ਇੰਗਲੈਂਡ ਦੇ PM Boris ਨੇ 23 ਸਾਲ ਛੋਟੀ ਮਾਸ਼ੂਕਾ ਨਾਲ ਰਚਾਇਆ ਵਿਆਹ, ਜਾਣੋ ਇਸ਼ਕ ਦੀ ਕਹਾਣੀ

ਲੰਦਨ: ਇੰਗਲੈਂਡ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਨੇ ਆਪਣੀ ਮੰਗੇਤਰ ਕੈਰੀ ਸਾਇਮੰਡਜ਼ ਨਾਲ ਚੁੱਪ-ਚੁਪੀਤੇ ਵਿਆਹ ਰਚਾ ਲਿਆ ਹੈ। ਕੈਰੀ ਪੀਐਮ ਬੋਰਿਸ ਜੌਨਸਨ ਤੋਂ 23 ਸਾਲ ਛੋਟੀ ਹੈ। ਦੋਵੇਂ ਲੰਮੇ ਸਮੇਂ ਤੋਂ ਇੱਕ-ਦੂਜੇ ਨਾਲ ਰਿਲੇਸ਼ਨਸ਼ਿਪ ’ਚ ਸਨ। ਸਾਲ 2019 ’ਚ ਦੋਵਾਂ ਨੇ ਮੰਗਣੀ ਕੀਤੀ ਸੀ ਪਰ ਕੋਰੋਨਾਵਾਇਰਸ ਮਹਾਮਾਰੀ ਦੇ ਚੱਲਦਿਆਂ ਉਹ ਪਿਛਲੇ ਵਰ੍ਹੇ ਵਿਆਹ ਨਹੀਂ ਕਰਵਾ ਸਕੇ ਸਨ।

ਇਸ ਕੈਰੀ ਦੀ ਉਮਰ 33 ਸਾਲ ਹੈ। ਬੋਰਿਸ ਜੌਨਸਨ ਇਸ ਤੋਂ ਪਹਿਲਾਂ ਦੋ ਵਾਰ ਵਿਆਹ ਕਰਵਾ ਚੁੱਕੇ ਹਨ। ਕੈਰੀ ਦਾ ਇਹ ਪਹਿਲਾ ਹੀ ਵਿਆਹ ਹੈ। ਬੋਰਿਸ ਜੌਨਸਨ ਨੇ ਦੂਜੀ ਵਾਰ ਇੱਕ ਵਕੀਲ ਮਰੀਨਾ ਵ੍ਹੀਲਰ ਨਾਲ ਵਿਆਹ ਕੀਤਾ ਸੀ ਪਰ ਉਹ ਸਾਲ 2018 ’ਚ ਅਲੱਗ ਹੋ ਗਏ ਸਨ। ਦੋਵਾਂ ਦੇ ਚਾਰ ਬੱਚੇ ਹਨ।

ਮਰੀਨਾ ਨਾਲ ਤਲਾਕ ਹੋਣ ਤੋਂ ਬਾਅਦ ਬੋਰਿਸ ਜੌਨਸਨ ਕੈਰੀ ਨੂੰ ਮਿਲੇ ਤੇ ਹੌਲੀ-ਹੌਲੀ ਉਹ ਇੱਕ-ਦੂਜੇ ਦੇ ਨੇੜੇ ਆ ਗਏ। ਸਾਲ 2019 ’ਚ ਉਨ੍ਹਾਂ ਵਿਆਹ ਕਰਵਾਉਣ ਦਾ ਫ਼ੈਸਲਾ ਕੀਤਾ। ਇਸ ਤੋਂ ਬਾਅਦ ਉਨ੍ਹਾਂ ਦਾ ਵਿਆਹ ਹੋਇਆ। ਸਾਲ 2019 ’ਚ ਜੌਨਸਨ ਦੇ ਪ੍ਰਧਾਨ ਮੰਤਰੀ ਬਣਨ ਦੇ ਬਾਅਦ ਤੋਂ ਹੀ ਦੋਵੇਂ ਨਾਲ ਹੀ ਰਹਿ ਰਹੇ ਹਨ। ਅਪ੍ਰੈਲ 2020 ’ਚ ਉਨ੍ਹਾਂ ਦੇ ਘਰ ਪੁੱਤਰ ਵਿਲਫ਼ਰਡ ਲੌਰੀ ਨੇ ਜਨਮ ਲਿਆ ਸੀ।

ਇੰਝ ਹੋਈ ਸੀ ਦੋਵਾਂ ਦੀ ਪਹਿਲੀ ਮੁਲਾਕਾਤ: ਕੈਰੀ ਦੇ ਪਿਤਾ ਇੰਗਲੈਂਡ ਦੀ ਪ੍ਰਸਿੱਧ ਸ਼ਖ਼ਸੀਅਤ ਹਨ। ਉਹ ਪ੍ਰਸਿੱਧ ਅਖ਼ਬਾਰ ‘ਇੰਡੀਪੈਂਡੈਂਟ’ ਦੇ ਬਾਨੀ ਮੈਂਬਰਾਂ ’ਚੋਂ ਇੱਕ ਹਨ। ਕੇਰੀ ਸਾਇਮੰਡਜ਼ ਸਾਲ 2010 ’ਚ ਕਨਜ਼ਰਵੇਟਿਵ ਪਾਰਟੀ ’ਚ ਸ਼ਾਮਲ ਹੋ ਗਏ ਸਨ ਤੇ ਹੌਲੀ-ਹੌਲੀ ਸਿਆਸਤ ਵਿੱਚ ਆਪਣਾ ਸਥਾਨ ਬਣਾਉਣ ਲੱਗੇ ਸਨ।

ਬੋਰਿਸ ਜੌਨਸਨ ਦੇ ਦੂਜੀ ਪਤਨੀ ਤੋਂ ਤਲਾਕ ਲੈਣ ਦੇ ਕੁਝ ਹੀ ਦਿਨਾਂ ਅੰਦਰ ਇਹ ਖ਼ਬਰ ਆ ਗਈ ਸੀ ਕਿ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਦੀ ਜ਼ਿੰਦਗੀ ਵਿੱਚ ਕਿਸੇ ਹੋਰ ਕੁੜੀ ਦੀ ਐਂਟਰੀ ਹੋ ਗਈ ਹੈ। ਉਹ ਦੋਵੇਂ ਇੱਕ-ਦੂਜੇ ਨੂੰ ਡੇਟ ਕਰ ਰਹੇ ਹਨ। ਕੈਰੀ ਨੇ ਟਵਿਟਰ ’ਤੇ ਇੱਕ ਟਵੀਟ ਰਾਹੀਂ ਬੋਰਿਸ ਜੌਨਸਨ ਦੀ ਰੱਜਵੀਂ ਸ਼ਲਾਘਾ ਕੀਤੀ। ਸਾਇਮੰਡਜ਼ ਨੇ ਲਿਖਿਆ ਸੀ- ਬੋਰਿਸ ਦੇ ਭਾਸ਼ਣ ਵੇਖ ਕੇ ਬਹੁਤ ਵਧੀਆ ਲੱਗਦਾ ਹੈ। ਉਹ ਡਿਬੇਟ ਦੌਰਾਨ ਵਿਦੇਸ਼ ਨੀਤੀ ਉੱਤੇ ਸ਼ਾਨਦਾਰ ਤਰੀਕੇ ਨਾਲ ਆਪਣੀ ਗੱਲ ਰੱਖਦੇ ਹਨ।

ਮੀਡੀਆ ਰਿਪੋਰਟਾਂ ਅਨੁਸਾਰ ਮੱਧ ਲੰਦਨ ’ਚ ਹੋਏ ਸਮਾਰੋਹ ਦੌਰਾਨ ਐਨ ਆਖ਼ਰੀ ਸਮੇਂ ਮਹਿਮਾਨਾਂ ਨੂੰ ਸੱਦਿਆ ਗਿਆ ਸੀ। ਕਿਹਾ ਜਾ ਰਿਹਾ ਹੈ ਕਿ ਜੌਨਸਨ ਦੇ ਦਫ਼ਤਰ ਦੇ ਸੀਨੀਅਰ ਮੈਂਬਰ ਵੀ ਵਿਆਹ ਦੀ ਯੋਜਨਾ ਤੋਂ ਅਣਜਾਣ ਸਨ।

ਕੋਵਿਡ-19 ਦੀਆਂ ਪਾਬੰਦੀਆਂ ਕਰਕੇ ਇੰਗਲੈਂਡ ’ਚ ਹੋਏ ਇਸ ਵਿਆਹ ਸਮਾਰੋਹ ਵਿੱਚ ਸਿਰਫ਼ 30 ਵਿਅਕਤੀ ਹੀ ਸ਼ਮਲ ਹੋ ਸਕੇ ਸਨ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਕੈਥੋਲਿਕ ਗਿਰਜਾਘਰ ਨੂੰ ਦੁਪਹਿਰ 1:30 ਵਜੇ ਅਚਾਨਕ ਬੰਦ ਕਰ ਦਿੱਤਾ ਗਿਆ। ਲਗਪਗ 30 ਮਿੰਟਾਂ ਬਾਅਦ ਕੈਰੀ ਨੂੰ ਲਿਮੋਜ਼ਿਨ ਵਿੱਚ ਬਿਨਾ ਘੁੰਡ ਵਾਲੀ ਇੱਕ ਚਿੱਟੀ ਡ੍ਰੈੱਸ ਵਿੱਚ ਤੱਕਿਆ ਗਿਆ।