Gods do not belong to upper caste: ਦੇਸ਼ 'ਚ ਜਾਤੀ ਹਿੰਸਾ ਦੀਆਂ ਘਟਨਾਵਾਂ ਦੇ ਵਿਚਕਾਰ ਜਵਾਹਰ ਲਾਲ ਨਹਿਰੂ (JNU) ਦੇ ਵਾਈਸ ਚਾਂਸਲਰ (VC) ਸ਼ਾਂਤੀਸ੍ਰੀ ਧੂਲੀਪੁੜੀ ਪੰਡਿਤ ਨੇ ਕਿਹਾ ਕਿ ਮਾਨਵ-ਵਿਗਿਆਨ ਦੇ ਅਨੁਸਾਰ ਕੋਈ ਵੀ ਦੇਵਤਾ ਉੱਚ ਜਾਤੀ ਨਾਲ ਸਬੰਧਤ ਨਹੀਂ ਹੈ ਅਤੇ ਇੱਥੋਂ ਤਕ ਕਿ ਭਗਵਾਨ ਸ਼ਿਵ ਵੀ ਅਨੁਸੂਚਿਤ ਜਾਤੀ ਜਾਂ ਕਬੀਲੇ ਤੋਂ ਹੋ ਸਕਦੇ ਹਨ। ਇੱਕ ਪ੍ਰੋਗਰਾਮ ਨੂੰ ਸੰਬੋਧਨ ਕਰਦਿਆਂ ਜੇਐਨਯੂ ਦੇ ਵਾਈਸ ਚਾਂਸਲਰ ਨੇ ਕਿਹਾ ਕਿ ਮੈਂ ਸਾਰੀਆਂ ਔਰਤਾਂ ਨੂੰ ਦੱਸ ਦਵਾਂ ਕਿ ਮਨੁਸਮ੍ਰਿਤੀ ਅਨੁਸਾਰ ਸਾਰੀਆਂ ਔਰਤਾਂ ਸ਼ੂਦਰ ਹਨ, ਇਸ ਲਈ ਕੋਈ ਵੀ ਔਰਤ ਇਹ ਦਾਅਵਾ ਨਹੀਂ ਕਰ ਸਕਦੀ ਕਿ ਉਹ ਬ੍ਰਾਹਮਣ ਹੈ ਜਾਂ ਕੋਈ ਹੋਰ ਹੈ ਅਤੇ ਤੁਸੀਂ ਸਿਰਫ਼ ਆਪਣੇ ਪਿਤਾ ਜਾਂ ਵਿਆਹ ਰਾਹੀਂ ਹੀ ਜਾਤ ਮਿਲਦੀ ਹੈ।
ਬ੍ਰਾਹਮਣ ਨਹੀਂ ਹੈ ਕੋਈ ਵੀ ਦੇਵਤਾ
'ਡਾ. ਬੀ.ਆਰ. ਅੰਬੇਦਕਰ ਥਾਟਸ ਆਨ ਜੈਂਡਰ ਜਸਟਿਸ : ਡੀਕੋਡਿੰਗ ਦਿ ਯੂਨੀਫਾਰਮ ਸਿਵਲ ਕੋਡ' ਸਿਰਲੇਖ ਵਾਲੇ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਸ਼ਾਂਤੀਸ੍ਰੀ ਧੂਲੀਪੁੜੀ ਨੇ ਸੋਮਵਾਰ ਨੂੰ 9 ਸਾਲਾ ਦਲਿਤ ਲੜਕੇ ਨਾਲ ਜਾਤੀ ਹਿੰਸਾ ਦੀ ਤਾਜ਼ਾ ਘਟਨਾ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਕੋਈ ਵੀ ਰੱਬ ਉੱਚੀ ਜਾਤੀ ਦਾ ਨਹੀਂ ਹੈ। ਉਨ੍ਹਾਂ ਕਿਹਾ, "ਤੁਹਾਡੇ ਵਿੱਚੋਂ ਬਹੁਤਿਆਂ ਨੂੰ ਮਾਨਵ-ਵਿਗਿਆਨ ਦੇ ਦ੍ਰਿਸ਼ਟੀਕੋਣ ਤੋਂ ਸਾਡੇ ਦੇਵਤਿਆਂ ਦੇ ਮੂਲ ਬਾਰੇ ਪਤਾ ਹੋਣਾ ਚਾਹੀਦਾ ਹੈ। ਕੋਈ ਦੇਵਤਾ ਬ੍ਰਾਹਮਣ ਨਹੀਂ ਹੈ, ਸਭ ਤੋਂ ਉੱਚਾ ਖੱਤਰੀ ਹੈ। ਭਗਵਾਨ ਸ਼ਿਵ ਨੂੰ ਅਨੁਸੂਚਿਤ ਜਾਤੀ ਜਾਂ ਅਨੁਸੂਚਿਤ ਜਨਜਾਤੀ ਤੋਂ ਹੋਣਾ ਚਾਹੀਦਾ ਹੈ, ਕਿਉਂਕਿ ਉਹ ਸੱਪ ਦੇ ਨਾਲ ਸ਼ਮਸ਼ਾਨਘਾਟ 'ਚ ਬੈਠਦੇ ਹਨ ਅਤੇ ਪਹਿਨਣ ਲਈ ਬਹੁਤ ਘੱਟ ਕੱਪੜੇ ਹਨ। ਮੈਨੂੰ ਨਹੀਂ ਲੱਗਦਾ ਕਿ ਬ੍ਰਾਹਮਣ ਸ਼ਮਸ਼ਾਨਘਾਟ 'ਚ ਬੈਠ ਸਕਦੇ ਹਨ।"
ਉਨ੍ਹਾਂ ਕਿਹਾ ਕਿ ਲਕਸ਼ਮੀ, ਸ਼ਕਤੀ ਇੱਥੋਂ ਤੱਕ ਕਿ ਜਗਨਨਾਥ ਆਦਿ ਦੇਵਤੇ ਵੀ ਮਨੁੱਖੀ ਵਿਗਿਆਨ ਦੀ ਨਜ਼ਰੀਏ ਤੋਂ ਉੱਚ ਜਾਤੀ ਦੇ ਨਹੀਂ ਹਨ। ਵਾਈਸ ਚਾਂਸਲਰ ਨੇ ਕਿਹਾ ਕਿ ਜਗਨਨਾਥ ਅਸਲ 'ਚ ਆਦਿਵਾਸੀ ਮੂਲ ਦੇ ਹਨ। ਉਨ੍ਹਾਂ ਕਿਹਾ ਕਿ ਤਾਂ ਫਿਰ ਵੀ ਸਾਡੇ ਨਾਲ ਇਹ ਵਿਤਕਰਾ ਕਿਉਂ ਜਾਰੀ ਹੈ ਜੋ ਕਿ ਬਹੁਤ ਹੀ ਅਣਮਨੁੱਖੀ ਹੈ। ਇਹ ਬਹੁਤ ਜ਼ਰੂਰੀ ਹੈ ਕਿ ਅਸੀਂ ਬਾਬਾ ਸਾਹਿਬ ਦੇ ਵਿਚਾਰਾਂ 'ਤੇ ਮੁੜ ਵਿਚਾਰ ਕਰੀਏ। ਸਾਡੇ ਕੋਲ ਆਧੁਨਿਕ ਭਾਰਤ ਦਾ ਕੋਈ ਨੇਤਾ ਨਹੀਂ ਹੈ, ਜੋ ਇੰਨਾ ਮਹਾਨ ਚਿੰਤਕ ਸੀ।
ਹਿੰਦੂ ਕੋਈ ਧਰਮ ਨਹੀਂ, ਸਗੋਂ ਜੀਵਨ ਜਾਚ ਹੈ
ਉਨ੍ਹਾਂ ਕਿਹਾ ਕਿ ਹਿੰਦੂ ਕੋਈ ਧਰਮ ਨਹੀਂ ਹੈ, ਇਹ ਇੱਕ ਜੀਵਨ ਜਾਚ ਹੈ ਅਤੇ ਜੇਕਰ ਇਹ ਜੀਵਨ ਜਿਊਣ ਦਾ ਤਰੀਕਾ ਹੈ ਤਾਂ ਅਸੀਂ ਆਲੋਚਨਾ ਤੋਂ ਕਿਉਂ ਡਰਦੇ ਹਾਂ। ਉਨ੍ਹਾਂ ਕਿਹਾ ਕਿ ਗੌਤਮ ਬੁੱਧ ਉਨ੍ਹਾਂ ਪਹਿਲੇ ਸ਼ਖ਼ਸੀਅਤਾਂ ਵਿੱਚੋਂ ਇੱਕ ਸਨ ਜਿਨ੍ਹਾਂ ਨੇ ਸਾਡੇ ਸਮਾਜ 'ਚ ਮੌਜੂਦ ਵਿਤਕਰੇ ਬਾਰੇ ਸਾਨੂੰ ਜਗਾਇਆ। ਇਸ ਦੇ ਨਾਲ ਹੀ ਉਨ੍ਹਾਂ ਯੂਨੀਵਰਸਿਟੀਆਂ 'ਚ ਵਾਈਸ ਚਾਂਸਲਰ ਦੀ ਥਾਂ ‘ਕੁਲਗੁਰੂ’ ਸ਼ਬਦ ਦੀ ਵਰਤੋਂ ਸ਼ੁਰੂ ਕਰਨ ਦੀ ਵਕਾਲਤ ਕੀਤੀ ਹੈ। ਉਨ੍ਹਾਂ ਆਪਣੇ ਸੰਬੋਧਨ 'ਚ ਕਿਹਾ ਕਿ ਕੁਲਗੁਰੂ ਸ਼ਬਦ ਦੀ ਵਰਤੋਂ ਲਿੰਗ ਨਿਰਪੱਖਤਾ ਲਿਆਉਣ ਦੇ ਮਕਸਦ ਨਾਲ ਪ੍ਰਸਤਾਵਿਤ ਕੀਤੀ ਗਈ ਹੈ।