Hezbollah Leader Hassan Nasrallah Death:ਅੱਤਵਾਦੀ ਸੰਗਠਨ ਹਿਜ਼ਬੁੱਲਾ ਨੇ ਆਪਣੇ ਮੁਖੀ ਹਸਨ ਨਸਰੱਲਾ ਦੀ ਮੌਤ ਦੀ ਪੁਸ਼ਟੀ ਕੀਤੀ ਹੈ। ਇਸ ਤੋਂ ਪਹਿਲਾਂ ਇਜ਼ਰਾਇਲੀ ਫੌਜ ਨੇ ਦਾਅਵਾ ਕੀਤਾ ਸੀ ਕਿ ਨਸਰੱਲਾ ਸ਼ੁੱਕਰਵਾਰ ਨੂੰ ਹਵਾਈ ਹਮਲੇ 'ਚ ਮਾਰਿਆ ਗਿਆ ਸੀ। IDF ਨੇ ਇਸ ਸਬੰਧ ਵਿੱਚ ਆਪਣੀ ਅਧਿਕਾਰਤ ਸੋਸ਼ਲ ਮੀਡੀਆ ਸਾਈਟ X 'ਤੇ ਇੱਕ ਪੋਸਟ ਸ਼ੇਅਰ ਕਰਦੇ ਹੋਏ ਕਿਹਾ, "ਹਸਨ ਨਸਰੱਲਾ ਹੁਣ ਦੁਨੀਆ ਨੂੰ ਦਹਿਸ਼ਤਜ਼ਦਾ ਨਹੀਂ ਕਰ ਸਕੇਗਾ।"
ਹਸਨ ਨਸਰੱਲਾ ਦੀ ਅਗਵਾਈ ਹੇਠ ਹਿਜ਼ਬੁੱਲਾ ਨੇ ਆਪਣੀ ਫ਼ੌਜੀ ਤੇ ਸਿਆਸੀ ਸਥਿਤੀ ਮਜ਼ਬੂਤ ਕਰ ਲਈ ਹੈ। ਨਸਰੱਲਾ ਦੀ ਮੌਤ ਦੀ ਸੂਰਤ ਵਿੱਚ ਸੰਗਠਨ ਦੀ ਰਣਨੀਤੀ ਅਤੇ ਗਤੀਵਿਧੀਆਂ 'ਤੇ ਵੱਡਾ ਅਸਰ ਪੈ ਸਕਦਾ ਹੈ।
ਕੌਣ ਸੀ ਹਸਨ ਨਸਰੱਲਾ ?
ਹਸਨ ਨਸਰੱਲਾ ਨੇ ਹਿਜ਼ਬੁੱਲਾ ਨੂੰ ਇੱਕ ਰਾਜਨੀਤਿਕ ਅਤੇ ਫ਼ੌਜੀ ਸੰਗਠਨ ਦੇ ਰੂਪ ਵਿੱਚ ਸਥਾਪਿਤ ਕੀਤਾ, ਜਿਸ ਨੇ ਲੇਬਨਾਨ ਦੇ ਰਾਜਨੀਤਿਕ ਦ੍ਰਿਸ਼ ਵਿੱਚ ਮਹੱਤਵਪੂਰਣ ਭੂਮਿਕਾ ਨਿਭਾਈ। 15 ਸਾਲ ਦੀ ਉਮਰ ਵਿੱਚ ਨਸਰੱਲਾ ਨੇ ਲੇਬਨਾਨ ਵਿੱਚ ਅਮਲ ਅੰਦੋਲਨ ਦਾ ਮੈਂਬਰ ਬਣਨ ਦਾ ਫੈਸਲਾ ਕੀਤਾ। 16 ਸਾਲ ਦੀ ਉਮਰ ਵਿੱਚ ਉਹ ਇਰਾਕ ਪਹੁੰਚਿਆ ਅਤੇ ਦੋ ਸਾਲ ਉੱਥੇ ਰਿਹਾ।
ਸਿਰਫ 22 ਸਾਲ ਦੀ ਉਮਰ ਵਿੱਚ ਨਸਰੱਲਾ ਨੇ ਹਿਜ਼ਬੁੱਲਾ ਵਿੱਚ ਸ਼ਾਮਲ ਹੋ ਕੇ ਸੰਗਠਨ ਪ੍ਰਤੀ ਆਪਣੀ ਪ੍ਰਤੀਬੱਧਤਾ ਦਿਖਾਈ। 1992 ਵਿੱਚ ਅੱਬਾਸ ਮੌਸਾਵੀ ਦੀ ਹੱਤਿਆ ਤੋਂ ਬਾਅਦ ਨਸਰੱਲਾ ਨੂੰ ਹਿਜ਼ਬੁੱਲਾ ਦਾ ਮੁਖੀ ਬਣਾਇਆ ਗਿਆ ਸੀ। ਨਸਰੱਲਾ ਨੇ ਹਿਜ਼ਬੁੱਲਾ ਦੇ ਸਿਆਸੀ ਅਤੇ ਫ਼ੌਜੀ ਵਿੰਗਾਂ ਨੂੰ ਮਜ਼ਬੂਤ ਕੀਤਾ, ਲੇਬਨਾਨ ਦੀਆਂ ਚੋਣਾਂ, ਰਾਜਨੀਤੀ ਅਤੇ ਸਰਕਾਰ ਵਿੱਚ ਸੰਗਠਨ ਦੀ ਹਿੱਸੇਦਾਰੀ ਨੂੰ ਵਧਾਇਆ। ਇਰਾਨ ਨਾਲ ਉਸ ਦੀ ਨੇੜਲੀ ਦੋਸਤੀ ਨੇ ਹਿਜ਼ਬੁੱਲਾ ਦੀ ਫ਼ੌਜੀ ਸ਼ਕਤੀ ਨੂੰ ਹੋਰ ਵਧਾ ਦਿੱਤਾ। 2000 ਤੋਂ ਬਾਅਦ ਉਸਨੇ ਇਜ਼ਰਾਈਲ ਵਿਰੁੱਧ ਫ਼ੌਜੀ ਕਾਰਵਾਈਆਂ ਦੀ ਯੋਜਨਾ ਬਣਾਈ।
2006 'ਚ ਨਸਰੱਲਾ ਦੀ ਅਗਵਾਈ 'ਚ ਹਿਜ਼ਬੁੱਲਾ ਨੇ ਇਜ਼ਰਾਈਲ 'ਤੇ ਵੱਡਾ ਹਮਲਾ ਕੀਤਾ ਸੀ, ਜਿਸ 'ਚ 8 ਇਜ਼ਰਾਇਲੀ ਫੌਜੀ ਮਾਰੇ ਗਏ ਸਨ। ਇਸ ਹਮਲੇ ਤੋਂ ਬਾਅਦ ਇਜ਼ਰਾਈਲ ਨੇ ਹਿਜ਼ਬੁੱਲਾ ਵਿਰੁੱਧ ਜੰਗ ਸ਼ੁਰੂ ਕਰ ਦਿੱਤੀ, ਜੋ 34 ਦਿਨਾਂ ਤੱਕ ਚੱਲੀ। ਹਾਲ ਹੀ 'ਚ ਨਸਰੁੱਲਾ ਦੇ ਨਿਰਦੇਸ਼ਾਂ 'ਤੇ ਹਿਜ਼ਬੁੱਲਾ ਨੇ ਇਜ਼ਰਾਈਲ 'ਤੇ ਹਮਲੇ ਸ਼ੁਰੂ ਕੀਤੇ ਸਨ। ਇਜ਼ਰਾਈਲ ਹਿਜ਼ਬੁੱਲਾ ਨੂੰ ਇੱਕ ਅੱਤਵਾਦੀ ਸੰਗਠਨ ਮੰਨਦਾ ਹੈ, ਜਦੋਂ ਕਿ ਨਸਰੁੱਲਾ ਆਪਣੇ ਸੰਗਠਨ ਨੂੰ ਇੱਕ ਪ੍ਰਤੀਰੋਧ ਸ਼ਕਤੀ ਵਜੋਂ ਪੇਸ਼ ਕਰਦਾ ਰਿਹਾ ਸੀ।