ਫਰਜ਼ੀ TRP ਮਾਮਲੇ 'ਚ Republic ਟੀਵੀ ਦੇ ਤਿੰਨ ਅਧਿਕਾਰੀ ਨਾਮਜ਼ਦ

ਫਰਜ਼ੀ ਟੀਆਰਪੀ ਕੇਸ ਵਿੱਚ ਗਿਰਫਤਾਰ ਕੀਤੇ ਗਏ ਪੰਜ ਲੋਕਾਂ ਵਿੱਚੋਂ ਤਿੰਨ ਨੇ ਰਿਪਬਲਿਕ ਟੀਵੀ ਦੇ ਅਧਿਕਾਰੀਆਂ ਨੂੰ ਮੈਜਿਸਟਰੇਟ ਦੇ ਸਾਹਮਣੇ ਨਾਮਜਦ ਕੀਤਾ ਹੈ।

ਨਵੀਂ ਦਿੱਲੀ: ਫਰਜ਼ੀ ਟੀਆਰਪੀ ਕੇਸ ਵਿੱਚ ਗਿਰਫਤਾਰ ਕੀਤੇ ਗਏ ਪੰਜ ਲੋਕਾਂ ਵਿੱਚੋਂ ਤਿੰਨ ਨੇ ਰਿਪਬਲਿਕ ਟੀਵੀ ਦੇ ਅਧਿਕਾਰੀਆਂ ਨੂੰ ਮੈਜਿਸਟਰੇਟ ਦੇ ਸਾਹਮਣੇ ਨਾਮਜਦ ਕੀਤਾ ਹੈ। ਤਿੰਨਾਂ ਨੇ ਕਿਹਾ ਕਿ ਇਹ ਲੋਕ ਟੀ ਆਰ ਪੀ ਦੀ ਖੇਡ ਵਿੱਚ ਸ਼ਾਮਲ ਹਨ।ਤਿੰਨਾਂ ਮੁਲਜ਼ਮਾਂ ਨੇ ਆਪਣੇ ਆਪ ਨੂੰ ਇੱਕ ਰੈਕੇਟ ਦਾ ਹਿੱਸਾ ਦੱਸਿਆ ਅਤੇ ਕਿਹਾ ਕਿ ਲੋਕਾਂ ਨੂੰ ਤੈਅ ਚੈਨਲ ਦੇਖਣ ਦੇ ਬਦਲੇ ਪੈਸੇ ਦਿੱਤੇ ਜਾਂਦੇ ਸਨ। ਇਕ ਅੰਗ੍ਰੇਜ਼ੀ ਅਖਬਾਰ ਨਾਲ ਗੱਲਬਾਤ ਕਰਦਿਆਂ ਮੁੰਬਈ ਦੇ ਪੁਲਿਸ ਕਮਿਸ਼ਨਰ ਪਰਮਬੀਰ ਸਿੰਘ ਨੇ ਇਹ ਗੱਲਾਂ ਦੱਸੀਆਂ ਜੋ ਆਰੋਪੀਆਂ ਨੇ ਕਹੀਆਂ ਹਨ। ਉਨ੍ਹਾਂ ਕਿਹਾ ਕਿ ਤਿੰਨਾਂ ਮੁਲਜ਼ਮਾਂ ਨੂੰ ਅਦਾਲਤ ਵਿੱਚ ਗਵਾਹ ਵਜੋਂ ਪੇਸ਼ ਕੀਤਾ ਜਾਵੇਗਾ। ਟਾਈਮਜ਼ ਆਫ ਇੰਡੀਆ ਨਾਲ ਗੱਲਬਾਤ ਕਰਦਿਆਂ ਪਰਮਬੀਰ ਸਿੰਘ ਨੇ ਕਿਹਾ ਕਿ ਇਕ ਹੋਰ ਗਵਾਹ ਨੇ ਬਾਕਸ ਸਿਨੇਮਾ ਖਿਲਾਫ ਬਿਆਨ ਦਿੱਤਾ ਹੈ। ਬਿਆਨ ਦੇਣ ਵਾਲੇ ਤਿੰਨ ਮੁਲਜ਼ਮਾਂ ਵਿਚੋਂ ਇਕ ਹੰਸਾ ਰਿਸਰਚ ਦਾ ਕਰਮਚਾਰੀ ਵੀ ਹੈ। ਪੁਲਿਸ ਕਮਿਸ਼ਨਰ ਨੇ ਕਿਹਾ ਕਿ ਸੀਆਰਪੀਸੀ ਦੀ ਧਾਰਾ 164 ਦੇ ਤਹਿਤ ਬਿਆਨ ਦਰਜ ਕੀਤੇ ਜਾ ਰਹੇ ਹਨ, ਜਿਸ ਵਿੱਚ ਇੱਕ ਮੈਜਿਸਟਰੇਟ ਸਾਹਮਣੇ ਪੁੱਛ ਪੜਤਾਲ ਕੀਤੀ ਜਾਂਦੀ ਹੈ। ਰਿਪਬਲਿਕ ਦੇ ਦੋ ਵੱਡੇ ਅਧਿਕਾਰੀਆਂ ਤੋਂ ਪੁੱਛਗਿੱਛ ਕੀਤੀ ਗਈ ਇਸ ਤੋਂ ਪਹਿਲਾਂ ਵੀਰਵਾਰ ਨੂੰ ਸਹਾਇਕ ਇੰਸਪੈਕਟਰ ਸਚਿਨ ਵਾਜੇ ਨੇ ਰਿਪਬਲਿਕ ਟੀਵੀ ਦੇ ਸੀਨੀਅਰ ਕਾਰਜਕਾਰੀ ਸੰਪਾਦਕ ਅਭਿਸ਼ੇਕ ਕਪੂਰ ਤੋਂ ਤਿੰਨ ਘੰਟੇ ਪੁੱਛਗਿੱਛ ਕੀਤੀ। ਬੁੱਧਵਾਰ ਨੂੰ ਚੈਨਲ ਦੇ ਕਾਰਜਕਾਰੀ ਸੰਪਾਦਕ ਨਿਰੰਜਨ ਨਾਰਾਇਣ ਸਵਾਮੀ ਦਾ ਬਿਆਨ ਦਰਜ ਕੀਤਾ ਗਿਆ। ਸੁਪਰੀਮ ਕੋਰਟ ਨੇ ਅਰਨਬ ਦੀ ਪਟੀਸ਼ਨ 'ਤੇ ਸੁਣਵਾਈ ਕਰਨ ਤੋਂ ਕੀਤਾ ਇਨਕਾਰ ਸੁਪਰੀਮ ਕੋਰਟ ਨੇ ਵੀਰਵਾਰ ਨੂੰ ਅਰਨਬ ਅਤੇ ਰਿਪਬਲਿਕ ਟੀਵੀ ਵੱਲੋਂ ਦਾਇਰ ਪਟੀਸ਼ਨ ’ਤੇ ਵਿਚਾਰ ਕਰਨ ਤੋਂ ਇਨਕਾਰ ਕਰਦਿਆਂ ਉਨ੍ਹਾਂ ਨੂੰ ਹਾਈ ਕੋਰਟ ਵਿੱਚ ਅਪੀਲ ਕਰਨ ਲਈ ਕਿਹਾ। ਪਟੀਸ਼ਨ ਵਿਚ ਪੁਲਿਸ ਸੰਮਨ 'ਤੇ ਰੋਕ ਦੀ ਮੰਗ ਕੀਤੀ ਗਈ ਸੀ। ਜਸਟਿਸ ਡੀ ਵਾਈ ਚੰਦਰਚੂੜ ਨੇ ਕਿਹਾ, "ਸਾਨੂੰ ਹਾਈ ਕੋਰਟ ਵਿਚ ਵਿਸ਼ਵਾਸ ਹੋਣਾ ਚਾਹੀਦਾ ਹੈ। ਹਾਈ ਕੋਰਟ ਦੇ ਦਖਲ ਤੋਂ ਬਿਨਾਂ ਸੁਣਵਾਈ ਗ਼ਲਤ ਸੰਦੇਸ਼ ਦਿੰਦੀ ਹੈ।" ਟੀਆਰਪੀ ਖੇਡ ਕਿਵੇਂ ਚੱਲ ਰਹੀ ਸੀ? ਪਿਛਲੇ ਵੀਰਵਾਰ ਨੂੰ ਪੁਲਿਸ ਕਮਿਸ਼ਨਰ ਪਰਮਬੀਰ ਸਿੰਘ ਨੇ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਟੀਆਰਪੀ ਧੋਖਾਧੜੀ ਦਾ ਦਾਅਵਾ ਕੀਤਾ ਸੀ। ਉਨ੍ਹਾਂ ਕਿਹਾ ਕਿ ਜਾਂਚ ਦੌਰਾਨ ਅਜਿਹੇ ਮਕਾਨ ਮਿਲੇ ਹਨ, ਜਿਥੇ ਟੀਆਰਪੀ ਮੀਟਰ ਲਗਾ ਕੇ ਦਿਨ ਭਰ ਸਿਰਫ ਇਕ ਚੈਨਲ ਚਲਾਇਆ ਜਾਂਦਾ ਸੀ ਤਾਂ ਜੋ ਇਸ ਦੀ ਟੀਆਰਪੀ ਵਧੇ। ਇਸਦੇ ਬਦਲੇ, ਮਕਾਨ ਮਾਲਕ ਜਾਂ ਚੈਨਲ ਚਲਾਉਣ ਵਾਲੇ ਨੂੰ ਇੱਕ ਦਿਨ ਵਿੱਚ 500 ਰੁਪਏ ਦਿੱਤੇ ਗਏ। ਇੱਥੇ ਬਹੁਤ ਸਾਰੇ ਘਰ ਸਨ, ਜੋ ਕਿ ਕਈ ਦਿਨਾਂ ਤੋਂ ਬੰਦ ਸਨ, ਉਥੇ ਵੀ ਟੀਵੀ ਚੱਲ ਰਹੇ ਸੀ।ਹੰਸਾ ਏਜੰਸੀ ਨੂੰ ਮੁੰਬਈ ਵਿਚ ਪੀਪਲਜ਼ ਮੀਟਰ ਲਗਾਉਣ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਸੀ। ਇਸ ਏਜੰਸੀ ਦੇ ਕੁਝ ਲੋਕਾਂ ਨੇ ਚੈਨਲ ਦੇ ਸਹਿਯੋਗ ਨਾਲ ਇਹ ਖੇਡ ਕੀਤੀ।