5 ਸਾਲ ਬਾਅਦ ਫਾਈਨਲ 'ਚ ਪਹੁੰਚੇ ਫੈਡਰਰ

ਸੈਮੀਫਾਈਨਲ 'ਚ ਹਮਵਤਨ ਸਟੈਨਿਸਲਾਸ ਵਾਵਰਿੰਕਾ ਨੂੰ ਮਾਤ ਦੇਕੇ ਫੈਡਰਰ ਨੇ 5 ਸਾਲ ਬਾਅਦ ਆਸਟ੍ਰੇਲੀਅਨ ਓਪਨ ਦੇ ਫਾਈਨਲ 'ਚ ਐਂਟਰੀ ਕੀਤੀ ਹੈ।

ਸਾਬਕਾ ਵਿਸ਼ਵ ਨੰਬਰ 1 ਖਿਡਾਰੀ ਸਵਿਟਜ਼ਰਲੈਂਡ ਦੇ ਰਾਜਰ ਫੈਡਰਰ ਨੇ ਆਸਟ੍ਰੇਲੀਅਨ ਓਪਨ ਗਰੈਂਡ ਸਲੈਮ ਦੇ ਫਾਈਨਲ 'ਚ ਐਂਟਰੀ ਕਰ ਲਈ ਹੈ।

ਫੈਡਰਰ ਨੇ ਪਹਿਲਾ ਸੈਟ ਟਾਈ ਬ੍ਰੇਕਰ 'ਚ ਜਿੱਤਿਆ। ਦੂਜੇ ਸੈਟ 'ਚ ਬਾਜ਼ੀ ਮਾਰ ਫੈਡਰਰ ਨੇ ਮੈਚ ਜਿੱਤਣ ਦੇ ਆਸਾਰ ਮਜਬੂਤ ਬਣਾ ਲਏ ਸਨ। ਪਰ ਫਿਰ ਵਾਵਰਿੰਕਾ ਨੇ ਲਗਾਤਾਰ 2 ਸੈਟ ਜਿੱਤੇ ਅਤੇ ਮੈਚ 5ਵੇਂ ਸੈਟ 'ਤੇ ਪਹੁੰਚਿਆ। ਆਖਰੀ ਸੈਟ 'ਚ ਫੈਡਰਰ ਨੇ ਬੇਹਤਰ ਖੇਡ ਵਿਖਾਇਆ ਅਤੇ ਮੈਚ ਆਪਣੇ ਨਾਮ ਕਰ ਲਿਆ।

ਸੈਮੀਫਾਈਨਲ ਮੈਚ ਰੋਮਾਂਚ ਨਾਲ ਭਰਪੂਰ ਸੀ ਅਤੇ ਇਹ ਮੈਚ 5 ਸੈਟ ਤਕ ਚੱਲਿਆ। ਫੈਡਰਰ ਨੇ ਵਾਵਰਿੰਕਾ ਨੂੰ 7-5, 6-3, 1-6, 4-6, 6-3 ਦੇ ਫਰਕ ਨਾਲ ਮਾਤ ਦਿੱਤੀ।

ਫਾਈਨਲ 'ਚ ਫੈਡਰਰ ਦਾ ਮੁਕਾਬਲਾ ਨਡਾਲ ਅਤੇ ਦਿਮਿਟਰੌਵ ਦੇ ਮੈਚ ਦੇ ਜੇਤੂ ਖਿਡਾਰੀ ਨਾਲ ਹੋਵੇਗਾ।

ਇਸਤੋਂ ਪਹਿਲਾਂ ਫੈਡਰਰ ਸਾਲ 2010 'ਚ ਆਸਟ੍ਰੇਲੀਅਨ ਓਪਨ ਦੇ ਫਾਈਨਲ 'ਚ ਪਹੁੰਚੇ ਸਨ ਜਿਥੇ ਉਨ੍ਹਾਂ ਨੇ ਜਿੱਤ ਦਰਜ ਕੀਤੀ ਸੀ। ਵਾਵਰਿੰਕਾ ਨੇ ਸਾਲ 2014 'ਚ ਆਸਟ੍ਰੇਲੀਅਨ ਓਪਨ ਦਾ ਖਿਤਾਬ ਆਪਣੇ ਨਾਮ ਕੀਤਾ ਸੀ।