Why mosquitoes bite more in summer : ਤੁਸੀਂ ਅਕਸਰ ਦੇਖਿਆ ਹੋਵੇਗਾ ਕਿ ਮੱਛਰ ਸਰਦੀਆਂ ਦੇ ਮੁਕਾਬਲੇ ਗਰਮੀਆਂ ਵਿੱਚ ਜ਼ਿਆਦਾ ਕੱਟਦੇ ਹਨ ਪਰ ਮੱਛਰ ਅਜਿਹਾ ਕਿਉਂ ਕਰਦੇ ਹਨ...ਸ਼ਾਇਦ ਬਹੁਤ ਘੱਟ ਲੋਕ ਜਾਣਦੇ ਹਨ। ਹੁਣ ਵਿਗਿਆਨੀਆਂ ਨੇ ਇਸ 'ਤੇ ਇਕ ਰਿਸਰਚ ਕੀਤੀ ਹੈ, ਜਿਸ 'ਚ ਇਸ ਸਵਾਲ ਦਾ ਜਵਾਬ ਤਾਂ ਮਿਲ ਗਿਆ ਹੈ, ਇਸ ਦੇ ਨਾਲ ਹੀ ਇਹ ਵੀ ਪਤਾ ਲੱਗਾ ਹੈ ਕਿ ਮੱਛਰ ਹਮੇਸ਼ਾ ਇਨਸਾਨ ਦਾ ਖੂਨ ਨਹੀਂ ਪੀਂਦੇ ਸਨ ਪਰ ਸਮੇਂ ਦੇ ਨਾਲ ਬਦਲਾਅ ਨੇ ਉਨ੍ਹਾਂ ਨੂੰ ਅਜਿਹਾ ਬਣਾ ਦਿੱਤਾ ਹੈ।
ਗਰਮੀਆਂ ਵਿੱਚ ਮੱਛਰ ਜ਼ਿਆਦਾ ਕਿਉਂ ਕੱਟਦੇ
ਗਰਮੀਆਂ ਦੀ ਸ਼ੁਰੂਆਤ ਮੱਛਰਾਂ ਲਈ ਪ੍ਰਜਨਨ ਸੀਜ਼ਨ ਹੁੰਦੀ ਹੈ ਤੇ ਉਨ੍ਹਾਂ ਨੂੰ ਪ੍ਰਜਨਨ ਲਈ ਨਮੀ ਦੀ ਲੋੜ ਹੁੰਦੀ ਹੈ। ਇਹੀ ਕਾਰਨ ਹੈ ਕਿ ਇਸ ਮੌਸਮ 'ਚ ਮੱਛਰ ਮਨੁੱਖ ਦਾ ਜ਼ਿਆਦਾ ਖੂਨ ਪੀਂਦੇ ਹਨ, ਜਿਸ ਨਾਲ ਉਹ ਆਪਣੀ ਪ੍ਰਜਨਨ ਪ੍ਰਕਿਰਿਆ ਨੂੰ ਬਿਹਤਰ ਬਣਾ ਸਕਦੇ ਹਨ। ਹਾਲਾਂਕਿ, ਨਿਊਜਰਸੀ ਦੀ ਪ੍ਰਿੰਸਟਨ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਦਾ ਮੰਨਣਾ ਹੈ ਕਿ ਮੱਛਰ ਹਮੇਸ਼ਾ ਖੂਨ ਨਹੀਂ ਪੀਂਦੇ, ਉਹ ਪਾਣੀ ਦੀ ਕਮੀ ਕਾਰਨ ਖੂਨ ਪੀਣਾ ਸ਼ੁਰੂ ਕਰ ਦਿੰਦੇ ਹਨ...ਖਾਸ ਕਰਕੇ ਸ਼ਹਿਰਾਂ ਵਿੱਚ ਜਦੋਂ ਮੱਛਰ ਪਾਣੀ ਦੀ ਕਮੀ ਮਹਿਸੂਸ ਕਰਦੇ ਹਨ ਤਾਂ ਉਹ ਖੂਨ ਪੀਣਾ ਸ਼ੁਰੂ ਕਰ ਦਿੰਦੇ ਹਨ।
ਖੋਜ ਵਿੱਚ ਕੀ ਪਾਇਆ ਗਿਆ
ਨਿਊਜਰਸੀ ਦੀ ਪ੍ਰਿੰਸਟਨ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਨੇ ਅਫਰੀਕਨ ਏਡੀਜ਼ ਏਜਿਪਟੀ ਮੱਛਰਾਂ 'ਤੇ ਅਧਿਐਨ ਕੀਤਾ। ਨਿਊ ਸਾਇੰਟਿਸਟ ਵਿੱਚ ਪ੍ਰਕਾਸ਼ਿਤ ਖੋਜ ਰਿਪੋਰਟ ਮੁਤਾਬਕ ਏਡੀਜ਼ ਇਜਿਪਟੀ ਮੱਛਰ ਦੀਆਂ ਕਈ ਪ੍ਰਜਾਤੀਆਂ ਅਫਰੀਕੀ ਮੱਛਰਾਂ ਵਿੱਚ ਰਹਿੰਦੀਆਂ ਹਨ। ਇਨ੍ਹਾਂ ਸਾਰੀਆਂ ਪ੍ਰਜਾਤੀਆਂ ਦੇ ਮੱਛਰ ਖੂਨ ਨਹੀਂ ਪੀਂਦੇ...ਸਗੋਂ ਕਈ ਹੋਰ ਚੀਜ਼ਾਂ ਖਾ-ਪੀ ਕੇ ਜਿਉਂਦੇ ਹਨ।
ਇਸ 'ਤੇ ਪ੍ਰਿੰਸਟਨ ਯੂਨੀਵਰਸਿਟੀ ਦੇ ਖੋਜਕਰਤਾ ਨੂਹ ਰੋਜ਼ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਅਫਰੀਕਾ ਦੇ ਉਪ-ਸਹਾਰਨ ਖੇਤਰ 'ਚ 27 ਥਾਵਾਂ ਤੋਂ ਏਡੀਜ਼ ਇਜਿਪਟੀ ਮੱਛਰ ਦੇ ਅੰਡੇ ਲਏ ਅਤੇ ਇਨ੍ਹਾਂ ਅੰਡਿਆਂ 'ਚੋਂ ਮੱਛਰ ਪੈਦਾ ਹੋਣ ਦਿੱਤੇ। ਇਸ ਤੋਂ ਬਾਅਦ ਇਨ੍ਹਾਂ ਨੂੰ ਇਨਸਾਨਾਂ ਅਤੇ ਹੋਰ ਜੀਵਾਂ ਸਮੇਤ ਛੱਡ ਦਿੱਤਾ ਗਿਆ। ਇਹ ਉਨ੍ਹਾਂ ਦੇ ਖੂਨ ਪੀਣ ਦੇ ਨਮੂਨੇ ਨੂੰ ਸਮਝਣ ਲਈ ਕੀਤਾ ਗਿਆ ਸੀ। ਨਤੀਜੇ ਵਜੋਂ ਏਡੀਜ਼ ਇਜਿਪਟੀ ਮੱਛਰਾਂ ਦੀਆਂ ਵੱਖ-ਵੱਖ ਪ੍ਰਜਾਤੀਆਂ ਦੇ ਮੱਛਰਾਂ ਦੀ ਖੁਰਾਕ ਬਿਲਕੁਲ ਵੱਖਰੀ ਪਾਈ ਗਈ।
ਮੱਛਰ ਹਮੇਸ਼ਾ ਖੂਨ ਨਹੀਂ ਸੀ ਪੀਂਦੇ
ਖੋਜਕਰਤਾ ਨੂਹ ਰੋਜ਼ ਦੇ ਅਨੁਸਾਰ, ਸ਼ੁਰੂਆਤ ਵਿੱਚ ਮੱਛਰ ਖੂਨ ਨਹੀਂ ਪੀਂਦੇ ਸਨ। ਇਸ ਤਬਦੀਲੀ ਨੂੰ ਮੱਛਰਾਂ ਦੇ ਅੰਦਰ ਕਈ ਹਜ਼ਾਰ ਸਾਲ ਲੱਗ ਗਏ। ਏਡੀਜ਼ ਇਜਿਪਟੀ ਮੱਛਰਾਂ ਦੀ ਖਾਸ ਗੱਲ ਇਹ ਸੀ ਕਿ ਸ਼ਹਿਰਾਂ ਦੇ ਵਧਣ ਕਾਰਨ ਉਹ ਪਾਣੀ ਦੀ ਕਮੀ ਨਾਲ ਜੂਝਣ ਲੱਗੇ ਹਨ। ਉਸ ਤੋਂ ਬਾਅਦ, ਅੰਤ ਵਿੱਚ, ਉਹ ਮਨੁੱਖਾਂ ਅਤੇ ਜਾਨਵਰਾਂ ਦਾ ਖੂਨ ਪੀਣ ਲੱਗ ਪਏ ਪਰ, ਜਿੱਥੇ ਇਨਸਾਨ ਪਾਣੀ ਨੂੰ ਸਟੋਰ ਕਰਦੇ ਹਨ... ਉੱਥੇ ਐਨੋਫਿਲੀਜ਼ ਮੱਛਰ (ਮਲੇਰੀਆ ਮੱਛਰ) ਨੂੰ ਕੋਈ ਸਮੱਸਿਆ ਨਹੀਂ ਹੁੰਦੀ। ਉਹ ਕੂਲਰ, ਬਿਸਤਰੇ, ਬਰਤਨ ਵਰਗੀਆਂ ਥਾਵਾਂ 'ਤੇ ਆਰਾਮ ਨਾਲ ਆਪਣਾ ਪ੍ਰਜਨਨ ਕਰਦੇ ਹਨ। ਜਿਵੇਂ ਹੀ ਉਨ੍ਹਾਂ ਨੂੰ ਪਾਣੀ ਦੀ ਕਮੀ ਮਹਿਸੂਸ ਹੁੰਦੀ ਹੈ, ਉਹ ਤੁਰੰਤ ਮਨੁੱਖਾਂ ਅਤੇ ਹੋਰ ਜਾਨਵਰਾਂ ਦਾ ਖੂਨ ਪੀਣ ਲਈ ਹਮਲਾ ਕਰ ਦਿੰਦੇ ਹਨ।