ਪੰਜਾਬ 'ਚ ਹਿੰਸਕ ਵਾਰਦਾਤਾਂ ਦੇ ਕੈਨੇਡਾ ਨਾਲ ਜੁੜੇ ਤਾਰ, ਖਾਲਿਸਤਾਨੀਆਂ ਦੇ ਇਸ਼ਾਰੇ 'ਤੇ ਹੋਏ ਹਮਲੇ

ਪੰਜਾਬ ਦੇ ਡੀਜੀਪੀ ਦਿਨਕਰ ਗੁਪਤਾ ਨੇ ਦਾਅਵਾ ਕੀਤਾ ਹੈ ਕਿ ਇਸ ਵਾਰਦਾਤ ਨੂੰ ਕੈਨੇਡਾ ’ਚ ਬੈਠੇ KTF ਦੇ ਮੁਖੀ ਹਰਦੀਪ ਸਿੰਘ ਨਿੱਝਰ ਦੇ ਆਖਣ ’ਤੇ ਅੰਜਾਮ ਦਿੱਤਾ ਗਿਆ ਸੀ। ਇਸ ਵਾਰਦਾਤ ਪਿੱਛੇ ਮਨਸ਼ਾ ਸਿਰਫ਼ ਪੰਜਾਬ ਦਾ ਮਾਹੌਲ ਖ਼ਰਾਬ ਕਰਨ ਦੀ ਹੀ ਸੀ।

ਚੰਡੀਗੜ੍ਹ: ਪੰਜਾਬ ਵਿੱਚ ਕੁਝ ਹਿੰਸਕ ਵਾਰਦਾਤਾਂ ਦੇ ਤਾਰ ਕੈਨੇਡਾ ਨਾਲ ਜੁੜੇ ਹਨ। ਇਸ ਤੋਂ ਵੱਡੀ ਗੱਲ ਹੈ ਕਿ ਇਨ੍ਹਾਂ ਵਾਰਦਾਤਾਂ ਪਿੱਛੇ ਖਾਲਿਸਤਾਨ ਪੱਖੀਆਂ ਦਾ ਹੱਥ ਦੱਸਿਆ ਜਾ ਰਿਹਾ ਹੈ। ਜਲੰਧਰ ਦੇ ਫਿਲੌਰ ’ਚ ਪੁਜਾਰੀ ਸੰਤ ਗਿਆਨ ਮੁਨੀ ਉਰਫ਼ ਕਮਲਦੀਪ ਸ਼ਰਮਾ ਉੱਤੇ ਗੋਲੀਬਾਰੀ ਦੇ ਤਾਰ ਵੀ ਇਸ ਨਾਲ ਜੁੜੇ ਹਨ। ਪੰਜਾਬ ਪੁਲਿਸ ਨੇ ਵੱਡਾ ਇੰਕਸ਼ਾਫ਼ ਕੀਤਾ ਹੈ ਕਿ ਗਿਆਨ ਮੁਨੀ ਤੇ ਉਨ੍ਹਾਂ ਦੀ ਸੇਵਿਕਾ ਸਿਮਰਨ ਨੂੰ ‘ਖ਼ਾਲਿਸਤਾਨ ਟਾਈਗਰ ਫ਼ੋਰਸ’ (KTF) ਦੇ ਕਾਰਕੁਨਾਂ ਨੇ ਗੋਲੀ ਮਾਰੀ ਸੀ। ਉਹ ਪੁਜਾਰੀ ਦੇ ਕਤਲ ਦੇ ਇਰਾਦੇ ਨਾਲ ਆਏ ਸਨ ਪਰ ਕਾਮਯਾਬ ਨਹੀਂ ਹੋ ਸਕੇ।

ਪੰਜਾਬ ਦੇ ਡੀਜੀਪੀ ਦਿਨਕਰ ਗੁਪਤਾ ਨੇ ਦਾਅਵਾ ਕੀਤਾ ਹੈ ਕਿ ਇਸ ਵਾਰਦਾਤ ਨੂੰ ਕੈਨੇਡਾ ’ਚ ਬੈਠੇ KTF ਦੇ ਮੁਖੀ ਹਰਦੀਪ ਸਿੰਘ ਨਿੱਝਰ ਦੇ ਆਖਣ ’ਤੇ ਅੰਜਾਮ ਦਿੱਤਾ ਗਿਆ ਸੀ। ਇਸ ਵਾਰਦਾਤ ਪਿੱਛੇ ਮਨਸ਼ਾ ਸਿਰਫ਼ ਪੰਜਾਬ ਦਾ ਮਾਹੌਲ ਖ਼ਰਾਬ ਕਰਨ ਦੀ ਹੀ ਸੀ।

ਡੀਜੀਪੀ ਨੇ ਦੱਸਿਆ ਕਿ ਫੜੇ ਗਏ ਖ਼ਾਲਿਸਤਾਨੀ ਕਾਰਕੁਨਾਂ ’ਚ ਲਵਪ੍ਰੀਤ ਸਿੰਘ ਉਰਫ਼ ਰਵੀ ਤੇ ਰਾਮ ਸਿੰਘ ਉਰਫ਼ ਸੋਨੂੰ ਸ਼ਾਮਲ ਹਨ। ਇਨ੍ਹਾਂ ਨੂੰ ਮੋਗਾ ਪੁਲਿਸ ਨੇ ਰੇਲਵੇ ਕ੍ਰਾਸਿੰਗ ਮਹਿਣਾ ਲਾਗਲੇ ਸੀਨੀਅਰ ਸੈਕੰਡਰੀ ਸਕੂਲ ਨੇੜਿਓਂ ਗ੍ਰਿਫ਼ਤਾਰ ਕੀਤਾ ਸੀ। ਇਹ ਦੋਵੇਂ ਡੇਰਾ ਸੱਚਾ ਸੌਦਾ ਦੇ ਸ਼ਰਧਾਲੂ ਨੂੰ ਮਾਰਨ ਦੇ ਚੱਕਰਾਂ ’ਚ ਸਨ; ਤਾਂ ਜੋ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਦਾ ਬਦਲਾ ਲਿਆ ਜਾ ਸਕੇ।

ਇਨ੍ਹਾਂ ਦੋਵਾਂ ਕੋਲੋਂ ਪੁਲਿਸ ਨੇ 0.32 ਬੋਰ ਦੇ 3 ਪਿਸਤੌਲ ਤੇ 38 ਅਣਚੱਲੇ ਕਾਰਤੂਸ ਤੇ 0.315 ਬੋਰ ਦਾ ਇੱਕ ਪਿਸਤੌਲ ਤੇ 10 ਅਣਚੱਲੇ ਕਾਰਤੂਸ ਬਰਾਮਦ ਕੀਤੇ ਹਨ। ਪੁਲਿਸ ਅਨੁਸਾਰ ਲਵਪ੍ਰੀਤ ਰਵੀ ਤੇ ਰਾਮ ਸਿੰਘ ਸੋਨੂੰ ਨਾਲ ਅਰਸ਼ਦੀਪ, ਰਮਨਦੀਪ ਤੇ ਚਰਨਜੀਤ ਉਰਫ਼ ਰਿੰਕੂ ਅਤੇ ਕਮਲਜੀਤ ਸ਼ਰਮਾ ਵੀ ਸ਼ਾਮਲ ਹਨ। ਦੋ ਜਣਿਆਂ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਹੁਣ ਕਮਲਜੀਤ ਦੀ ਭਾਲ ਕੀਤੀ ਜਾ ਰਹੀ ਹੈ। ਬਾਕੀ ਦੇ ਤਿੰਨੋਂ ਕੈਨੇਡਾ ’ਚ ਹੀ ਹਨ। ਇਨ੍ਹਾਂ ਸਭਨਾਂ ਵਿਰੁੱਧ ‘ਰੈੱਡ ਕੌਰਨਰ ਨੋਟਿਸ’ ਜਾਰੀ ਕੀਤਾ ਜਾ ਰਿਹਾ ਹੈ।

ਮੋਗਾ ਦੇ ਐਸਐਸਪੀ ਹਰਮਨਬੀਰ ਸਿੰਘ ਗਿੱਲ ਅਨੁਸਾਰ ਲਵਪ੍ਰੀਤ ਰਵੀ ਤੇ ਕਮਲਜੀਤ ਕੈਨੇਡਾ ’ਚ ਰਹਿੰਦੇ ਅਰਸ਼ਦੀਪ ਨੂੰ ਬਚਪਨ ਤੋਂ ਜਾਣਦੇ ਸਨ ਕਿਉਂਇਕ ਇਹ ਤਿੰਨੇ ਇੱਕੋ ਪਿੰਡ ਦੇ ਹਨ। ਘੱਲ ਖੁਰਦ ਦਾ ਰਾਮ ਸਿੰਘ ਸੋਨੂੰ ITI ਮੋਗਾ ’ਚ ਪੜ੍ਹਦਾ ਸੀ ਤੇ ਕਮਲ ਨਾਲ ਉਸ ਦੀ ਕਾਲਜ ਵੇਲੇ ਤੋਂ ਜਾਣ-ਪਛਾਣ ਸੀ। ਅਰਸ਼ਦੀਪ ਉਨ੍ਹਾਂ ਨੂੰ ਵੈਸਟਰਨ ਯੂਨੀਅਨ ਮਨੀ ਟ੍ਰਾਂਸਫ਼ਰ ਰਾਹੀਂ ਰੁਪਏ ਭੇਜਦਾ ਸੀ ਤੇ ਉਹ ਅੱਗੇ ਵਧ ਕੇ ਵਾਰਦਾਤ ਨੂੰ ਅੰਜਾਮ ਦਿੰਦੇ ਸਨ।

ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਉਨ੍ਹਾਂ ਦੇ ਭਾਰਤ ਦੌਰੇ ਦੌਰਾਨ ਪੰਜਾਬ ਵਿੱਚ ਖ਼ਾਲਿਸਤਾਨੀ ਗਤੀਵਿਧੀਆਂ ਨੂੰ ਅੰਜਾਮ ਦੇਣ ਦੇ ਦੋਸ਼ ਹੇਠ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਜਿਹੜੀ ਲਿਸਟ ਸੌਂਪੀ ਸੀ, ਉਸ ਵਿੱਚ ਹਰਦੀਪ ਨਿੱਝਰ ਦਾ ਵੀ ਨਾਂ ਸੀ।