ਮਾਲ 'ਚ ਅੱਗ ਲੱਗਣ ਕਾਰਨ 37 ਲੋਕਾਂ ਦੀ ਮੌਤ

ਫਿਲੀਪੀਨ ਦੇ ਦੱਖਣ 'ਚ ਸ਼ਹਿਰ ਡੋਵਾਓ ਦੇ ਇੱਕ ਮਾਲ ਵਿਚ ਅੱਗ ਲੱਗਣ ਨਾਲ 37 ਲੋਕਾਂ ਦੇ ਮਾਰੇ ਜਾਣ ਦੀ ਖ਼ਬਰ ਆਈ ਹੈ। ਉੱਥੋਂ ਦੇ ਉਪ-ਮੇਅਰ ਨੇ ਇਹ ਜਾਣਕਾਰੀ ਦਿੱਤੀ ਹੈ। ਉਪ ਮੇਅਰ ਪਾਅੋਲੋ ਡੂਅਰਟ ਨੇ ਫੇਸਬੁੱਕ ਪੋਸਟ ਵਿੱਚ ਕਿਹਾ ਕਿ ਅੱਗ ਸੁਰੱਖਿਆ ਬਿਊਰੋ ਦੇ ਕਮਾਂਡਰ ਨੇ ਹਾਦਸੇ ਵਾਲੀ ਜਗ੍ਹਾ ‘ਤੇ ਕਿਹਾ ਸੀ ਕਿ 37 ਲੋਕਾਂ ਦੇ ਬਚਣ ਦੀ ਉਮੀਦ ਬਿਲਕੁਲ ਨਹੀਂ ਹੈ। ਪਾਅੋਲੋ ਡੂਅਰਟ ਰਾਸ਼ਟਰਪਤੀ ਰੋਡਰੀਗੋ ਡੂਅਰਟ ਦੇ ਪੁੱਤਰ ਹਨ। ਇੱਕ ਪੁਲਿਸ ਅਧਿਕਾਰੀ ਰਾਲਫ ਕੈਨੋਥ ਨੇ ਏ.ਐੱਫ.ਪੀ. ਨੂੰ ਦੱਸਿਆ ਕਿ ਚਾਰ ਮੰਜ਼ਿਲਾ ‘ਐੱਨ.ਸੀ.ਸੀ.ਸੀ. ਮਾਲ’ ਵਿੱਚ ਕੱਲ੍ਹ ਸਵੇਰੇ ਅੱਗ ਲੱਗ ਕਾਰਨ ਮਾਲ ਅੰਦਰ ਕਾਫੀ ਲੋਕ ਫਸ ਗਏ ਸਨ। ਇਸ ਦੀ ਚੌਥੀ ਮੰਜ਼ਿਲ ਵਿਚ ਇੱਕ ਕਾਲ ਸੈਂਟਰ ਵੀ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਅੱਗ ਸਭ ਤੋਂ ਪਹਿਲਾਂ ਤੀਜੀ ਮੰਜਿਲ 'ਤੇ ਐਤਵਾਰ ਸਵੇਰੇ ਵੀ ਲੱਗੀ ਸੀ, ਜਿੱਥੇ ਕੱਪੜੇ, ਲੱਕੜ ਦਾ ਫਰਨੀਚਰ ਅਤੇ ਪਲਾਸਟਿਕ ਦੇ ਬਰਤਨ ਆਦਿ ਦਾ ਸਮਾਨ ਸੀ। ਇਸ ਕਾਰਨ ਅੱਗ ਤੁਰੰਤ ਫੈਲ ਗਈ ਅਤੇ ਉਸ ‘ਤੇ ਕਾਬੂ ਪਾਉਣ ਵਿਚ ਕਾਫੀ ਸਮਾਂ ਲੱਗ ਰਿਹਾ ਹੈ। ਅੱਗ ਬੁਝਾਊ ਵਿਭਾਗ ਦੇ ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਮਰਨ ਵਾਲਿਆਂ ਵਿੱਚ ਜ਼ਿਆਦਾਤਰ ਕਾਲ ਸੈਂਟਰ ਦੇ ਮੁਲਾਜ਼ਮ ਹਨ। ਰਾਸ਼ਟਰਪਤੀ ਰੋਡਰੀਗੋ ਡੂਅਰਟ ਨੇ ਕੱਲ੍ਹ ਰਾਤ ਆਪਣੇ ਇੱਕ ਸਹਿਯੋਗੀ ਨਾਲ ਮਾਲ ਦਾ ਦੌਰਾ ਕੀਤਾ ਅਤੇ ਪੀੜਤਾਂ ਦੇ ਰਿਸ਼ਤੇਦਾਰਾਂ ਪ੍ਰਤੀ ਸੰਵੇਦਨਾ ਜ਼ਾਹਰ ਕੀਤੀ।