Uttara Bookar Death: ਮਸ਼ਹੂਰ ਅਦਾਕਾਰਾ ਉੱਤਰਾ ਬਾਓਕਰ ਦਾ ਪੁਣੇ ਦੇ ਇੱਕ ਹਸਪਤਾਲ ਵਿੱਚ ਦਿਹਾਂਤ ਹੋ ਗਿਆ ਹੈ। ਉਹ 79 ਸਾਲਾਂ ਦੇ ਸਨ ਅਤੇ ਲੰਬੇ ਸਮੇਂ ਤੋਂ ਬਿਮਾਰ ਸਨ। ਉੱਘੀ ਅਦਾਕਾਰਾ ਅਤੇ ਥੀਏਟਰ ਕਲਾਕਾਰ ਨੇ ਮੰਗਲਵਾਰ ਨੂੰ ਆਖਰੀ ਸਾਹ ਲਿਆ। ਉਨ੍ਹਾਂ ਦੇ ਪਰਿਵਾਰ ਦੇ ਨਜ਼ਦੀਕੀ ਸੂਤਰਾਂ ਨੇ ਦੱਸਿਆ ਕਿ ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਬੁੱਧਵਾਰ ਸਵੇਰੇ ਕੀਤਾ ਗਿਆ।
ਉੱਤਰਾ ਬਾਓਕਰ ਨੇ ਕਈ ਫਿਲਮਾਂ ਵਿੱਚ ਕੰਮ ਕੀਤਾ ਸ਼ਾਨਦਾਰ
ਗੋਵਿੰਦ ਨਿਹਲਾਨੀ ਦੀ ਫਿਲਮ 'ਤਮਸ' 'ਚ ਅਹਿਮ ਭੂਮਿਕਾ ਨਿਭਾਉਣ ਤੋਂ ਬਾਅਦ ਅਭਿਨੇਤਰੀ ਨੇ ਪੰਜ ਦਹਾਕਿਆਂ ਤੋਂ ਵੱਧ ਲੰਬੇ ਕਰੀਅਰ 'ਚ ਕਈ ਫਿਲਮਾਂ 'ਚ ਕੰਮ ਕੀਤਾ। ਉਹ ਮ੍ਰਿਣਾਲ ਸੇਨ ਦੀਆਂ 'ਏਕ ਦਿਨ ਅਚਾਣਕ', 'ਉੱਤਰਾਯਣ', 'ਰੁਕਮਾਵਤੀ ਕੀ ਹਵੇਲੀ', 'ਦ ਬਰਨਿੰਗ ਸੀਜ਼ਨ', 'ਦੋਘੀ', 'ਤਕਸ਼ਕ' ਅਤੇ 'ਸਰਦਾਰੀ ਬੇਗਮ' ਵਰਗੀਆਂ ਕਈ ਫ਼ਿਲਮਾਂ ਲਈ ਜਾਣੀ ਜਾਂਦੀ ਹੈ।
ਟੀਵੀ ਤੋਂ ਇਲਾਵਾ ਉੱਤਰਾ ਬਾਓਕਰ ਨੇ ਥੀਏਟਰ ਵਿੱਚ ਵੀ ਕੀਤਾ ਕੰਮ
ਉੱਤਰਾ ਬਾਓਕਰ ਨੇ ਕਈ ਟੀਵੀ ਸ਼ੋਅਜ਼ ਵਿੱਚ ਵੀ ਕੰਮ ਕੀਤਾ। ਇਨ੍ਹਾਂ 'ਚ 'ਉਡਾਨ', 'ਅੰਤਰਾਲ', 'ਐਕਸ ਜ਼ੋਨ', 'ਜੱਸੀ ਜੈਸੀ ਕੋਈ ਨਹੀਂ', 'ਕਸ਼ਮਕਸ਼ ਜ਼ਿੰਦਗੀ ਕੀ', 'ਰਿਸ਼ਤੇ' ਅਤੇ 'ਜਬ ਲਵ ਹੁਆ' ਵਰਗੇ ਕਈ ਸ਼ੋਅ ਸ਼ਾਮਲ ਹਨ। ਉਹ ਥੀਏਟਰ ਦਾ ਇੱਕ ਬਹੁਤ ਮਸ਼ਹੂਰ ਚਿਹਰਾ ਵੀ ਸੀ ਅਤੇ ਉਨ੍ਹਾਂ ਨੇ ਮੁੱਖ ਮੰਤਰੀ, ਮੇਨਾ ਗੁਰਜਰੀ, ਗਿਰੀਸ਼ ਕਰਨਾਡ ਦੇ ਤੁਗਲਕ ਅਤੇ ਉਮਰਾਓ ਜਾਨ ਵਰਗੇ ਕਈ ਮਹਾਨ ਨਾਟਕ ਕੀਤੇ ਜਿਸ ਵਿੱਚ ਉਨ੍ਹਾਂ ਨੇ ਮੁੱਖ ਭੂਮਿਕਾ ਨਿਭਾਈ। ਉਨ੍ਹਾਂ ਨੇ ਨੈਸ਼ਨਲ ਸਕੂਲ ਆਫ ਡਰਾਮਾ ਤੋਂ ਐਕਟਿੰਗ ਦੀ ਟਰੇਨਿੰਗ ਕੀਤੀ ਸੀ।
ਨੈਸ਼ਨਲ ਐਵਾਰਡ ਨਾਲ ਹੋ ਚੁੱਕੀ ਸਨਮਾਨਤ
ਬਾਓਕਰ ਨੇ ਮ੍ਰਿਣਾਲ ਸੇਨ ਦੀ ਫਿਲਮ 'ਏਕ ਦਿਨ ਅਚਾਣਕ' ਲਈ ਸਰਵੋਤਮ ਸਹਾਇਕ ਅਭਿਨੇਤਰੀ ਦਾ ਰਾਸ਼ਟਰੀ ਪੁਰਸਕਾਰ ਵੀ ਜਿੱਤਿਆ। ਉਨ੍ਹਾਂ ਨੂੰ ਸਾਲ 1984 ਵਿੱਚ ਸੰਗੀਤ ਨਾਟਕ ਅਕਾਦਮੀ ਅਵਾਰਡ ਨਾਲ ਵੀ ਸਨਮਾਨਿਤ ਕੀਤਾ ਗਿਆ ਸੀ। ਫਿਲਮ ਨਿਰਮਾਤਾ ਸੁਨੀਲ ਸੁਕਥਨਕਰ ਨੇ ਕਿਹਾ ਕਿ ਉਨ੍ਹਾਂ ਨੇ ਬਾਓਕਰ ਦੇ ਨਾਲ ਲਗਭਗ ਅੱਠ ਫੀਚਰ ਫਿਲਮਾਂ ਵਿੱਚ ਕੰਮ ਕੀਤਾ ਅਤੇ ਉਨ੍ਹਾਂ ਦੀ ਲੰਬੇ ਸਮੇਂ ਦੀ ਸਹਿਯੋਗੀ ਸੁਮਿਤਰਾ ਭਾਵੇ ਉਸਨੂੰ ਇੱਕ ਅਜਿਹੀ ਅਭਿਨੇਤਰੀ ਮੰਨਦੀ ਹੈ ਜੋ ਮਜ਼ਬੂਤ ਔਰਤ ਪਾਤਰਾਂ ਨੂੰ ਪੇਸ਼ ਕਰ ਸਕਦੀ ਹੈ। ਉਸਨੇ ਬਾਓਕਰ ਨੂੰ ਯਾਦ ਕਰਦੇ ਹੋਏ ਕਿਹਾ, "ਉਨ੍ਹਾਂ ਨੇ ਸਾਡੀਆਂ ਫਿਲਮਾਂ ਵਿੱਚ ਕਈ ਤਰ੍ਹਾਂ ਦੀਆਂ ਔਰਤਾਂ ਦੀਆਂ ਭੂਮਿਕਾਵਾਂ ਨਿਭਾਈਆਂ ਅਤੇ ਇੱਕ ਅਨੁਸ਼ਾਸਿਤ ਅਭਿਨੇਤਰੀ ਸੀ।"