ਹਰਸਿਮਰਤ ਨੂੰ ਆਉਂਦੀ ਗਰੀਬਾਂ 'ਚੋਂ ਬਦਬੋ: ਰੰਧਾਵਾ

ਰੰਧਾਵਾ ਨੇ ਕਿਹਾ ਕਿ ਗਿੱਦੜਬਾਹਾ ਹਲਕਾ ਹਮੇਸ਼ਾ ਅਕਾਲੀ ਦਲ ਦਾ ਗੜ੍ਹ ਮੰਨਿਆ ਜਾਂਦਾ ਰਿਹਾ ਸੀ ਪਰ ਰਾਜਾ ਵੜਿੰਗ ਨੇ ਉੱਥੋਂ ਜਿੱਤ ਕੇ ਇਹ ਰਵਾਇਤ ਤੋੜ ਦਿੱਤੀ, ਹੁਣ ਉਹ ਬਠਿੰਡਾ ਤੋਂ ਵੀ ਜਿੱਤ ਦਰਜ ਕਰ ਲੋਕ ਸਭਾ ਪਹੁੰਚਣਗੇ।

ਸ੍ਰੀ ਮੁਕਤਸਰ ਸਾਹਿਬ: ਪੰਜਾਬ ਦੇ ਕੈਬਨਿਟ ਮੰਤਰੀ ਸੁਖਜਿੰਦਰ ਰੰਧਾਵਾ ਨੇ ਕਿਹਾ ਹੈ ਕਿ ਹਰਸਿਮਰਤ ਬਾਦਲ ਨੂੰ ਗਰੀਬਾਂ 'ਚੋਂ ਬਦਬੋ ਆਉਂਦੀ ਹੈ ਇਸ ਲਈ ਗਰੀਬਾਂ ਨਾਲ ਰੋਟੀ ਖਾਣ ਨਹੀਂ ਜਾਂਦੀ। ਰੰਧਾਵਾ ਨੇ ਅਜਿਹਾ ਰਾਜਾ ਵੜਿੰਗ ਵੱਲੋਂ ਦਲਿਤ ਪਰਿਵਾਰ ਦੇ ਘਰ ਰੁਕਣ 'ਤੇ ਅਕਾਲੀ ਦਲ ਵੱਲੋਂ ਚੁੱਕੇ ਸਵਾਲਾਂ ਤੇ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਦੇ ਜਵਾਬ ਵਿੱਚ ਕਿਹਾ। ਰਾਜਾ ਵੜਿੰਗ ਵੱਲੋਂ ਅਜਿਹਾ ਕਰਨ ਤੋਂ ਬਾਅਦ ਚੋਣ ਕਮਿਸ਼ਨ ਨੇ ਵੀ ਸਖ਼ਤੀ ਦਿਖਾਈ ਹੈ ਤੇ ਉਨ੍ਹਾਂ ਨੂੰ ਨੋਟਿਸ ਜਾਰੀ ਕਰ ਦਿੱਤਾ ਹੈ। ਰੰਧਾਵਾ ਨੇ ਚੋਣ ਕਮਿਸ਼ਨ ਨੂੰ ਰਾਜਾ ਵੜਿੰਗ ਦੀ ਸ਼ਿਕਾਇਤ ਕਰਨਾ ਮੰਦਭਾਗਾ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਜੇਕਰ ਕੋਈ ਵੀ ਸਿਆਸੀ ਉਮੀਦਵਾਰ ਕਿਸੇ ਗਰੀਬ ਪਰਿਵਾਰ ਦੇ ਘਰ ਰੁਕੇ ਤਾਂ ਇਹ ਗਲਤ ਨਹੀਂ। ਉਨ੍ਹਾਂ ਕਿਹਾ ਕਿ ਬਾਦਲਾਂ ਵੱਲੋਂ ਰਾਜਾ ਵੜਿੰਗ ਦੀ ਸ਼ਿਕਾਇਤ ਸਾਬਤ ਕਰਦੀ ਹੈ ਕਿ ਉਹ ਨਿਰਾਸ਼ ਹਨ ਤੇ ਇਸੇ ਲਈ ਅਜਿਹੀਆਂ ਸ਼ਿਕਾਇਤਾਂ ਕਰ ਰਹੇ ਹਨ। ਰੰਧਾਵਾ ਨੇ ਕਿਹਾ ਕਿ ਗਿੱਦੜਬਾਹਾ ਹਲਕਾ ਹਮੇਸ਼ਾ ਅਕਾਲੀ ਦਲ ਦਾ ਗੜ੍ਹ ਮੰਨਿਆ ਜਾਂਦਾ ਰਿਹਾ ਸੀ ਪਰ ਰਾਜਾ ਵੜਿੰਗ ਨੇ ਉੱਥੋਂ ਜਿੱਤ ਕੇ ਇਹ ਰਵਾਇਤ ਤੋੜ ਦਿੱਤੀ, ਹੁਣ ਉਹ ਬਠਿੰਡਾ ਤੋਂ ਵੀ ਜਿੱਤ ਦਰਜ ਕਰ ਲੋਕ ਸਭਾ ਪਹੁੰਚਣਗੇ।