ਕੀਵੀ ਟੀਮ ਪਾਰੀ ਦੇ ਫਰਕ ਨਾਲ ਜੇਤੂ

ਜ਼ਿੰਬਾਬਵੇ ਦੀ ਟੀਮ ਆਪਣੀ ਦੂਜੀ ਪਾਰੀ 'ਚ 295 ਰਨ 'ਤੇ ਆਲ ਆਊਟ ਹੋ ਗਈ। ਜ਼ਿੰਬਾਬਵੇ ਦੀ ਦੂਜੀ ਪਾਰੀ 'ਚ ਸੀਨ ਵਿਲੀਅਮਸ ਨੇ 119 ਰਨ ਦੀ ਪਾਰੀ ਖੇਡ ਟੀਮ ਨੂੰ ਸਨਮਾਨਜਨਕ ਸਕੋਰ ਤਕ ਪਹੁੰਚਾਇਆ ਪਰ ਵਿਲੀਅਮਸ ਆਪਣੀ ਟੀਮ ਨੂੰ ਪਾਰੀ ਦੀ ਹਾਰ ਤੋਂ ਨਹੀਂ ਬਚਾ ਸਕੇ। ਇਹ ਨਿਊਜ਼ੀਲੈਂਡ ਦੀ ਇਤਿਹਾਸ 'ਚ ਦੂਜੀ ਸਭ ਤੋਂ ਵੱਡੀ ਜਿੱਤ ਹੈ।

ਨਿਊਜ਼ੀਲੈਂਡ ਨੇ ਜ਼ਿੰਬਾਬਵੇ ਖਿਲਾਫ ਖੇਡੇ ਗਏ ਪਹਿਲੇ ਟੈਸਟ 'ਚ ਪਾਰੀ ਅਤੇ 117 ਰਨ ਦੇ ਵੱਡੇ ਫਰਕ ਨਾਲ ਜਿੱਤ ਦਰਜ ਕੀਤੀ ਹੈ। ਨਿਊਜ਼ੀਲੈਂਡ ਨੇ ਪੂਰੇ ਮੈਚ 'ਚ ਬੱਲੇਬਾਜ਼ੀ, ਗੇਂਦਬਾਜ਼ੀ ਅਤੇ ਫੀਲਡਿੰਗ 'ਚ ਚੰਗਾ ਪ੍ਰਦਰਸ਼ਨ ਕਰ ਮੈਚ ਆਪਣੇ ਨਾਮ ਕੀਤਾ।

ਇਸ ਮੈਚ 'ਜਹ ਜ਼ਿੰਬਾਬਵੇ ਦੀ ਟੀਮ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਪਹਿਲੀ ਪਾਰੀ 'ਚ 164 ਰਨ ਬਣਾਏ। ਜ਼ਿੰਬਾਬਵੇ ਨੇ ਇੱਕ ਸਮੇਂ 72 ਰਨ 'ਤੇ 8 ਵਿਕਟ ਗਵਾ ਦਿੱਤੇ ਸਨ। 10ਵੇਂ ਨੰਬਰ 'ਤੇ ਬੱਲੇਬਾਜ਼ੀ ਕਰ ਰਹੇ ਤਿਰਿਪਾਨੋ ਦੇ ਨਾਬਾਦ 49 ਰਨ ਦੀ ਪਾਰੀ ਦੇ ਆਸਰੇ ਜ਼ਿੰਬਾਬਵੇ ਦੀ ਟੀਮ ਨੇ 164 ਰਨ ਦਾ ਸਕੋਰ ਖੜਾ ਕੀਤਾ।

ਜਵਾਬ 'ਚ ਨਿਊਜ਼ੀਲੈਂਡ ਦੀ ਟੀਮ ਲਈ 3 ਬੱਲੇਬਾਜ਼ਾਂ ਨੇ ਸੈਂਕੜੇ ਠੋਕੇ। ਲੈਥਮ ਨੇ 105 ਰਨ ਦੀ ਪਾਰੀ ਖੇਡੀ ਜਦਕਿ ਕਪਤਾਨ ਵਿਲੀਅਮਸਨ ਨੇ 91 ਰਨ ਦਾ ਯੋਗਦਾਨ ਪਾਇਆ। ਵਾਟਲਿੰਗ ਨੇ 107 ਰਨ ਦੀ ਪਾਰੀ ਖੇਡੀ। ਨਿਊਜ਼ੀਲੈਂਡ ਲਈ ਸਭ ਤੋਂ ਵੱਡੀ ਪਾਰੀ ਰਾਸ ਟੇਲਰ ਨੇ ਖੇਡੀ।

ਰਾਸ ਟੇਲਰ ਨੇ 173 ਰਨ ਦੀ ਨਾਬਾਦ ਪਾਰੀ ਖੇਡ ਟੀਮ ਨੂੰ ਬੇਹਦ ਮਜਬੂਤ ਸਥਿਤੀ 'ਚ ਪਹੁੰਚਾ ਦਿੱਤਾ। ਨਿਊਜ਼ੀਲੈਂਡ ਦੀ ਟੀਮ ਨੇ ਆਪਣੀ ਪਹਿਲੀ ਪਾਰੀ 6 ਵਿਕਟਾਂ ਦੇ ਨੁਕਸਾਨ 'ਤੇ 576 ਰਨ ਬਣਾ ਕੇ ਐਲਾਨੀ।