ਪੰਜਾਬੀਆਂ ਨੇ ਫੜੀ ਕੇਰਲਾ ਵਾਸੀਆਂ ਦੀ ਬਾਂਹ

ਜਲੰਧਰ: ਹੜ੍ਹ ਕਾਰਨ ਪ੍ਰੇਸ਼ਾਨ ਚੱਲ ਰਹੇ ਕੇਰਲ ਸੂਬੇ ਦੀ ਮਦਦ ਲਈ ਹੱਥ ਵਧਾਉਂਦੇ ਹੋਏ ਅੱਜ ਜਲੰਧਰ ਤੋਂ ਇੱਕ ਲੱਖ ਖਾਣੇ ਦੇ ਤਿਆਰ ਪੈਕਟ ਭੇਜੇ ਗਏ। ਸੂਬਾ ਸਰਕਾਰ ਵੱਲੋਂ 10 ਕਰੋੜ ਦੀ ਮਦਦ ਦੇ ਮੱਦੇਨਜ਼ਰ ਜਲੰਧਰ ਤੋਂ 1000 ਕੁਇੰਟਲ ਦੇ ਪੈਕੇਟ ਭੇਜੇ ਗਏ।   ਇਸ ਮੌਕੇ ਜਲੰਧਰ ਸੀਟ ਤੋਂ ਐਮਪੀ ਚੌਧਰੀ ਸੰਤੋਖ ਸਿੰਘ ਨੇ ਹਰੀ ਝੰਡੀ ਵਿਖਾ ਕੇ ਸਾਮਾਨ ਨਾਲ ਭਰੇ ਟਰੱਕ ਆਦਮਪੁਰ ਏਅਰਪੋਰਟ ਲਈ ਰਵਾਨਾ ਕੀਤੇ। ਇੱਥੋਂ ਏਅਰ ਫੋਰਸ ਦੇ ਜਹਾਜ਼ ਰਾਹੀਂ ਸਾਮਾਨ ਨੂੰ ਕੇਰਲ ਪਹੁੰਚਾਇਆ ਜਾਵੇਗਾ। ਚੌਧਰੀ ਸੰਤੋਖ ਨੇ ਕਿਹਾ ਕਿ ਸਰਕਾਰ ਦੇ ਨਾਲ-ਨਾਲ ਸਮਾਜਿਕ ਜਥੇਬੰਦੀਆਂ ਵੀ ਕੇਰਲ ਦੇ ਲੋਕਾਂ ਦੀ ਮਦਦ ਕਰਨਾ ਚਾਹੁੰਦੀਆਂ ਹਨ। ਕੋਸ਼ਿਸ਼ ਹੈ ਕਿ ਸਾਰਾ ਸਾਮਾਨ ਜਲਦ ਤੋਂ ਜਲਦ ਇਕੱਠਾ ਕਰਕੇ ਕੇਰਲ ਪਹੁੰਚਾਇਆ ਜਾਵੇ। ਡਿਪਟੀ ਕਮਿਸ਼ਨਰ ਵਰਿੰਦਰ ਸ਼ਰਮਾ ਨੇ ਦੱਸਿਆ ਕਿ 500 ਕੁਇੰਟਲ ਸਾਮਾਨ ਹੁਣ ਏਅਰਫੋਰਸ ਦੇ ਜਹਾਜ਼ਾਂ ਰਾਹੀਂ ਭੇਜਿਆ ਜਾ ਰਿਹਾ ਹੈ ਤੇ 500 ਕੁਇੰਟਲ ਸ਼ਾਮ ਨੂੰ ਭੇਜਿਆ ਜਾਵੇਗਾ ਤਾਂ ਜੋ ਉਸ ਨੇ ਕੱਲ੍ਹ ਸਵੇਰੇ ਵੰਡਿਆ ਜਾ ਸਕੇ।