Sunil Gavaskar On Asia Cup 2023: ਏਸ਼ੀਆ ਕੱਪ 2023 ਲਈ ਚੁਣੀ ਗਈ ਭਾਰਤੀ ਟੀਮ 'ਚ ਸਪਿਨਰਾਂ ਨਾਲੋਂ ਤੇਜ਼ ਗੇਂਦਬਾਜ਼ਾਂ ਨੂੰ ਜ਼ਿਆਦਾ ਮਹੱਤਵ ਦਿੱਤਾ ਗਿਆ ਹੈ। ਟੀਮ ਦਾ ਐਲਾਨ ਹੋਣ ਤੋਂ ਬਾਅਦ ਹੀ ਇਸ ਗੱਲ 'ਤੇ ਚਰਚਾ ਸ਼ੁਰੂ ਹੋ ਗਈ ਕਿ ਸਟਾਰ ਸਪਿਨਰ ਯੁਜਵੇਂਦਰ ਚਾਹਲ ਅਤੇ ਆਰ ਅਸ਼ਵਿਨ ਨੂੰ ਟੀਮ 'ਚ ਮੌਕਾ ਕਿਉਂ ਨਹੀਂ ਦਿੱਤਾ ਗਿਆ। ਇਸ ਤੋਂ ਇਲਾਵਾ ਟੀਮ 'ਚ ਕੁਝ ਬਦਲਾਅ ਦੇਖਣ ਨੂੰ ਮਿਲੇ ਹਨ। ਹੁਣ ਇਸ ਬਹਿਸ 'ਤੇ ਭਾਰਤ ਦੇ ਸਾਬਕਾ ਦਿੱਗਜ ਖਿਡਾਰੀ ਸੁਨੀਲ ਗਾਵਸਕਰ ਨੇ ਪ੍ਰਸ਼ੰਸਕਾਂ ਨੂੰ ਅਪੀਲ ਕੀਤੀ ਹੈ।
ਗਾਵਸਕਰ ਨੇ 'ਆਜ ਤਕ' 'ਤੇ ਭਾਰਤ ਦੇ ਸਪਿਨ ਵਿਭਾਗ 'ਤੇ ਪ੍ਰਤੀਕਿਰਿਆ ਦਿੱਤੀ। ਏਸ਼ੀਆ ਕੱਪ ਲਈ ਭਾਰਤੀ ਟੀਮ ਵਿੱਚ ਸਿਰਫ਼ ਕੁਲਦੀਪ ਯਾਦਵ ਨੂੰ ਮੁੱਖ ਸਪਿਨਰ ਵਜੋਂ ਚੁਣਿਆ ਗਿਆ ਹੈ। ਇਸ ਤੋਂ ਇਲਾਵਾ ਜਡੇਜਾ ਅਤੇ ਅਕਸ਼ਰ ਆਲਰਾਊਂਡਰ ਦੇ ਤੌਰ 'ਤੇ ਖੇਡਣਗੇ ਅਤੇ ਸਪਿਨ ਵਿਭਾਗ 'ਚ ਕੁਲਦੀਪ ਦਾ ਸਾਥ ਦੇਣਗੇ।
ਉੱਥੇ ਹੀ ਅਸ਼ਵਿਨ ਬਾਰੇ ਪੁੱਛੇ ਸਵਾਲ ਦੇ ਸਬੰਧ ਵਿੱਚ ਦਿੱਗਜ ਗਾਵਸਕਰ ਨੇ ਕਿਹਾ, "ਹਾਂ, ਕੁਝ ਖਿਡਾਰੀ ਅਜਿਹੇ ਹਨ ਜੋ ਆਪਣੇ ਆਪ ਨੂੰ ਬਦਕਿਸਮਤ ਸਮਝਣਗੇ। ਪਰ ਟੀਮ ਦੀ ਚੋਣ ਹੋ ਗਈ ਹੈ। ਇਸ ਲਈ ਅਸ਼ਵਿਨ ਬਾਰੇ ਨਾ ਸੋਚੋ। ਵਿਵਾਦ ਖੜ੍ਹਾ ਕਰਨਾ ਬੰਦ ਕਰੋ। ਹੁਣ ਇਹ ਸਾਡੀ ਟੀਮ ਹੈ। ਜੇਕਰ ਤੁਹਾਨੂੰ ਇਹ ਪਸੰਦ ਨਹੀਂ ਹੈ, ਤਾਂ ਮੈਚ ਨਾ ਦੇਖੋ ਪਰ ਇਹ ਕਹਿਣਾ ਬੰਦ ਕਰ ਦਿਓ ਕਿ ਉਸ ਨੂੰ ਚੁਣਿਆ ਜਾਣਾ ਚਾਹੀਦਾ ਹੈ ਜਾਂ ਕੋਈ ਹੋਰ ਹੋਣਾ ਚਾਹੀਦਾ ਹੈ। ਇਹ ਗਲਤ ਮਾਨਸਿਕਤਾ ਹੈ।"
ਇਹ ਵੀ ਪੜ੍ਹੋ: Rinku Singh: ਆਸਟ੍ਰੇਲਿਆਈ ਦਿੱਗਜ ਨੇ ਕਰ ਦਿੱਤਾ ਰਿੰਕੂ ਸਿੰਘ ਵਾਲਾ ਕਾਰਨਾਮਾ, 5 ਗੇਂਦਾਂ 'ਤੇ 5 ਛੱਕੇ
ਗਾਵਸਕਰ ਨੇ ਬਿਨਾਂ ਕਿਸੇ ਖਿਡਾਰੀ ਦਾ ਨਾਂ ਲਏ ਸਪੱਸ਼ਟ ਕੀਤਾ ਕਿ ਕੋਈ ਵੀ ਖਿਡਾਰੀ ਇਹ ਦਾਅਵਾ ਨਹੀਂ ਕਰ ਸਕਦਾ ਕਿ ਕਿਸੇ ਨਾਲ ਬੇਇਨਸਾਫੀ ਹੋਈ ਹੈ। ਗਾਵਸਕਰ ਨੇ ਕਿਹਾ, “ਹਾਂ, ਬਿਲਕੁਲ (ਇਹ ਟੀਮ ਵਿਸ਼ਵ ਕੱਪ ਜਿੱਤ ਸਕਦੀ ਹੈ)। ਤੁਸੀਂ ਕਿਸ ਦੀ ਚੋਣ ਕਰਦੇ? ਮੈਨੂੰ ਨਹੀਂ ਲੱਗਦਾ ਕਿ ਕੋਈ ਵੀ ਖਿਡਾਰੀ ਇਹ ਦਾਅਵਾ ਕਰ ਸਕਦਾ ਹੈ ਕਿ ਉਸ ਨਾਲ ਬੇਇਨਸਾਫ਼ੀ ਹੋਈ ਹੈ। ਏਸ਼ੀਆ ਕੱਪ ਦੀ 17 ਮੈਂਬਰੀ ਟੀਮ ਵਿੱਚ ਤਜ਼ਰਬੇ ਅਤੇ ਫਾਰਮ ਵਾਲੇ ਖਿਡਾਰੀਆਂ ਦੀ ਚੋਣ ਕੀਤੀ ਗਈ ਹੈ।
ਇਸ ਤੋਂ ਇਲਾਵਾ ਦਿੱਗਜ ਗਾਵਸਕਰ ਨੇ ਕੇਐਲ ਰਾਹੁਲ ਨੂੰ ਬੈਕ ਕੀਤਾ। ਉਨ੍ਹਾਂ ਨੇ ਕਿਹਾ, “ਦੇਖਦੇ ਹਾਂ ਕਿ ਉਨ੍ਹਾਂ ਦੀ ਸੱਟ ਕਿਵੇਂ ਹੈ। ਏਸ਼ੀਆ ਕੱਪ ਜਿੱਤਣਾ ਜ਼ਰੂਰੀ ਹੈ ਪਰ ਟੀਚਾ ਵਿਸ਼ਵ ਕੱਪ ਹੈ। ਇਸ ਲਈ ਜੇਕਰ ਟੀਮ ਪ੍ਰਬੰਧਨ ਕੇਐੱਲ ਰਾਹੁਲ ਨੂੰ ਵਿਸ਼ਵ ਕੱਪ ਟੀਮ 'ਚ ਸ਼ਾਮਲ ਕਰਨਾ ਚਾਹੁੰਦਾ ਹੈ ਤਾਂ ਮੈਨੂੰ ਲੱਗਦਾ ਹੈ ਕਿ ਮਾਮੂਲੀ ਸੱਟ ਦੇ ਬਾਵਜੂਦ ਉਸ ਨੂੰ ਏਸ਼ੀਆ ਕੱਪ ਲਈ ਚੁਣਨਾ ਸਹੀ ਹੈ।''
ਉਨ੍ਹਾਂ ਅੱਗੇ ਕਿਹਾ, “ਜਿੱਥੇ ਭਾਰਤ ਦਾ ਸਵਾਲ ਹੈ, ਅਜੇ 11 ਦਿਨ ਬਾਕੀ ਹਨ। ਸੱਟ ਤੋਂ ਉਭਰਨ ਲਈ ਇਹ ਕਾਫ਼ੀ ਸਮਾਂ ਹੈ। ਫਿਰ ਸਤੰਬਰ ਦੇ ਅੱਧ ਤੱਕ ਹੋਰ ਮੈਚ ਵੀ ਹਨ। ਮੈਨੂੰ ਲੱਗਦਾ ਹੈ ਕਿ ਕੇਐੱਲ ਰਾਹੁਲ ਨੂੰ ਮੌਕਾ ਦੇਣਾ ਠੀਕ ਹੈ ਕਿਉਂਕਿ ਉਨ੍ਹਾਂ ਨੇ ਭਾਰਤ ਲਈ ਚੰਗਾ ਪ੍ਰਦਰਸ਼ਨ ਕੀਤਾ ਹੈ, ਉਨ੍ਹਾਂ ਨੂੰ ਠੀਕ ਹੋਣ ਦਾ ਮੌਕਾ ਦਿਓ।
ਇਹ ਵੀ ਪੜ੍ਹੋ: Asia Cup 2023 : ਭਾਰਤੀ ਖਿਡਾਰੀ ਨੇ ਸਭ ਤੋਂ ਵੱਧ ਉਮਰ ਦੇ ਖਿਡਾਰੀ, ਜਾਣੋ ਕਿਸਦੀ ਕਿੰਨੀ ਹੈ ਉਮਰ