ਕੋਰੋਨਾ ਦੇ ਕਹਿਰ 'ਚ ਪਾਕਿਸਤਾਨ ਦੀ ਸ਼ਰਾਰਤ, ਨਿਗਰਾਨੀ ਸੂਚੀ 'ਚੋਂ 4000 ਅੱਤਵਾਦੀ ਬਾਹਰ, ਮੁੰਬਈ ਹਮਲੇ ਦੇ ਅੱਤਵਾਦੀ ਵੀ ਸ਼ਾਮਲ

ਪਾਕਿਸਤਾਨ ਨੇ ਨਿਗਰਾਨੀ ਸੂਚੀ ਵਿੱਚੋਂ 4000 ਅੱਤਵਾਦੀਆਂ ਦੇ ਨਾਂ ਹਟਾ ਦਿੱਤੇ ਹਨ। ਇਨ੍ਹਾਂ ‘ਚ ਮੁੰਬਈ ਹਮਲਿਆਂ ਵਿੱਚ ਸ਼ਾਮਲ ਕਈ ਅੱਤਵਾਦੀਆਂ ਦੇ ਨਾਂ ਵੀ ਸ਼ਾਮਲ ਹਨ।

ਨਵੀਂ ਦਿੱਲੀ: ਪਾਕਿਸਤਾਨ (pakistan) ਨੇ ਆਪਣੀ ਨਿਗਰਾਨੀ ਸੂਚੀ (watchlist) ਵਿੱਚੋਂ ਤਕਰੀਬਨ 4,000 ਅੱਤਵਾਦੀਆਂ ਦੇ ਨਾਂ ਹਟਾ ਦਿੱਤੇ ਹਨ। ਇਸ ਸੂਚੀ ਵਿੱਚੋਂ ਉਨ੍ਹਾਂ ਦੇ ਨਾਂ ਵੀ ਹਟਾ ਦਿੱਤੇ ਗਏ ਜੋ 2008 ਦੇ ਮੁੰਬਈ ਅੱਤਵਾਦੀ ਹਮਲੇ ਦੇ ਮੁੱਖ ਯੋਜਨਾਕਾਰ ਸੀ। ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਸ਼ੁਰੂਆਤ ਨੇ ਇਸ ਗੱਲ ਦਾ ਖੁਲਾਸਾ ਕੀਤਾ ਹੈ। ਅੱਤਵਾਦੀ ਫੰਡਾਂ ‘ਤੇ ਰੋਕ ਲਾਉਣ ਲਈ ਪਾਕਿਸਤਾਨ ਦੀਆਂ ਕੋਸ਼ਿਸ਼ਾਂ ਤੋਂ ਅਸੰਤੁਸ਼ਟ ਫਾਈਨੈਂਸ ਐਕਸ਼ਨ ਟਾਸਕ ਫੋਰਸ (FATF) ਨੇ ਫਰਵਰੀ ‘ਚ ਕਿਹਾ ਸੀ ਕਿ ਇਸਲਾਮਾਬਾਦ ਨੂੰ ਸਖ਼ਤ ਸੂਚੀ ਵਿੱਚੋਂ ਬਾਹਰ ਕਰਨ ਲਈ 27 ਵਿੱਚੋਂ ਸਿਰਫ 14 ਅੰਕ ਦਿੱਤੇ ਗਏ ਹਨ। ਹੁਣ ਐਫਏਟੀਐਫ ਵੱਲੋਂ ਜੂਨ ਵਿੱਚ ਪਾਕਿਸਤਾਨ ਦੀ ਪ੍ਰਗਤੀ ਦਾ ਮੁੜ ਮੁਲਾਂਕਣ ਕਰਨਾ ਹੈ। ਨਿਊਯਾਰਕ ਸਥਿਤ ਸਟਾਰਟਅਪ ‘ਕੈਸਟੇਲਮ’ ਨੇ ਪਾਇਆ ਹੈ ਕਿ ਪਿਛਲੇ ਡੇਢ ਸਾਲ ‘ਚ ਪਾਕਿਸਤਾਨ ਨੇ 3,800 ਅੱਤਵਾਦੀਆਂ ਦੇ ਨਾਂ ਬਗੈਰ ਕਿਸੇ ਸਪੱਸ਼ਟੀਕਰਨ ਜਾਂ ਨੋਟੀਫਿਕੇਸ਼ਨ ਦੇ ਆਪਣੀ ਨਿਗਰਾਨੀ ਸੂਚੀ ਚੋਂ ਹਟਾ ਦਿੱਤੇ। ਲਸ਼ਕਰ-ਏ-ਤੋਇਬਾ ਦੇ ਨੇਤਾ ਤੇ ਮੁੰਬਈ ਹਮਲਿਆਂ ਦੇ ਕਥਿਤ ਮਾਸਟਰ ਮਾਈਂਡ ਜ਼ਕਾ-ਉਰ-ਰਹਿਮਾਨ ਸਣੇ ਕਈ ਵੱਡੇ ਅੱਤਵਾਦੀਆਂ ਦੇ ਨਾਂ ਇਸ ਸੂਚੀ ਤੋਂ ਹਟਾਏ ਗਏ ਹਨ। ਦੱਸ ਦਈਏ ਕਿ ਐਫਏਟੀਐਫ ਦੀ ਰਿਪੋਰਟ ਮੁਤਾਬਕ, ਅਕਤੂਬਰ 2018 ਵਿੱਚ ਪਾਕਿਸਤਾਨ ਦੇ ਅੱਤਵਾਦੀ ਨਿਗਰਾਨੀ ਸੂਚੀ ‘ਚ ਤਕਰੀਬਨ 7,600 ਨਾਂ ਸੀ।