ਦੇ ਬਿਆਨ ’ਤੇ ਪ੍ਰਤੀਕਿਰਿਆ ਦੇ ਰਹੇ ਹਨ, ਉਹ ਬਿਲਕੁਲ ਸਹੀ ਹੈ। ਐਲੀ ਤੋਂ ਪਹਿਲਾਂ ਈਸ਼ਾ ਗੁਪਤਾ ਨੇ ਵੀ ਹਾਰਦਿਕ ਨੂੰ ਫਿਟਕਾਰ ਲਾਈ ਸੀ। ਉਸ ਨੇ ਕਿਹਾ ਸੀ ਕਿ ਕਦੀ ਵੀ ਮਹਿਲਾਵਾਂ ਦੀ ਪੁਰਸ਼ਾਂ ਨਾਲ ਤੁਲਨਾ ਨਹੀਂ ਕਰਨੀ ਚਾਹੀਦੀ। ਮਹਿਲਾਵਾਂ ਹਰ ਮਾਮਲੇ ਵਿੱਚ ਪੁਰਸ਼ਾਂ ਨਾਲੋਂ ਅੱਗੇ ਹਨ। ਉਸ ਨੇ ਕਿਹਾ ਸੀ ਕਿ ਜੇ ਤੁਹਾਡੇ ਪਰਿਵਾਰ ਨੂੰ ਇਸ ਬਾਰੇ ਕੋਈ ਚਿੰਤਾ ਨਹੀਂ ਹੈ ਤਾਂ ਉਨ੍ਹਾਂ ਨੂੰ ਹੋਣੀ ਚਾਹੀਦੀ ਹੈ।