ਮੋਦੀ ਦੇ ਦੌਰੇ ਮਗਰੋਂ ਅੱਧੀ ਰਾਤ ਨੂੰ ਯੂਨੀਵਰਸਿਟੀ 'ਚ ਹੰਗਾਮਾ, ਜਾਣੋ ਪੂਰੀ ਕਹਾਣੀ ਤਸਵੀਰਾਂ ਦੀ ਜ਼ੁਬਾਨੀ

ਸੀਤਾਰਾਮ ਯੇਚੁਰੀ ਨੇ ਵੀ ਟਵੀਟ ਕੀਤਾ ਕਿ ਸਿਰਫ ਨਿਰਦਈ ਸਰਕਾਰ ਹੀ ਸੋਟੀਆਂ ਨਾਲ ਲੈੱਸ ਮਰਦ ਪੁਲਿਸਵਾਲਿਆਂ ਦੀ ਵਰਤੋਂ ਵਿਦਿਆਰਥਣਾਂ ਵਿਰੁੱਧ ਕਰਦੀ ਹੈ। ਭਾਜਪਾ ਤੇ ਆਰ.ਐੱਸ.ਐੱਸ. ਵਿਦਿਆਰਥੀਆਂ ਤੋਂ ਇੰਨਾ ਡਰਦੀ ਕਿਉਂ ਹੈ?

ਵਿਦਿਆਰਥਣਾਂ 'ਤੇ ਹੋਏ ਇਸ ਹਮਲੇ 'ਤੇ ਵਿਰੋਧੀ ਧਿਰ ਨੇ ਵੀ ਹਮਲਾਵਰ ਰੁਖ ਧਾਰ ਲਿਆ ਹੈ। ਕਾਂਗਰਸੀ ਨੇਤਾ ਦਿਗਵਿਜੇ ਸਿੰਘ ਨੇ ਟਵੀਟ ਕੀਤਾ ਕਿ ਬੀ.ਐਚ.ਯੂ. ਦੀਆਂ ਵਿਦਿਆਰਥਣਾਂ 'ਤੇ ਬੁਰੀ ਤਰੀਕੇ ਨਾਲ ਕੀਤਾ ਲਾਠੀਚਾਰਜ ਦੀ ਉਹ ਇਸ ਦੀ ਨਿੰਦਾ ਕਰਦੇ ਹਨ, ਕੀ ਸੁਰੱਖਿਆ ਦੀ ਮੰਗ ਕਰਨਾ ਵੀ ਗ਼ੈਰ-ਵਾਜ਼ਿਬ ਹੈ?

ਦਰਅਸਲ, ਕੈਂਪਸ ਦੀਆਂ ਵਿਦਿਆਰਥਣਾਂ ਆਪਣੇ ਨਾਲ ਹੋ ਰਹੀ ਛੇੜਖਾਨੀ ਦੇ ਵਿਰੋਧ ਵਿੱਚ ਰੋਸ ਮੁਜ਼ਾਹਰਾ ਕਰ ਰਹੀਆਂ ਹਨ। ਰੋਜ਼ ਵਧ ਰਹੀ ਛੇੜਖਾਨੀ ਦਾ ਵਿਰੋਧ ਕਰਨ ਲਈ ਬੈਚੂਲਰ ਆਫ਼ ਫਾਈਨ ਆਰਟਸ ਦੀ ਵਿਦਿਆਰਥਣ ਅਕਾਂਕਸ਼ਾ ਨੇ ਆਪਣਾ ਸਿਰ ਤਕ ਮੁੰਨ ਲਿਆ ਸੀ। ਉਸ ਦੇ ਸਮਥਨ ਵਿੱਚ ਯੂਨੀਵਰਸਿਟੀ ਦੀਆਂ ਕਾਫੀ ਕੁੜੀਆਂ ਤੇ ਮੁੰਡੇ ਨਿੱਤਰ ਆਏ।

ਧਰਨਾ ਪ੍ਰਦਰਸ਼ਨ ਕਾਰਨ ਬੀ.ਐਚ.ਯੂ. ਕੈਂਪਸ ਨੂੰ 2 ਅਕਤੂਬਰ ਤਕ ਬੰਦ ਰੱਖਣ ਦਾ ਫੈਸਲਾ ਕੀਤਾ ਗਿਆ ਹੈ। ਉੱਥੇ ਵਿਦਿਆਰਥਣਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਪ੍ਰਦਰਸ਼ਨ ਜਾਰੀ ਰਹੇਗਾ। ਪੁਲਿਸ ਅਤੇ ਪੀ.ਏ.ਸੀ. ਦੇ ਤਕਰੀਬਨ 1500 ਜਵਾਨ ਕੈਂਪਸ ਵਿੱਚ ਤੈਨਾਤ ਕੀਤੇ ਗਏ ਹਨ।

ਜਿਸ ਸਮੇਂ ਲਾਠੀਚਾਰਜ ਕੀਤਾ ਤਾਂ ਇਹ ਵੀ ਸੁਣਨ ਵਿੱਚ ਆਇਆ ਹੈ ਕਿ ਪੁਲਿਸ ਨੇ ਹਵਾਈ ਫ਼ਾਇਰ ਵੀ ਕੀਤੇ ਸਨ। ਮੁੱਖ ਗੇਟ 'ਤੇ ਪੁਲਿਸ ਨੇ ਪ੍ਰਦਰਸ਼ਨ ਕਰ ਰਹੇ ਵਿਦਿਆਰਥੀਆਂ ਨੂੰ ਭਜਾ ਭਜਾ ਕੇ ਕੁੱਟਿਆ।

ਇਸ ਘਟਨਾ 'ਤੇ ਯੂਨੀਵਰਸਿਟੀ ਦੇ ਕੁਲਪਤੀ ਗਿਰੀਸ਼ ਚੰਦਰ ਨੇ ਕਿਹਾ ਹੈ ਕਿ ਇਹ ਵਾਰਦਾਤ ਉਨ੍ਹਾਂ ਸ਼ਰਾਰਤੀ ਤੱਤਾਂ ਦਾ ਨਤੀਜਾ ਹੈ ਜੋ ਯੂਨੀਵਰਸਿਟੀ ਦੇ ਵਿਜ਼ਨ, ਮੰਤਵ ਨਾਲ ਸਹਿਮਤ ਨਹੀਂ, ਇਹ ਯੂਨੀਵਰਸਿਟੀ ਦਾ ਅਕਸ ਵਿਗਾੜਨ ਵਾਲਾ ਕੰਮ ਹੈ। ਕੁਲਪਤੀ ਨੇ ਕਿਹਾ ਕਿ ਇਸ ਗਟਨਾ ਵਿੱਚ ਬਾਹਰੋਂ ਵੀ ਬਹੁਤ ਲੋਕ ਆਏ ਜਿਨ੍ਹਾਂ ਨੇ ਇਸ ਅੰਦੋਲਨ ਨੂੰ ਹਵਾ ਦਿੱਤੀ। ਹਾਲਾਂਕਿ, ਵਿਦਿਆਰਥਣਾਂ ਦੀ ਮੁੱਖ ਮੰਗ ਤਾਂ ਹੋਸਟਲ 'ਚ ਸੁਰੱਖਿਆ ਇੰਤਜ਼ਾਮ ਵਧਾਉਣਾ ਤੇ ਛੇੜਖਾਨੀ ਕਰਨ ਵਾਲਿਆਂ ਨੂੰ ਕਾਬੂ ਕਰਨਾ ਹੈ।

ਆਪਣੀ ਗੱਲ ਰੱਖਣ ਲਈ ਕੁਲਪਤੀ ਦੀ ਰਿਹਾਇਸ਼ ਵੱਲ ਵਧ ਰਹੀਆਂ ਇਨ੍ਹਾਂ ਵਿਦਿਆਰਥਣਾਂ 'ਤੇ ਪੁਲਿਸ ਨੇ ਲਾਠੀਚਾਰਜ ਕਰ ਦਿੱਤਾ। ਪੁਲਿਸ ਦੀ ਇਸ ਕਾਰਵਾਈ ਵਿੱਚ ਕਈ ਵਿਦਿਆਰਥਣਾਂ ਤੇ ਮੀਡੀਆਕਰਮੀ ਵੀ ਜ਼ਖ਼ਮੀ ਹੋ ਗਏ। ਲਾਠੀਚਾਰਜ ਦੌਰਾਨ ਇੱਕ ਵਿਦਿਆਰਥਣ ਦੀ ਹਾਲਤ ਗੰਭੀਰ ਦੱਸੀ ਜਾਂਦੀ ਹੈ।

ਬੀਤੇ 2 ਦਿਨਾਂ ਤੋਂ ਪ੍ਰਧਾਨ ਮੰਤਰੀ ਮੋਦੀ ਵਾਰਾਣਸੀ ਦੇ ਦੌਰੇ 'ਤੇ ਸਨ ਅਤੇ ਬੀਤੇ 3 ਦਿਨਾਂ ਤੋਂ ਹੀ ਬਨਾਰਸ ਹਿੰਦੂ ਯੂਨੀਵਰਸਿਟੀ ਦੀਆਂ ਵਿਦਿਆਰਥਣਾਂ ਉਨ੍ਹਾਂ ਨੂੰ ਸੁਰੱਖਿਆ ਦੇਣ ਦੀ ਮੰਗ ਕਰਨ ਲਈ ਪ੍ਰਦਰਸ਼ ਕਰ ਰਹੀਆਂ ਸਨ। ਆਪਣੇ ਹੋਸਟਲ ਲਈ ਸੁਰੱਖਿਅਤ ਮਾਹੌਲ ਦੀ ਮੰਗ ਕਰਦੀਆਂ ਇਨ੍ਹਾਂ ਵਿਦਿਆਰਥਣਾਂ 'ਤੇ ਪੁਲਿਸ ਨੇ ਲਾਠੀਚਾਰਜ ਕਰ ਦਿੱਤਾ। ਇਹ ਵਿਦਿਆਰਥਣਾਂ ਯੂਨੀਵਰਸਿਟੀ ਵਿੱਚ ਦਿਨੋਂ ਦਿਨ ਵਧ ਰਹੀਆਂ ਛੇੜਛਾੜ ਦੀਆਂ ਘਟਨਾਵਾਂ ਵਿਰੁੱਧ ਆਪਣੀ ਆਵਾਜ਼ ਬੁਲੰਦ ਕਰ ਰਹੀਆਂ ਹਨ।