ਲੱਦਾਖ ਦੇ ਸ਼ਿਯੋਕ ਨਦੀ 'ਚ ਡਿੱਗੀ ਬੱਸ, 7 ਫੌਜੀਆਂ ਦੀ ਮੌਤ, See Photos

ਲੱਦਾਖ ਦੇ ਤੁਰਤੁਕ ਸੈਕਟਰ 'ਚ ਕੰਟਰੋਲ ਰੇਖਾ ਨੇੜੇ ਸ਼ਿਓਕ ਨਦੀ 'ਚ ਫੌਜ ਦੀ ਬੱਸ ਡਿੱਗਣ ਕਾਰਨ ਸੱਤ ਜਵਾਨ ਸ਼ਹੀਦ ਹੋ ਗਏ। ਬੱਸ ਵਿਚ ਸਵਾਰ 19 ਹੋਰ ਜਵਾਨਾਂ ਨੂੰ ਗੰਭੀਰ ਸੱਟਾਂ ਲੱਗਣ ਤੋਂ ਬਾਅਦ ਚੰਡੀਗੜ੍ਹ ਦੇ ਕਮਾਂਡ ਹਸਪਤਾਲ ਲਿਜਾਇਆ ਗਿਆ ਹੈ।

ਭਾਰਤੀ ਫੌਜ ਮੁਤਾਬਕ ਸ਼ੁੱਕਰਵਾਰ ਸਵੇਰੇ ਕਰੀਬ 9 ਵਜੇ ਸੈਨਿਕਾਂ ਨਾਲ ਭਰੀ ਬੱਸ ਪਰਤਾਪੁਰ ਟਰਾਂਜ਼ਿਟ ਕੈਂਪ ਤੋਂ ਹਨੀਫ ਸਬ-ਸੈਕਟਰ 'ਚ ਅੱਗੇ ਵਾਲੇ ਸਥਾਨ 'ਤੇ ਜਾ ਰਹੀ ਸੀ। ਇਸ ਦੌਰਾਨ ਬੱਸ ਫਿਸਲ ਕੇ ਕਰੀਬ 50-60 ਫੁੱਟ ਹੇਠਾਂ ਸ਼ਿਓਕ ਨਦੀ 'ਚ ਜਾ ਡਿੱਗੀ।

ਬੱਸ ਦੇ ਨਦੀ ਵਿੱਚ ਡਿੱਗਣ ਕਾਰਨ ਸਾਰੇ 26 ਜਵਾਨਾਂ ਨੂੰ ਗੰਭੀਰ ਸੱਟਾਂ ਲੱਗੀਆਂ। ਸਾਰਿਆਂ ਨੂੰ ਪਹਿਲਾਂ ਪਰਤਾਪੁਰ ਦੇ 403 ਫੀਲਡ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਸੱਤ ਜਵਾਨਾਂ ਦੀ ਮੌਤ ਹੋ ਗਈ।

ਜ਼ਖਮੀ ਸੈਨਿਕਾਂ ਦੇ ਇਲਾਜ ਲਈ ਸਰਜੀਕਲ ਡਾਕਟਰਾਂ ਦੀ ਟੀਮ ਨੂੰ ਤੁਰੰਤ ਲੇਹ ਤੋਂ ਪਰਤਾਪੁਰ ਹਸਪਤਾਲ ਭੇਜਿਆ ਗਿਆ। ਪਰ ਗੰਭੀਰ ਸੱਟਾਂ ਕਾਰਨ ਬਾਅਦ ਵਿਚ ਸਾਰੇ 19 ਜ਼ਖਮੀਆਂ ਨੂੰ ਚੰਡੀਮੰਦਰ ਲਿਜਾਣ ਦਾ ਫੈਸਲਾ ਕੀਤਾ ਗਿਆ।

ਹਵਾਈ ਫੌਜ ਦੀ ਮਦਦ ਨਾਲ ਸਾਰੇ ਜ਼ਖਮੀ ਜਵਾਨਾਂ ਨੂੰ ਚੰਡੀਮੰਦਰ (ਚੰਡੀਗੜ੍ਹ) ਸਥਿਤ ਫੌਜ ਦੀ ਪੱਛਮੀ ਕਮਾਂਡ ਦੇ ਹਸਪਤਾਲ ਪਹੁੰਚਾਇਆ ਗਿਆ ਹੈ। ਫੌਜ ਮੁਤਾਬਕ ਸਾਰੇ ਜ਼ਖਮੀ ਜਵਾਨਾਂ ਦਾ ਬਿਹਤਰ ਇਲਾਜ ਕੀਤਾ ਜਾ ਰਿਹਾ ਹੈ।