ਕਰਜ਼ੇ ਕਾਰਨ ਨੌਜਵਾਨ ਕਿਸਾਨ ਵਲੋਂ ਖ਼ੁਦਕੁਸ਼ੀ

ਮਲੋਟ-ਪਿੰਡ ਉੜਾਂਗ ਨੇੜੇ ਪੰਨੀਵਾਲਾ ਫ਼ੱਤਾ ਦੇ ਇਕ ਨੌਜਵਾਨ ਕਿਸਾਨ ਨੇ ਕਰਜ਼ੇ ਕਾਰਨ ਮਾਨਸਿਕ ਪ੍ਰੇਸ਼ਾਨੀ ਦੇ ਚੱਲਦਿਆਂ ਨਹਿਰ ਵਿਚ ਛਾਲ ਮਾਰ ਕੇ ਖ਼ੁਦਕੁਸ਼ੀ ਕਰ ਲਈ ਹੈ।  ਮ੍ਰਿਤਕ ਦੇ ਪਿਤਾ ਹਰਦੇਵ ਸਿੰਘ ਖ਼ਾਲਸਾ ਨੇ ਦੱਸਿਆ ਕਿ ਉਸ ਦੇ 24 ਸਾਲਾ ਪੁੱਤਰ ਜਸਵਿੰਦਰ ਸਿੰਘ ਨੇ ਬਠਿੰਡਾ ਨੇੜੇ ਪਿੰਡ ਨੰਦਗੜ੍ਹ 'ਚ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ ਹੈ, ਜਿਸ ਦਾ ਪਤਾ ਸਾਡੇ ਵਲੋਂ ਉਸ ਦੇ ਇਕ ਦਿਨ ਪਹਿਲਾ ਘਰੋਂ ਲਾਪਤਾ ਹੋਣ ਮਗਰੋਂ ਕੀਤੀ ਜਾ ਰਹੀ ਭਾਲ ਦੇ ਚੱਲਦਿਆਂ ਲੱਗਾ।

ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਪਿਛਲੇ ਕਈ ਸਾਲਾਂ ਤੋਂ ਠੇਕੇ 'ਤੇ ਜ਼ਮੀਨ ਲੈ ਕੇ ਕੀਤੀ ਜਾ ਰਹੀ ਫ਼ਸਲਾਂ ਦੀ ਕਾਸ਼ਤ ਚੰਗੀ ਨਾ ਹੋਣ ਕਰਕੇ ਪਰਿਵਾਰ ਨੂੰ ਘਾਟਾ ਪਿਆ ਤੇ ਇਸ ਸਾਲ ਕਣਕ ਦੇ ਸੀਜ਼ਨ ਮੌਕੇ ਕਣਕ ਦੇ ਨਾੜ ਨੂੰ ਮੁੱਲ ਲੈ ਕੇ ਤੂੜੀ ਵਾਲੀ ਮਸ਼ੀਨ ਨਾਲ ਤੂੜੀ ਬਣਾ ਕੇ ਰੱਖੀ ਗਈ ਸੀ ਤੇ ਹੁਣ ਤੂੜੀ ਨਾ ਵਿਕਣ ਕਰਕੇ ਨਾੜ ਦੇ ਪੈਸੇ ਦੇਣ ਕਰਕੇ, ਆੜ੍ਹਤੀਏ, ਸਹਿਕਾਰੀ ਸੁਸਾਇਟੀ ਤੇ ਬੈਂਕ ਦੇ ਕਰਜ਼ੇ ਤੋਂ ਬਿਨਾਂ ਨੌਜਵਾਨ ਕਿਸਾਨ ਦੀ ਲਿਮਟ ਦਾ ਵੀ ਬਕਾਇਆ ਖੜ੍ਹਾ ਸੀ, ਜਿਸ ਕਰਕੇ ਨੌਜਵਾਨ ਕਿਸਾਨ ਪਿਛਲੇ ਕਈ ਦਿਨਾਂ ਤੋਂ ਮਾਨਸਿਕ ਰੂਪ ਵਿਚ ਪ੍ਰੇਸ਼ਾਨ ਸੀ | ਉਸ ਦੀ ਲਾਸ਼ ਜ਼ਿਲ੍ਹਾ ਬਠਿੰਡਾ ਦੇ ਪਿੰਡ ਨੰਦਗੜ੍ਹ ਕੋਲੋਂ ਨਹਿਰ ਵਿਚੋਂ ਮਿਲੀ ਹੈ। ਜ਼ਿਕਰਯੋਗ ਹੈ ਕਿ ਕਿਸਾਨ ਦੀ ਕੁਝ ਦਿਨਾਂ ਬਾਅਦ ਹੀ ਮੰਗਣੀ ਸੀ।