ਲਖਨਊ- ਲਖਨਊ ਵਿੱਚ ਕਰਵਾਏ ਗਏ ਸਾਹਿਤ ਮਹਾਂਉਤਸਵ ‘ਚ ਜਵਾਹਰ ਲਾਲ ਨਹਿਰੂ ਯੂਨੀਵਰਸਿਟੀ ਦੇ ਵਿਦਿਆਰਥੀ ਆਗੂ ਕਨ੍ਹਈਆ ਕੁਮਾਰ ਨਾਲ ਦੁਰ ਵਿਹਾਰ ਪਿੱਛੋਂ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਸਮਾਗਮ ਰੱਦ ਕਰ ਦਿੱਤਾ। ਪ੍ਰਸ਼ਾਸਨ ਨੇ ਕਿਹਾ ਕਿ ਆਯੋਜਕਾਂ ਨੇ ਪੁਸਤਕ ਮੇਲੇ ਦੀ ਇਜਾਜ਼ਤ ਲਈ ਸੀ, ਕਿਸੇ ‘ਗੋਸ਼ਟੀ ਜਾਂ ਫੈਸਟੀਵਲ’ ਦੀ ਨਹੀਂ ਸੀ ਲਈ। ਰਾਜਧਾਨੀ ਦੇ ਸ਼ੀਰੋਜ਼ ਹੈਂਗਆਊਟ ‘ਚ ਕੱਲ੍ਹ ਰਾਤ ਤੋਂ ਤਿੰਨ ਦਿਨਾਂ ਤੱਕ ਚੱਲਣ ਵਾਲੇ ਸਾਹਿਤ ਮਹਾਂਉਤਸਵ ਨੂੰ ਭਾਰੀ ਹੰਗਾਮੇ ਮਗਰੋਂ ਇੱਕ ਦਿਨ ਪਹਿਲਾਂ ਹੀ ਰੱਦ ਕਰ ਦਿੱਤਾ ਗਿਆ। ਇਸ ਪ੍ਰੋਗਰਾਮ ਵਿੱਚ ਕਨ੍ਹਈਆ ਕੁਮਾਰ ਅਤੇ ਫਿਲਮ ਅਦਾਕਾਰ ਸ਼ਤਰੂਘਨ ਸਿਨਹਾ ਨੇ ਹਿੱਸਾ ਲਿਆ ਸੀ।
ਲਖਨਊ ਸਾਹਿਤ ਮਹਾਂਉਤਸਵ ਦੇ ਮੋਢੀ ਆਰਗੇਨਾਈਜ਼ਰ ਸ਼ਮੀਮ ਆਰਜ਼ੂ ਨੇ ਕਿਹਾ ਕਿ ਕੱਲ੍ਹ ਰਾਤ ਪਹਿਲਾ ਸੈਸ਼ਨ ਫਿਲਮ ਅਦਾਕਾਰਾ ਦਿਵਿਆ ਦੱਤਾ ਦਾ ਸੀ, ਜਿਸ ‘ਚ ਉਨ੍ਹਾਂ ਆਪਣੀ ਕਿਤਾਬ ਬਾਰੇ ਚਰਚਾ ਕੀਤੀ। ਇਸ ਤੋਂ ਬਾਅਦ ਨਹਿਰੂ ਯੂਨੀਵਰਸਿਟੀ ਦੇ ਕਨ੍ਹਈਆ ਕੁਮਾਰ ਆਪਣੀ ਪੁਸਤਕ ਦੀ ਚਰਚਾ ਲਈ ਮੰਚ ਉੱਤੇ ਆਏ ਤਾਂ ਕਿਸੇ ਜਥੇਬੰਦੀ ਨਾਲ ਜੁੜੇ ਕਈ ਲੋਕ ਉਥੇ ਆ ਕੇ ਹੰਗਾਮਾ ਅਤੇ ਭੰਨਤੋੜ ਕਰਨ ਲੱਗੇ। ਪੁਲਸ ਨੇ ਆ ਕੇ ਮਾਹੌਲ ਸ਼ਾਂਤ ਕਰਾਇਆ, ਜਿਸ ਤੋਂ ਬਾਅਦ ਫਿਲਮ ਅਦਾਕਾਰ ਸ਼ਤਰੂਘਨ ਸਿਨਹਾ ਦੀ ਪੁਸਤਕ ਬਾਰੇ ਚਰਚਾ ਹੋਈ। ਆਰਜ਼ੂ ਨੇ ਕਿਹਾ ਕਿ ਏ ਆਈ ਐੱਮ ਆਈ ਐੱਮ ਦੇ ਪਾਰਲੀਮੈਂਟ ਮੈਂਬਰ ਅਸਾਸੂਦੀਨ ਓਵੈਸੀ ਦਾ ਪ੍ਰੋਗਰਾਮ ਹੋਣ ਵਾਲਾ ਸੀ, ਪਰ ਹੁਣ ਇਹ ਨਹੀਂ ਹੋਵੇਗਾ। ਇਸ ਪ੍ਰੋਗਰਾਮ ਨੂੰ ਫੇਸਬੁਕ ਲਾਈਵ ਕੀਤਾ ਜਾਵੇਗਾ।
ਇਸ ਮੁੱਦੇ ਉੱਤੇ ਲਖਨਊ ਦੇ ਜ਼ਿਲ੍ਹਾ ਅਧਿਕਾਰੀ ਕੌਸ਼ਲ ਰਾਜ ਸ਼ਰਮਾ ਨੇ ਕਿਹਾ ਕਿ ਨਿਯਮਾਂ ਦੀ ਉਲੰਘਣਾ ਹੋਈ ਹੈ, ਜਿਸ ਕਰ ਕੇ ਪ੍ਰੋਗਰਾਮ ਲਈ ਦਿੱਤੀ ਇਜਾਜ਼ਤ ਰੱਦ ਕੀਤੀ ਗਈ ਹੈ, ਜਦ ਕਿ ਸਾਹਿਤ ਮਹਾਂਉਤਸਵ ਦੇ ਆਰਗੇਨਾਈਜ਼ਰ ਸ਼ਮੀਮ ਨੇ ਕਿਹਾ ਕਿ ਉਨ੍ਹਾਂ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਪ੍ਰੋਗਰਾਮ ਦੀ ਜਾਣਕਾਰੀ ਦਿੱਤੀ ਸੀ। ਕਨ੍ਹਈਆ ਕੁਮਾਰ ਦੇ ਆਉਣ ਬਾਰੇ ਗੱਲ ਕਈ ਦਿਨਾਂ ਤੋਂ ਅਖਬਾਰਾਂ ਵਿੱਚ ਛਪ ਰਹੀ ਹੈ, ਪਰ ਪ੍ਰਸ਼ਾਸਨ ਨੇ ਇਸ ਦਾ ਕੋਈ ਨੋਟਿਸ ਨਹੀਂ ਲਿਆ।