Mayank Agarwal: ਭਾਰਤੀ ਕ੍ਰਿਕਟਰ ਮਯੰਕ ਅਗਰਵਾਲ ਦੇ ਘਰ ਇਕ ਛੋਟਾ ਜਿਹਾ ਮਹਿਮਾਨ ਆਇਆ ਹੈ। ਮਯੰਕ ਦੀ ਪਤਨੀ ਅਸ਼ੀਤਾ ਸੂਦ ਨੇ ਬੇਟੇ ਨੂੰ ਜਨਮ ਦਿੱਤਾ ਹੈ ਅਤੇ ਹੁਣ ਮਯੰਕ ਨੇ ਆਪਣੀ ਪਤਨੀ ਅਤੇ ਬੇਟੇ ਨਾਲ ਪਹਿਲੀ ਫੋਟੋ ਸ਼ੇਅਰ ਕੀਤੀ ਹੈ। ਦੱਸ ਦੇਈਏ ਕਿ ਮਯੰਕ 8 ਦਸੰਬਰ ਨੂੰ ਹੀ ਪਿਤਾ ਬਣੇ ਹਨ ਪਰ ਹੁਣ ਉਨ੍ਹਾਂ ਨੇ ਇਸ ਗੱਲ ਦੀ ਜਾਣਕਾਰੀ ਆਪਣੇ ਚਹੇਤਿਆਂ ਨੂੰ ਦਿੱਤੀ ਹੈ। ਬੇਟੇ ਦੇ ਜਨਮ ਦੀ ਜਾਣਕਾਰੀ ਦੇਣ ਦੇ ਨਾਲ ਹੀ ਮਯੰਕ ਨੇ ਆਪਣੇ ਨਾਂ ਦਾ ਵੀ ਖੁਲਾਸਾ ਕੀਤਾ ਹੈ।
ਟਵਿੱਟਰ 'ਤੇ ਫੋਟੋ ਸ਼ੇਅਰ ਕਰਦੇ ਹੋਏ ਮਯੰਕ ਨੇ ਲਿਖਿਆ, "ਧੰਨਵਾਦ ਨਾਲ ਭਰੇ ਦਿਲ ਨਾਲ, ਅਸੀਂ ਅਯਾਂਸ਼ ਨੂੰ ਪੇਸ਼ ਕਰਦੇ ਹਾਂ। ਰੋਸ਼ਨੀ ਦੀ ਪਹਿਲੀ ਕਿਰਨ, ਸਾਡਾ ਇੱਕ ਹਿੱਸਾ ਅਤੇ ਰੱਬ ਵੱਲੋਂ ਇੱਕ ਤੋਹਫ਼ਾ।"
ਕਰੀਬ ਸੱਤ ਸਾਲ ਰਿਲੇਸ਼ਨਸ਼ਿਪ 'ਚ ਰਹਿਣ ਤੋਂ ਬਾਅਦ ਮਯੰਕ ਅਤੇ ਅਸ਼ੀਤਾ ਨੇ ਅਪ੍ਰੈਲ 2018 'ਚ ਵਿਆਹ ਕਰਵਾ ਲਿਆ ਸੀ। ਅਸ਼ੀਤਾ ਦੇ ਪਿਤਾ ਕਰਨਾਟਕ ਦੇ ਪੁਲਿਸ ਡਾਇਰੈਕਟਰ ਜਨਰਲ (ਡੀਜੀਪੀ) ਹਨ। ਅਸ਼ੀਤਾ ਨੇ ਖੁਦ ਕਾਨੂੰਨ ਵਿੱਚ ਮਾਸਟਰ ਡਿਗਰੀ ਕੀਤੀ ਹੈ ਅਤੇ ਪੇਸ਼ੇ ਤੋਂ ਇੱਕ ਵਕੀਲ ਵੀ ਹੈ। ਇਸ ਤੋਂ ਇਲਾਵਾ ਉਹ ਲਾਈਫਸਟਾਈਲ ਬਲਾਗਿੰਗ ਵੀ ਕਰਦੀ ਹੈ। ਅਸ਼ੀਤਾ ਸੋਸ਼ਲ ਮੀਡੀਆ 'ਤੇ ਕਾਫੀ ਐਕਟਿਵ ਰਹਿੰਦੀ ਹੈ। ਇੰਸਟਾਗ੍ਰਾਮ 'ਤੇ ਕਰੀਬ 90 ਹਜ਼ਾਰ ਲੋਕ ਉਨ੍ਹਾਂ ਨੂੰ ਫਾਲੋ ਕਰਦੇ ਹਨ।
ਮਯੰਕ ਰਿਹੈ ਘਰੇਲੂ ਕ੍ਰਿਕਟ ਖੇਡ
31 ਸਾਲਾ ਮਯੰਕ ਨੇ ਮਾਰਚ 2022 ਤੋਂ ਭਾਰਤ ਲਈ ਕੋਈ ਮੈਚ ਨਹੀਂ ਖੇਡਿਆ ਹੈ। ਉਹ ਪਿਛਲੇ ਕੁਝ ਸਾਲਾਂ ਤੋਂ ਭਾਰਤ ਲਈ ਸਿਰਫ ਟੈਸਟ ਮੈਚ ਖੇਡਦਾ ਹੈ, ਪਰ ਉਸ ਨੂੰ ਆਗਾਮੀ ਬੰਗਲਾਦੇਸ਼ ਦੌਰੇ ਲਈ ਭਾਰਤੀ ਟੈਸਟ ਟੀਮ 'ਚ ਜਗ੍ਹਾ ਨਹੀਂ ਮਿਲੀ ਹੈ। ਉਹ ਹਾਲ ਹੀ ਵਿੱਚ ਕਰਨਾਟਕ ਲਈ ਵਿਜੇ ਹਜ਼ਾਰੇ ਟਰਾਫੀ ਵਿੱਚ ਖੇਡਿਆ ਸੀ, ਪਰ ਨੌਂ ਪਾਰੀਆਂ ਵਿੱਚ ਸਿਰਫ਼ ਤਿੰਨ ਅਰਧ ਸੈਂਕੜੇ ਹੀ ਬਣਾ ਸਕਿਆ ਸੀ। ਮਯੰਕ ਲਈ ਫਿਲਹਾਲ ਭਾਰਤੀ ਟੀਮ 'ਚ ਵਾਪਸੀ ਕਰਨਾ ਵੱਡੀ ਚੁਣੌਤੀ ਹੋਵੇਗੀ ਕਿਉਂਕਿ ਰੋਹਿਤ ਸ਼ਰਮਾ ਦੀ ਗੈਰ-ਮੌਜੂਦਗੀ ਦੇ ਬਾਵਜੂਦ ਟੀਮ 'ਚ ਕਾਫੀ ਸਲਾਮੀ ਬੱਲੇਬਾਜ਼ ਹਨ। ਇੰਡੀਅਨ ਪ੍ਰੀਮੀਅਰ ਲੀਗ ਦੇ ਆਗਾਮੀ ਸੀਜ਼ਨ ਤੋਂ ਪਹਿਲਾਂ ਪੰਜਾਬ ਕਿੰਗਜ਼ ਨੇ ਉਸ ਨੂੰ ਕਪਤਾਨੀ ਤੋਂ ਹਟਾਉਣ ਦੇ ਨਾਲ-ਨਾਲ ਰੀਲੀਜ਼ ਵੀ ਕਰ ਦਿੱਤਾ ਹੈ।