ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਾਲੇ ਚੱਲ ਰਹੇ ਟੈਸਟ ਮੈਚ ਦਾ ਨਤੀਜਾ ਅੱਜ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ 'ਚ ਮੈਚ ਦੇ ਤੀਜੇ ਦਿਨ ਦੇ ਦੂਜੇ ਸੈਸ਼ਨ 'ਚ ਸਾਹਮਣੇ ਆਇਆ। ਇਸ ਮੈਚ ਵਿੱਚ ਵੀ ਭਾਰਤ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਇਸ ਤੋਂ ਪਹਿਲਾਂ ਭਾਰਤੀ ਟੀਮ ਬੇਂਗਲੁਰੂ ਅਤੇ ਪੁਣੇ ਵਿੱਚ ਵੀ ਨਿਊਜ਼ੀਲੈਂਡ ਤੋਂ ਹਾਰ ਗਈ ਸੀ। ਖੈਰ, ਅੱਜ ਅਸੀਂ ਮੈਚ ਦੀ ਗੱਲ ਨਹੀਂ ਕਰਾਂਗੇ ਪਰ ਇਸ ਬਾਰੇ ਗੱਲ ਕਰਾਂਗੇ ਕਿ ਜੇ ਕੋਈ ਦਰਸ਼ਕ ਮੈਚ ਦੌਰਾਨ ਗੇਂਦ ਨਾਲ ਜ਼ਖ਼ਮੀ ਹੋ ਜਾਂਦਾ ਹੈ ਤਾਂ ਉਸ ਦਾ ਇਲਾਜ ਕੌਣ ਕਰਵਾਉਂਦਾ ਹੈ।
ਕ੍ਰਿਕਟ ਮੈਚ ਦੌਰਾਨ ਜਦੋਂ ਬੱਲੇਬਾਜ਼ ਲੰਬੇ ਛੱਕੇ ਮਾਰਦਾ ਹੈ ਤਾਂ ਕਈ ਵਾਰ ਗੇਂਦ ਦਰਸ਼ਕਾਂ ਦੇ ਵਿਚਕਾਰ ਡਿੱਗ ਜਾਂਦੀ ਹੈ। ਅਜਿਹੇ 'ਚ ਇਹ ਸਵਾਲ ਉੱਠਣਾ ਸੁਭਾਵਿਕ ਹੈ ਕਿ ਜੇ ਕੋਈ ਦਰਸ਼ਕ ਕ੍ਰਿਕਟ ਦੀ ਗੇਂਦ ਨਾਲ ਜ਼ਖਮੀ ਹੋ ਜਾਵੇ ਤਾਂ ਉਸ ਦਾ ਇਲਾਜ ਕੌਣ ਕਰਵਾਏਗਾ ? ਦਰਅਸਲ, ਹਰ ਮੈਚ ਦੌਰਾਨ ਸਟੇਡੀਅਮ ਵਿੱਚ ਤੁਰੰਤ ਡਾਕਟਰੀ ਸਹਾਇਤਾ ਦਾ ਪ੍ਰਬੰਧ ਹੈ। ਜਦੋਂ ਅਜਿਹੀ ਸਥਿਤੀ ਪੈਦਾ ਹੁੰਦੀ ਹੈ, ਤਾਂ ਇਹ ਮੈਡੀਕਲ ਟੀਮ ਤੁਰੰਤ ਹਰਕਤ ਵਿੱਚ ਆਉਂਦੀ ਹੈ ਅਤੇ ਕਿਸੇ ਵੀ ਵਿਅਕਤੀ ਦੇ ਜ਼ਖਮੀ ਹੋਣ ਦਾ ਇਲਾਜ ਕਰਦੀ ਹੈ।
ਕ੍ਰਿਕਟ ਮੈਚ ਦੌਰਾਨ ਹਮੇਸ਼ਾ ਮੌਜੂਦ ਮੈਡੀਕਲ ਟੀਮ ਵਿੱਚ ਆਮ ਤੌਰ 'ਤੇ ਫਸਟ ਏਡ, ਐਂਬੂਲੈਂਸ ਸੇਵਾ ਤੇ ਹੋਰ ਡਾਕਟਰ ਸ਼ਾਮਲ ਹੁੰਦੇ ਹਨ। ਇਸ ਟੀਮ ਦਾ ਕੰਮ ਤੁਰੰਤ ਸਹਾਇਤਾ ਪ੍ਰਦਾਨ ਕਰਨਾ ਅਤੇ ਗੰਭੀਰ ਮਾਮਲਿਆਂ ਵਿੱਚ ਮਰੀਜ਼ ਨੂੰ ਲੋੜ ਅਨੁਸਾਰ ਹਸਪਤਾਲ ਭੇਜਣਾ ਹੈ।
ਹੁਣ ਸਵਾਲ ਇਹ ਪੈਦਾ ਹੁੰਦਾ ਹੈ ਕਿ ਹਸਪਤਾਲ ਦਾ ਖਰਚਾ ਕੌਣ ਅਦਾ ਕਰੇਗਾ ? ਜਦੋਂ ਇਹ ਟੀਮ ਕਿਸੇ ਨੂੰ ਹਸਪਤਾਲ ਰੈਫਰ ਕਰਦੀ ਹੈ ਤਾਂ ਉਸ ਦਾ ਇਲਾਜ ਤੁਰੰਤ ਸ਼ੁਰੂ ਕਰ ਦਿੱਤਾ ਜਾਂਦਾ ਹੈ। ਭਾਰਤ ਵਿੱਚ ਜੇ ਕੋਈ ਦਰਸ਼ਕ ਜ਼ਖ਼ਮੀ ਹੋ ਜਾਂਦਾ ਹੈ ਤਾਂ ਬੀਸੀਸੀਆਈ ਦੇ ਮੈਡੀਕਲ ਅਧਿਕਾਰੀ ਮਰੀਜ਼ ਦੀ ਮਦਦ ਕਰਦੇ ਹਨ। ਹਾਲਾਂਕਿ ਹੁਣ ਤੱਕ ਭਾਰਤ 'ਚ ਅਜਿਹੀ ਕੋਈ ਸਥਿਤੀ ਸਾਹਮਣੇ ਨਹੀਂ ਆਈ ਹੈ, ਜਿਸ 'ਚ ਕੋਈ ਦਰਸ਼ਕ ਗੇਂਦ ਨਾਲ ਜ਼ਖ਼ਮੀ ਹੋ ਗਿਆ ਹੋਵੇ ਅਤੇ ਉਸ ਨੂੰ ਹਸਪਤਾਲ 'ਚ ਦਾਖਲ ਕਰਵਾਉਣਾ ਪਿਆ ਹੋਵੇ।
ਜੇ ਕੋਈ ਭਾਰਤੀ ਖਿਡਾਰੀ ਮੈਚ ਦੌਰਾਨ ਗੰਭੀਰ ਰੂਪ ਨਾਲ ਜ਼ਖਮੀ ਹੋ ਜਾਂਦਾ ਹੈ ਤਾਂ ਉਸ ਦੇ ਇਲਾਜ ਦਾ ਸਾਰਾ ਖਰਚਾ ਬੀ.ਸੀ.ਸੀ.ਆਈ. ਚੱਕਦੀ ਹੈ। ਅਜਿਹੇ ਕਈ ਮਾਮਲੇ ਦੇਖਣ ਨੂੰ ਮਿਲੇ ਹਨ, ਜਿਸ 'ਚ ਇੱਕ ਭਾਰਤੀ ਖਿਡਾਰੀ ਮੈਚ ਦੌਰਾਨ ਜ਼ਖਮੀ ਹੋ ਗਿਆ ਸੀ ਅਤੇ ਉਸ ਨੂੰ ਹਸਪਤਾਲ 'ਚ ਭਰਤੀ ਕਰਵਾਉਣਾ ਪਿਆ ਸੀ। ਇਸੇ ਤਰ੍ਹਾਂ ਜੇਕਰ ਕਿਸੇ ਹੋਰ ਦੇਸ਼ ਦਾ ਕੋਈ ਕ੍ਰਿਕਟਰ ਜ਼ਖਮੀ ਹੋ ਜਾਂਦਾ ਹੈ ਤਾਂ ਉਸ ਦੇ ਇਲਾਜ ਦਾ ਖਰਚਾ ਉਸ ਦੇਸ਼ ਦਾ ਕ੍ਰਿਕਟ ਬੋਰਡ ਚੁੱਕਦਾ ਹੈ।