ਇਸ ਅਧਿਐਨ ਮੁਤਾਬਕ ਇਸ ਸਾਲ ਮੌਨਸੂਨ ਦੇ ਘੱਟ ਦਬਾਅ ਦੇ ਖੇਤਰ ’ਚ ਤਬਦੀਲੀ ਆਉਣ ਕਾਰਨ ਉੱਤਰੀ-ਮੱਧ ਭਾਰਤ ’ਚ ਘੱਟ ਮੀਂਹ ਪੈ ਸਕਦਾ ਹੈ। ਅਮਰੀਕਾ ਦੀ ਖੋਜ ਏਜੰਸੀ ਦੇ ਅਧਿਐਨ ’ਚ ਇਸ ਗੱਲ ਦਾ ਖੁਲਾਸਾ ਹੋਇਆ ਹੈ।
ਕੌਮੀ ਮਹਾਸਾਗਰੀ ਤੇ ਵਾਯੂਮੰਡਲੀ ਪ੍ਰਸ਼ਾਸਨ (ਐਨਓਏਏ) ਵੱਲੋਂ ਕੀਤਾ ਗਿਆ ਇਹ ਅਧਿਐਨ ਬੀਤੇ ਦਿਨ ਪ੍ਰਕਾਸ਼ਿਤ ਹੋਇਆ ਹੈ। ਇਸ ’ਚ ਦੱਖਣੀ-ਏਸ਼ਿਆਈ ਮੌਨਸੂਨ ਖੇਤਰ ’ਚ ‘ਮੌਨਸੂਨ ਘੱਟ ਦਬਾਅ ਸਿਸਟਮ’ (ਐਮਐਲਪੀਐਸ) ਦੇ ਕਾਫੀ ਹੱਦ ਤੱਕ ਘਟਣ ਦਾ ਅਨੁਮਾਨ ਜ਼ਾਹਿਰ ਕੀਤਾ ਗਿਆ ਹੈ। ਐਨਓਏਏ ਨੇ ਕਿਹਾ ਕਿ ਐਮਐਲਪੀਐਸ ਭਾਰਤੀ ਉਪ-ਮਹਾਦੀਪ ’ਚ ਮੀਂਹ ਦਾ ਵੱਡਾ ਕਾਰਨ ਹੈ ਤੇ ਉੱਤਰੀ ਤੇ ਕੇਂਦਰੀ ਭਾਰਤ ’ਚ ਖੇਤੀ ਦਾ ਵੱਡਾ ਹਿੱਸਾ ਮੀਂਹ ਦੇ ਪਾਣੀ ’ਤੇ ਹੀ ਨਿਰਭਰ ਕਰਦਾ ਹੈ।
ਐਮਐਲਪੀਐੇਸ ’ਚ ਕਿਸੇ ਵੀ ਤਰ੍ਹਾਂ ਦੀ ਤਬਦੀਲੀ, ਫਿਰ ਭਾਵੇਂ ਉਹ ਕੁਦਰਤੀ ਹੋਵੇ ਜਾਂ ਮਨੁੱਖੀ, ਨਾਲ ਇਸ ਲੰਮੇਰੇ ਸਮਾਜਿਕ ਤੇ ਆਰਥਿਕ ਪ੍ਰਭਾਵ ਪੈਂਦੇ ਹਨ। ਅਧਿਐਨ ’ਚ ਉੱਤਰੀ-ਮੱਧ ਭਾਰਤ ’ਚ ਮੀਂਹ ਦੀ ਕਮੀ ਦਾ ਖਦਸ਼ਾ ਪ੍ਰਗਟਾਇਆ ਗਿਆ ਹੈ। ਰਿਪੋਰਟ ਅਨੁਸਾਰ ਮੌਨਸੂਨ ਖੇਤਰ ’ਚ ਇਹ ਤਬਦੀਲੀ ਹੋਣ ਕਾਰਨ ਇਸ ਵਾਰ ਮੀਂਹ ਦਾ ਸੀਜ਼ਨ ਪ੍ਰਭਾਵਿਤ ਹੋਵੇਗਾ ਤੇ ਉੱਤਰੀ-ਮੱਧ ਭਾਰਤ ’ਚ ਘੱਟ ਮੀਂਹ ਪੈ ਸਕਦਾ ਹੈ।