ਟੈਸਟ ਕ੍ਰਿਕਟ 'ਚ 380 ਰਨ ਦਾ ਧਮਾਕਾ

ਨਵੀਂ ਦਿੱਲੀ - ਆਸਟ੍ਰੇਲੀਆ ਦੀ ਕ੍ਰਿਕਟ ਟੀਮ ਨੇ ਇੱਕ ਤੋਂ ਵਧ ਕੇ ਇੱਕ ਦਿੱਗਜ ਖਿਡਾਰੀਆਂ ਨੂੰ ਖੇਡਦੇ ਵੇਖਿਆ ਹੈ। ਇਸ ਟੀਮ ਲਈ ਜਿਹੜੇ ਖਿਡਾਰੀਆਂ ਨੇ ਵੱਡਾ ਨਾਮ ਖੱਟਿਆ ਉਨ੍ਹਾਂ 'ਚ ਮੈਥਿਊ ਹੇਡਨ ਦਾ ਨਾਮ ਵੀ ਸ਼ਾਮਿਲ ਹੈ। ਅੱਜ ਮੈਥਿਊ ਹੇਡਨ ਆਪਣਾ 45ਵਾਂ ਜਨਮਦਿਨ ਮਨਾ ਰਹੇ ਹਨ। 

  

 

ਮੈਥਿਊ ਹੇਡਨ ਨੇ ਆਸਟ੍ਰੇਲੀਆ ਲਈ 103 ਟੈਸਟ ਮੈਚ ਅਤੇ 161 ਵਨਡੇ ਮੈਚ ਖੇਡੇ। ਮੈਥਿਊ ਹੇਡਨ ਨੇ ਟੈਸਟ ਮੈਚਾਂ 'ਚ 30 ਸੈਂਕੜੇ ਅਤੇ 29 ਅਰਧ-ਸੈਂਕੜੇ ਠੋਕੇ। ਵਨਡੇ ਮੈਚਾਂ 'ਚ ਹੇਡਨ ਦੇ ਨਾਮ 10 ਸੈਂਕੜੇ ਅਤੇ 36 ਅਰਧ-ਸੈਂਕੜੇ ਦਰਜ ਹਨ। ਭਾਰਤ ਖਿਲਾਫ ਸਾਲ 2001 ਦੀ ਟੈਸਟ ਸੀਰੀਜ਼ 'ਚ 3 ਮੈਚਾਂ 'ਚ 549 ਰਨ ਠੋਕੇ। ਹੇਡਨ ਦੀ ਦਮਦਾਰ ਬੱਲੇਬਾਜ਼ੀ ਸਦਕਾ ਇਸ ਸੀਰੀਜ਼ 'ਚ ਉਨ੍ਹਾਂ ਨੂੰ 'ਮੈਨ ਆਫ ਦ ਸੀਰੀਜ਼' ਵੀ ਚੁਣਿਆ ਗਿਆ ਸੀ। 

  

 

ਹੇਡਨ ਨੇ ਲੰਮੇ ਸਮੇਂ ਤੋਂ ਬ੍ਰਾਇਨ ਲਾਰਾ ਦੇ ਨਾਮ ਦਰਜ ਟੈਸਟ ਮੈਚਾਂ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਸਕੋਰ ਵੀ ਆਪਣੇ ਨਾਮ ਕਰ ਲਿਆ ਸੀ। ਹੇਡਨ ਨੇ ਜ਼ਿੰਬਾਬਵੇ ਖਿਲਾਫ 380 ਰਨ ਦੀ ਪਾਰੀ ਖੇਡ ਲਾਰਾ ਦਾ 375 ਰਨ ਦਾ ਰਿਕਾਰਡ ਤੋੜਿਆ ਸੀ। ਹੇਡਨ ਨੇ ਹੀ ਮੌਂਗੂਜ਼ ਬੈਟ ਨੂੰ ਵੀ ਟੀ-20 ਕ੍ਰਿਕਟ 'ਚ ਮਸ਼ਹੂਰ ਕੀਤਾ ਸੀ। ਮੈਥਿਊ ਹੇਡਨ ਇੱਕ ਬੇਮਿਸਾਲ ਖਿਡਾਰੀ ਸੀ ਅਤੇ ਉਨ੍ਹਾਂ ਦਾ ਨਾਮ ਅੱਜ ਵੀ ਚੰਗੇ ਤੋਂ ਚੰਗੇ ਗੇਂਦਬਾਜ਼ ਨੂੰ ਪਸੀਨਾ ਲਿਆਉਣ ਲਈ ਕਾਫੀ ਹੈ।