ਹੇਲਜ਼-ਰੌਏ ਦੇ ਕਮਾਲ ਸਾਹਮਣੇ ਸ਼੍ਰੀਲੰਕਾ ਢੇਰ

ਟਾਸ ਜਿੱਤ ਕੇ ਬੱਲੇਬਾਜ਼ੀ ਕਰਨ ਉਤਰੀ ਸ਼੍ਰੀਲੰਕਾ ਦੀ ਟੀਮ ਨੇ ਥਰੰਗਾ ਅਤੇ ਚੰਡੀਮਲ ਦੇ ਅਰਧ-ਸੈਂਕੜਿਆਂ ਆਸਰੇ ਨਿਰਧਾਰਿਤ 50 ਓਵਰਾਂ 'ਚ 7 ਵਿਕਟਾਂ ਗਵਾ ਕੇ 254 ਰਨ ਦਾ ਸਨਮਾਨਜਨਕ ਸਕੋਰ ਖੜਾ ਕੀਤਾ।

ਇੰਗਲੈਂਡ ਨੇ ਸ਼੍ਰੀਲੰਕਾ ਖਿਲਾਫ ਦੂਜੇ ਵਨਡੇ 'ਚ 10 ਵਿਕਟਾਂ ਨਾਲ ਜਿੱਤ ਦਰਜ ਕੀਤੀ। ਹੇਲਜ਼ ਅਤੇ ਰੌਏ ਦੀ ਸਲਾਮੀ ਜੋੜੀ ਨੇ ਸ਼੍ਰੀਲੰਕਾ ਦੇ ਗੇਂਦਬਾਜਾਂ ਖਿਲਾਫ ਚੌਕੇ-ਛੱਕਿਆਂ ਦੀ ਬਰਸਾਤ ਕਰ ਦਿੱਤੀ ਅਤੇ ਇੰਗਲੈਂਡ ਨੇ ਆਸਾਨੀ ਨਾਲ ਮੈਚ ਆਪਣੇ ਨਾਮ ਕਰ ਲਿਆ।

ਸ਼੍ਰੀਲੰਕਾ ਦੀ ਟੀਮ ਨੇ ਇਹ ਸਕੋਰ ਬਣਾਉਣ ਤੋਂ ਬਾਅਦ ਇਹ ਸੋਚਿਆ ਵੀ ਨਹੀਂ ਹੋਵੇਗਾ ਕਿ ਇੰਗਲੈਂਡ ਦੇ ਬੱਲੇਬਾਜ਼ ਮੈਦਾਨ 'ਤੇ ਤੂਫਾਨ ਖੜਾ ਕਰਨ ਵਾਲੇ ਹਨ।

ਐਲੇਕਸ ਹੇਲਜ਼ ਅਤੇ ਜੇਸਨ ਰੌਏ ਦੀ ਸਲਾਮੀ ਜੋੜੀ ਨੇ 255 ਰਨ ਦੇ ਟੀਚੇ ਨੂੰ ਇਸ ਤਰ੍ਹਾਂ ਪਰ ਕੀਤਾ ਜਿਵੇਂ ਕਿ ਟੀਮ ਬਹੁਤ ਛੋਟੇ ਟੀਚੇ ਦਾ ਪਿੱਛਾ ਕਰ ਰਹੀ ਹੋਵੇ। ਹੇਲਜ਼ ਅਤੇ ਰੌਏ ਨੇ ਸੈਂਕੜੇ ਠੋਕੇ ਅਤੇ ਦੋਨੇ ਬੱਲੇਬਾਜ਼ਾਂ ਨੇ ਮਿਲਕੇ 35ਵੇਂ ਓਵਰ 'ਚ ਹੀ ਟੀਚਾ ਹਾਸਿਲ ਕਰ ਲਿਆ।

ਹੇਲਜ਼ ਅਤੇ ਰੌਏ ਨੇ 55 ਗੇਂਦਾਂ 'ਤੇ ਆਪਣੇ ਅਰਧ-ਸੈਂਕੜੇ ਪੂਰੇ ਕੀਤੇ। ਫਿਰ ਹੇਲਜ਼ ਆਪਣੇ ਸੈਂਕੜੇ ਤਕ ਪਹਿਲਾਂ ਪੁੱਜੇ। ਹੇਲਜ਼ ਨੇ 91 ਗੇਂਦਾਂ 'ਤੇ ਸੈਂਕੜਾ ਪੂਰਾ ਕੀਤਾ। ਕੁਝ ਹੀ ਦੇਰ 'ਚ ਰੌਏ ਨੇ ਵੀ 92 ਗੇਂਦਾਂ 'ਤੇ ਆਪਣਾ ਸੈਂਕੜਾ ਪੂਰਾ ਕਰ ਲਿਆ।

ਅੰਤ 'ਚ ਹੇਲਜ਼ ਨੇ 110 ਗੇਂਦਾਂ 'ਤੇ 133 ਰਨ ਦੀ ਨਾਬਾਦ ਪਾਰੀ ਖੇਡੀ। ਹੇਲਜ਼ ਦੀ ਪਾਰੀ 'ਚ 10 ਚੌਕੇ ਅਤੇ 6 ਛੱਕੇ ਸ਼ਾਮਿਲ ਸਨ। ਰੌਏ ਨੇ 95 ਗੇਂਦਾਂ 'ਤੇ ਨਾਬਾਦ 112 ਰਨ ਬਣਾਏ। ਰੌਏ ਨੇ ਆਪਣੀ ਪਾਰੀ ਦੌਰਾਨ 7 ਚੌਕੇ ਅਤੇ 4 ਛੱਕੇ ਜੜੇ।

ਇਹ ਵਨਡੇ ਇਤਿਹਾਸ 'ਚ ਬਿਨਾ ਵਿਕਟ ਗਵਾਏ ਪਾਰ ਕੀਤਾ ਗਿਆ ਸਭ ਤੋਂ ਵੱਡਾ ਟੀਚਾ ਹੈ। ਜੇਸਨ ਰੌਏ ਨੂੰ ਮੈਨ ਆਫ ਦ ਮੈਚ ਚੁਣਿਆ ਗਿਆ। ਇਸ ਜਿੱਤ ਦੇ ਨਾਲ ਹੀ ਇੰਗਲੈਂਡ ਨੇ ਸੀਰੀਜ਼ 'ਚ 1-0 ਦੀ ਲੀਡ ਹਾਸਿਲ ਕਰ ਲਈ। ਸੀਰੀਜ਼ ਦਾ ਪਹਿਲਾ ਮੈਚ ਟਾਈ ਹੋ ਗਿਆ ਸੀ।