ਡਿਊਟੀ 'ਤੇ ਹੋਈ ਤਕਰਾਰ ਨੇ ਧਾਰਿਆ ਖ਼ੂਨੀ ਰੂਪ, ਬਿਜਲੀ ਮੁਲਾਜ਼ਮ ਨੇ ਮਾਰੀ ਸਾਥੀ ਨੂੰ ਗੋਲ਼ੀ

ਪਿੰਡ ਖੰਡੇਬਾਦ ਵਿੱਚ ਦੋ ਬਿਜਲੀ ਮੁਲਾਜ਼ਮਾਂ ਦੀ ਤਕਰਾਰਬਾਜ਼ੀ ਇੰਨੀ ਵੱਧ ਗਈ ਇੱਕ ਮੁਲਾਜ਼ਮ ਨੇ ਸਾਥੀ ਨੂੰ ਗੋਲ਼ੀ ਮਾਰ ਦਿੱਤੀ। ਮ੍ਰਿਤਕ ਦੀ ਪਛਾਣ ਗੁਰਮੀਤ ਸਿੰਘ ਵਜੋਂ ਹੋਈ ਹੈ।

ਸੰਗਰੂਰ: ਜ਼ਿਲ੍ਹੇ ਦੇ ਹਲਕੇ ਲਹਿਰਾਗਾਗਾ ਨੇੜਲੇ ਪਿੰਡ ਖੰਡੇਬਾਦ ਵਿੱਚ ਦੋ ਬਿਜਲੀ ਮੁਲਾਜ਼ਮਾਂ ਦੀ ਤਕਰਾਰਬਾਜ਼ੀ ਇੰਨੀ ਵੱਧ ਗਈ ਇੱਕ ਮੁਲਾਜ਼ਮ ਨੇ ਸਾਥੀ ਨੂੰ ਗੋਲ਼ੀਆਂ ਮਾਰ ਦਿੱਤੀ। ਮ੍ਰਿਤਕ ਦੀ ਪਛਾਣ ਗੁਰਮੀਤ ਸਿੰਘ ਵਜੋਂ ਹੋਈ ਹੈ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਗੁਰਮੀਤ ਸਿੰਘ ਪਿੰਡ ਖੰਡੇਬਾਦ ਦੇ ਬਿਜਲੀ ਘਰ ਵਿੱਚ ਡਿਊਟੀ ਕਰ ਰਿਹਾ ਸੀ। ਸਵੇਰੇ ਅੱਠ ਵਜੇ ਉਸ ਦੀ ਡਿਊਟੀ ਖ਼ਤਮ ਹੋਣੀ ਸੀ ਅਤੇ ਪ੍ਰਦੀਪ ਸਿੰਘ ਨੇ ਉਸ ਨੂੰ ਰਿਲੀਵ ਕਰਨਾ ਸੀ। ਮ੍ਰਿਤਕ ਦੇ ਵਾਰਸਾਂ ਨੇ ਦੱਸਿਆ ਕਿ ਪ੍ਰਦੀਪ ਸਿੰਘ ਸਵੇਰੇ 11 ਵਜੇ ਪਹੁੰਚਿਆ ਤੇ ਗੁਰਮੀਤ ਨੇ ਦੂਹਰੀ ਡਿਊਟੀ ਸ਼ੁਰੂ ਕਰ ਦਿੱਤੀ। ਪ੍ਰਦੀਪ ਨੇ ਰਜਿਸਟਰ ਤੋਂ ਗੁਰਮੀਤ ਦਾ ਨਾਂਅ ਕੱਟ ਕੇ ਆਪਣਾ ਨਾਂਅ ਲਿਖ ਦਿੱਤਾ। ਇਸੇ ਗੱਲ 'ਤੇ ਦੋਵਾਂ ਵਿਚਕਾਰ ਤਕਰਾਰਬਾਜ਼ੀ ਹੋ ਗਈ ਅਤੇ ਪ੍ਰਦੀਪ ਨੇ ਗੁਰਮੀਤ 'ਤੇ ਗੋਲ਼ੀ ਚਲਾ ਦਿੱਤੀ। ਮੁਲਜ਼ਮ ਨੂੰ ਇੰਨਾ ਗੁੱਸਾ ਚੜ੍ਹਿਆ ਕਿ ਉਸ ਨੇ ਇੱਕ ਤੋਂ ਬਾਅਦ ਇੱਕ ਪੰਜ ਗੋਲ਼ੀਆਂ ਦਾਗ਼ ਦਿੱਤੀਆਂ, ਜਿਸ ਕਾਰਨ ਉਸ ਦੀ ਮੌਕੇ 'ਤੇ ਮੌਤ ਹੋ ਗਈ। ਗੁਰਮੀਤ ਨੂੰ ਨੇੜਲੇ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਿਸ ਨੇ ਮੁਲਜ਼ਮ ਪ੍ਰਦੀਪ ਖ਼ਿਲਾਫ਼ ਕਤਲ ਦਾ ਕੇਸ ਦਰਜ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।