‘ਤੂੰ ਤੇ ਮੈਂ’ ਗਾਣੇ ‘ਚ ਨਜ਼ਰ ਆ ਰਹੀ ਹੈ ਭੋਲੇ ਤੇ ਛਿੰਦੀ ਦੀ ਰੋਮਾਂਟਿਕ ਕੈਮਿਸਟ੍ਰੀ

ਚੰਡੀਗੜ੍ਹ: ਫ਼ਿਲਮ 'ਗੋਲਕ ਬੁਗਨੀ ਬੈਂਕ ਤੇ ਬਟੂਆ' ਦਾ ਟ੍ਰੇਲਰ ਜਦੋਂ ਤੋਂ ਰਿਲੀਜ਼ ਹੋਇਆ ਹੈ, ਉਦੋਂ ਤੋਂ ਹੀ ਫੈਨਜ਼ ਅਮਰਿੰਦਰ ਗਿੱਲ ਨੂੰ ਵੇਖਣ ਲਈ ਹੋਰ ਜ਼ਿਆਦਾ ਬੇਤਾਬ ਹੋ ਰਹੇ ਹਨ। ਹੁਣ ਤੱਕ ਫ਼ਿਲਮ ਦੇ ਤੀਨ ਗੀਤ ਰਿਲੀਜ਼ ਹੋ ਚੁੱਕੇ ਨੇ ਜਿਨ੍ਹਾਂ ‘ਚ ਹਰੀਸ਼ ਵਰਮਾ ਅਤੇ ਸਿੰਮੀ ਚਹਿਲ ਹੀ ਨਜ਼ਰ ਆ ਰਹੇ ਨੇ। ਹੁਣ ਫ਼ਿਲਮ ਦਾ ਇਕ ਹੋਰ ਗਾਣਾ ਰਿਲੀਜ਼ ਹੋਇਆ ਹੈ, ਜਿਸ ‘ਚ ਦਰਸ਼ਕਾਂ ਨੂੰ ਅਮਰਿੰਦਰ ਗਿੱਲ ਦੇ ਨਾਲ ਅਦਿਤੀ ਸ਼ਰਮਾ ਨਜ਼ਰ ਆਵੇਗੀ। ਸੌਂਗ ‘ਚ ਅਦਿਤੀ ਦੀ ਕਿਊਟਨੈੱਸ ਅਤੇ ਅਮਰਿੰਦਰ ਦਾ ਭੋਲਾਪਨ ਲੋਕਾਂ ਦਾ ਦਿਲ ਜਿੱਤ ਰਿਹਾ ਹੈ।   ਇੰਨਾ ਹੀ ਨਹੀਂ ਅਮਰਿੰਦਰ ਨੇ ਫ਼ਿਲਮ ਦੇ ਸੌਂਗ ਨੂੰ ਸੋਸ਼ਲ ਮੀਡੀਆ ‘ਤੇ ਸ਼ੇਅਰ ਕਰਦਿਆਂ ਇਸ ਨੂੰ ਫ਼ਿਲਮ 'ਚ ਆਪਣਾ ਫੇਵਰੇਟ ਸੌਂਗ ਦੱਸਿਆ ਹੈ। ‘ਤੂੰ ਤੇ ਮੈਂ’ ‘ਗੋਲਕ, ਬੁਗਨੀ, ਬੈਂਕ ਤੇ ਬਟੂਆ’ ਫ਼ਿਲਮ ਦਾ ਚੌਥਾ ਗਾਣਾ ਹੈ। ਇਸ ਰੋਮਾਂਟਿਕ ਗੀਤ ਨੂੰ ਆਵਾਜ਼ ਦਿੱਤੀ ਹੈ ਬੀਰ ਸਿੰਘ ਨੇ ਤੇ ਇਸ ਨੂੰ ਲਿਖੀਆ ਵੀ ਬੀਰ ਸਿੰਘ ਨੇ ਹੀ ਹੈ। ਦੱਸ ਦੇਈਏ ਕਿ 'ਗੋਲਕ ਬੁਗਨੀ ਬੈਂਕ ਤੇ ਬਟੂਆ' ਇੱਕ ਕਾਮੇਡੀ ਫ਼ਿਲਮ ਹੈ, ਜਿਹੜੀ ਨੋਟਬੰਦੀ ਦੀ ਮਾਰ ਝੱਲ ਰਹੇ ਕੁੜੀ-ਮੁੰਡੇ ਦੀ ਜ਼ਿੰਦਗੀ 'ਤੇ ਆਧਾਰਿਤ ਹੈ। ਫ਼ਿਲਮ 'ਚ ਅਮਰਿੰਦਰ ਗਿੱਲ, ਅਦਿਤੀ ਸ਼ਰਮਾ, ਹਰੀਸ਼ ਵਰਮਾ, ਸਿੰਮੀ ਚਹਿਲ, ਜਸਵਿੰਦਰ ਭੱਲਾ ਤੇ ਬੀ.ਐੱਨ. ਸ਼ਰਮਾ ਮੁੱਖ ਭੂਮਿਕਾ ਨਿਭਾਅ ਰਹੇ ਹਨ। ਸ਼ਿਤਿਜ ਚੌਧਰੀ ਵੱਲੋਂ ਡਾਇਰੈਕਟ ਕੀਤੀ ਇਸ ਫਿਲਮ ਨੂੰ ਕਾਰਜ ਗਿੱਲ ਤੇ ਤਲਵਿੰਦਰ ਹੇਅਰ ਨੇ ਪ੍ਰੋਡਿਊਸ ਕੀਤਾ ਹੈ। ਦੇਸ਼-ਵਿਦੇਸ਼ਾਂ 'ਚ ਫਿਲਮ 13 ਅਪ੍ਰੈਲ ਨੂੰ ਰਿਲੀਜ਼ ਹੋਣ ਜਾ ਰਹੀ ਹੈ। ਵੇਖੋ ਤੂੰ ਤੇ ਮੈਂ ਗਾਣੇ ਦੀ ਵੀਡੀਓ- [embed]