ਪਾਨੀਪਤ: ਹਰਿਆਣਾ ਦੇ ਪਾਨੀਪਤ 'ਚ ਦਿਲ ਕੰਬਾਊ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਮੁਲਜ਼ਮ ਅਤੇ ਉਸ ਦੀ ਮਾਂ ਨੇ ਹੈਵਾਨੀਅਤ ਦੀਆਂ ਸਾਰੀਆਂ ਹੱਦਾਂ ਪਾਰ ਕਰ ਦਿੱਤੀਆਂ। ਪੁੱਤਰ ਨੇ ਨਾਬਾਲਗ ਨਾਲ ਜਬਰ ਜਨਾਹ ਕੀਤਾ ਅਤੇ ਮੁਲਜ਼ਮ ਦੀ ਮਾਂ ਨੇ ਕਰਤੂਤ ਲੁਕਾਉਣ ਲਈ ਬੱਚੀ ਦੇ ਪ੍ਰਾਈਵੇਟ ਪਾਰਟ 'ਤੇ ਗਰਮ ਚਿਮਟਾ ਲਗਾ ਦਿੱਤਾ। ਆਪਣੇ ਹੀ ਘਰ 'ਚ ਰਹਿੰਦੀ 10 ਸਾਲ ਦੀ ਬੱਚੀ ਨਾਲ ਜਬਰ ਜਨਾਹ ਕਰਨ ਵਾਲੇ ਨੌਜਵਾਨ ਅਤੇ ਉਸ ਦੀ ਮਾਂ ਨੂੰ ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਹਰਬੀਰ ਸਿੰਘ ਦਹੀਆ ਨੇ 10-10 ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ।
ਸਹਾਇਕ ਜ਼ਿਲ੍ਹਾ ਅਟਾਰਨੀ ਵਿਜੈ ਸਹਿਰਾਵਤ ਨੇ ਦੱਸਿਆ ਕਿ ਮੱਧ ਪ੍ਰਦੇਸ਼ ਦੇ ਗਵਾਲੀਆ ਦਾ ਜੋੜਾ ਆਪਣੀ 10 ਸਾਲਾ ਧੀ ਨਾਲ ਹਨੂਮਾਨ ਕਾਲੋਨੀ 'ਚ ਇੱਕ ਔਰਤ ਦੇ ਮਕਾਨ 'ਚ ਕਿਰਾਏ 'ਤੇ ਰਹਿੰਦਾ ਸੀ। ਦਸੰਬਰ 2016 'ਚ ਗਵਾਲੀਅਰ ਦੀ ਔਰਤ ਨੇ ਦੂਸਰਾ ਵਿਆਹ ਕਰ ਲਿਆ। ਬਾਅਦ 'ਚ ਪੁਰਸ਼ ਵੀ ਦੂਸਰਾ ਵਿਆਹ ਕਰ ਲਿਆ ਅਤੇ ਦੋਵੇਂ 10 ਸਾਲਾ ਧੀ ਨੂੰ ਮਕਾਨ ਮਾਲਕਨ ਕੋਲ ਛੱਡ ਗਏ।
ਮਾਰਚ 2017 'ਚ ਔਰਤ ਦੇ ਪੁੱਤਰ ਨੇ ਬੱਚੀ ਨਾਲ ਜਬਰ ਜਨਾਹ ਕੀਤਾ। ਮਾਂ ਨੇ ਉਸ ਦੀ ਕਰਤੂਤ ਲੁਕਾਉਣ ਲਈ ਬੱਚੀ ਨੂੰ ਕੁੱਟਿਆ ਤੇ ਹੈਵਾਨੀਅਤ ਦੀ ਹੱਦ ਪਾਰ ਕਰਦੇ ਹੋਏ ਗਰਮ ਚਿਮਟਾ ਪ੍ਰਾਈਵੇਟ ਪਾਰਟ 'ਤੇ ਲਗਾ ਦਿੱਤਾ ਸੀ। ਇਸ ਤੋਂ ਬਾਅਦ ਬੱਚੀ ਘਰੋਂ ਭੱਜ ਗਈ ਅਤੇ ਸਮਾਲਖਾ 'ਚ ਪੁਰਾਣੇ ਬੱਸ ਅੱਡੇ ਤੋਂ ਪੁਲਿਸ ਹੱਥ ਲੱਗ ਗਈ। ਬਾਲ ਕਲਿਆਣ ਕਮੇਟੀ ਨੇ ਉਸ ਦਾ ਇਲਾਜ ਮੈਡੀਕਲ ਕਾਲਜ ਖਾਨਪੁਰ ਤੋਂ ਕਰਵਾਇਆ ਸੀ।
ਸ਼ੁੱਕਰਵਾਰ ਨੂੰ ਕੋਰਟ ਨੇ ਦੋਸ਼ੀ ਮਾਂ-ਪੁੱਤਰ ਨੂੰ 10-10 ਸਾਲ ਕੈਦ ਤੇ 21 ਹਜ਼ਾਰ ਰੁਪਏ ਜੁਰਮਾਨੇ ਦੀ ਸਜ਼ਾ ਸੁਣਾਈ। ਅਦਾਲਤ ਨੇ ਪੀੜਤਾ ਨੂੰ ਸੱਤ ਲੱਖ ਰੁਪਏ ਹਰਜਾਨੇ ਵਜੋਂ ਦੇਣ ਲਈ ਫਾਈਲ ਜ਼ਿਲ੍ਹਾ ਕਾਨੂੰਨੀ ਸੇਵਾਵਾਂ ਅਥਾਰਟੀ ਦਫ਼ਤਰ ਭੇਜੀ ਹੈ।