ਪੈਰਿਸ ਓਲੰਪਿਕ 2024 ਵਿੱਚ ਭਾਰਤੀ ਖਿਡਾਰੀਆਂ ਦਾ ਹੁਣ ਤੱਕ ਦਾ ਪ੍ਰਦਰਸ਼ਨ ਉਮੀਦਾਂ ਦੇ ਉਲਟ ਰਿਹਾ ਹੈ। ਭਾਰਤ ਦੇ ਖਾਤੇ ਵਿੱਚ ਇਸ ਸਮੇਂ ਪੰਜ ਤਗਮੇ (ਚਾਰ ਕਾਂਸੀ, ਇੱਕ ਚਾਂਦੀ) ਹਨ, ਜੋ ਟੋਕੀਓ ਓਲੰਪਿਕ ਤੋਂ ਘੱਟ ਹਨ। ਭਾਰਤ ਨੇ ਟੋਕੀਓ ਵਿੱਚ 7 ਤਗਮੇ ਜਿੱਤ ਕੇ ਇਤਿਹਾਸ ਰਚਿਆ ਸੀ, ਜੋ ਭਾਰਤ ਦਾ ਸਭ ਤੋਂ ਵਧੀਆ ਓਲੰਪਿਕ ਪ੍ਰਦਰਸ਼ਨ ਸੀ। ਹਾਲਾਂਕਿ ਪੈਰਿਸ 'ਚ ਭਾਰਤੀ ਖਿਡਾਰੀ ਟੋਕੀਓ ਦਾ ਰਿਕਾਰਡ ਤੋੜਦੇ ਨਜ਼ਰ ਨਹੀਂ ਆ ਰਹੇ ਹਨ। ਤੁਹਾਨੂੰ ਦੱਸ ਦੇਈਏ ਕਿ ਭਾਰਤ ਸਰਕਾਰ ਨੇ ਪੈਰਿਸ ਓਲੰਪਿਕ ਦੀਆਂ ਤਿਆਰੀਆਂ ਲਈ ਆਪਣੇ ਐਥਲੀਟਾਂ 'ਤੇ 470 ਕਰੋੜ ਰੁਪਏ ਤੋਂ ਵੱਧ ਖਰਚ ਕੀਤੇ ਹਨ। ਭਾਰਤ ਨੇ 16 ਖੇਡਾਂ ਵਿੱਚ ਹਿੱਸਾ ਲੈਣ ਲਈ 117 ਮੈਂਬਰੀ ਦਲ ਪੈਰਿਸ ਭੇਜਿਆ ਹੈ।
ਇਨ੍ਹਾਂ ਨੇ ਹਾਸਲ ਕੀਤੇ ਪੈਰਿਸ 'ਚ ਤਮਗੇ
ਭਾਰਤ ਨੇ ਪੈਰਿਸ ਵਿੱਚ ਨਿਸ਼ਾਨੇਬਾਜ਼ੀ ਵਿੱਚ ਪੰਜ ਵਿੱਚੋਂ ਤਿੰਨ ਤਗ਼ਮੇ ਜਿੱਤੇ ਹਨ। ਸਟਾਰ ਨਿਸ਼ਾਨੇਬਾਜ਼ ਮਨੂ ਭਾਕਰ ਨੇ ਦੋ ਕਾਂਸੀ ਦੇ ਤਗਮੇ ਜਿੱਤੇ। 10 ਮੀਟਰ ਏਅਰ ਪਿਸਟਲ ਈਵੈਂਟ ਤੋਂ ਇਲਾਵਾ ਉਸ ਨੇ ਸਰਬਜੋਤ ਸਿੰਘ ਨਾਲ 10 ਮੀਟਰ ਮਿਕਸਡ ਟੀਮ ਏਅਰ ਪਿਸਟਲ ਮੁਕਾਬਲੇ ਵਿੱਚ ਵੀ ਕਾਂਸੀ ਦਾ ਤਗਮਾ ਜਿੱਤਿਆ। ਮਨੂ ਆਜ਼ਾਦੀ ਤੋਂ ਬਾਅਦ ਇੱਕ ਓਲੰਪਿਕ ਵਿੱਚ ਦੋ ਤਗਮੇ ਜਿੱਤਣ ਵਾਲੀ ਪਹਿਲੀ ਭਾਰਤੀ ਹੈ। ਨਿਸ਼ਾਨੇਬਾਜ਼ ਸਵਪਨਿਲ ਕੁਸਾਲੇ ਨੇ 50 ਮੀਟਰ ਰਾਈਫਲ 3 ਪੁਜ਼ੀਸ਼ਨਾਂ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ। ਭਾਰਤੀ ਪੁਰਸ਼ ਹਾਕੀ ਟੀਮ ਨੇ ਸਪੇਨ ਨੂੰ ਹਰਾ ਕੇ ਕਾਂਸੀ ਤਮਗਾ ਜਿੱਤਿਆ। ਜੈਵਲਿਨ ਥ੍ਰੋਅਰ ਨੀਰਜ ਚੋਪੜਾ ਨੇ ਪੁਰਸ਼ਾਂ ਦੇ ਜੈਵਲਿਨ ਥ੍ਰੋਅ ਮੁਕਾਬਲੇ ਵਿੱਚ ਚਾਂਦੀ ਦਾ ਤਗਮਾ ਜਿੱਤਿਆ।
ਕਿਸ ਖੇਡ 'ਤੇ ਸਭ ਤੋਂ ਵੱਧ ਖਰਚ ਕੀਤਾ ਗਿਆ?
ਸਭ ਤੋਂ ਵੱਧ 96.08 ਕਰੋੜ ਰੁਪਏ ਐਥਲੈਟਿਕਸ 'ਤੇ ਖਰਚ ਕੀਤੇ ਗਏ। ਹਾਲਾਂਕਿ ਨੀਰਜ ਤੋਂ ਇਲਾਵਾ ਹੁਣ ਤੱਕ ਕੋਈ ਵੀ ਐਥਲੈਟਿਕਸ 'ਚ ਭਾਰਤ ਲਈ ਤਮਗਾ ਨਹੀਂ ਜਿੱਤ ਸਕਿਆ ਹੈ। ਭਾਰਤ ਨੇ ਪੈਰਿਸ ਲਈ 29 ਮੈਂਬਰੀ ਟਰੈਕ ਅਤੇ ਫੀਲਡ ਟੀਮ ਭੇਜੀ ਹੈ। ਐਥਲੈਟਿਕਸ ਤੋਂ ਬਾਅਦ ਬੈਡਮਿੰਟਨ ਨੂੰ ਸਭ ਤੋਂ ਵੱਧ ਫੰਡ (72.03 ਕਰੋੜ) ਮਿਲੇ ਹਨ। ਸਟਾਰ ਸ਼ਟਲਰ ਪੀਵੀ ਸਿੰਧੂ ਅਤੇ ਲਕਸ਼ਯ ਸੇਨ ਤਗਮੇ ਨਹੀਂ ਜਿੱਤ ਸਕੇ। ਮੁੱਕੇਬਾਜ਼ੀ 'ਤੇ 60.93 ਕਰੋੜ ਰੁਪਏ ਖਰਚ ਕੀਤੇ ਗਏ ਪਰ ਕੋਈ ਸਫਲਤਾ ਨਹੀਂ ਮਿਲੀ। ਲਗਾਤਾਰ ਦੋ ਵਿਸ਼ਵ ਚੈਂਪੀਅਨਸ਼ਿਪ ਖਿਤਾਬ ਜਿੱਤਣ ਵਾਲੀ ਨਿਕਾਤ ਜ਼ਰੀਨ ਤਮਗਾ ਹਾਸਲ ਨਹੀਂ ਕਰ ਸਕੀ। ਸ਼ੂਟਿੰਗ ਲਈ 60.42 ਕਰੋੜ ਰੁਪਏ ਅਤੇ ਹਾਕੀ ਨੂੰ 41.3 ਕਰੋੜ ਰੁਪਏ ਦਿੱਤੇ ਗਏ ਹਨ।
ਤੀਰਅੰਦਾਜ਼ੀ 'ਤੇ 39.18 ਕਰੋੜ ਰੁਪਏ ਅਤੇ ਕੁਸ਼ਤੀ 'ਤੇ 37.80 ਕਰੋੜ ਰੁਪਏ ਖਰਚ ਕੀਤੇ ਗਏ ਹਨ। ਦੋਵਾਂ ਕੋਲ 6-6 ਖਿਡਾਰੀਆਂ ਦੀ ਟੀਮ ਸੀ ਪਰ ਤਮਗਾ ਨਹੀਂ ਮਿਲਿਆ। ਤੀਰਅੰਦਾਜ਼ ਦੀਪਕਾ ਕੁਮਾਰੀ ਆਪਣੇ ਚੌਥੇ ਓਲੰਪਿਕ ਵਿੱਚ ਖਾਲੀ ਹੱਥ ਪਰਤੀ। ਇਸ ਦੇ ਨਾਲ ਹੀ ਪਹਿਲਵਾਨ ਵਿਨੇਸ਼ ਫੋਗਾਟ ਦਾ ਤਮਗੇ ਦਾ ਸੁਪਨਾ ਅਯੋਗ ਹੋਣ ਕਾਰਨ ਚਕਨਾਚੂਰ ਹੋ ਗਿਆ। ਉਸ ਨੇ ਘੱਟੋ-ਘੱਟ ਚਾਂਦੀ ਪੱਕੀ ਕਰ ਲਈ ਸੀ। ਵਿਨੇਸ਼ ਨੇ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ। ਵੇਟਲਿਫਟਿੰਗ (27 ਕਰੋੜ), ਟੇਬਲ ਟੈਨਿਸ (12.92 ਕਰੋੜ), ਜੂਡੋ (6.33 ਕਰੋੜ), ਰੋਇੰਗ (3.89 ਕਰੋੜ), ਤੈਰਾਕੀ (3.8 ਕਰੋੜ), ਸੇਲਿੰਗ (3.8 ਕਰੋੜ), ਗੋਲਫ (1.74 ਕਰੋੜ), ਟੈਨਿਸ (1.64 ਕਰੋੜ) ਅਤੇ ਹੋਰਸ ਰਾਈਡਿੰਗ (0.95) ਵਿੱਚ ਵੀ ਮੈਡਲ ਪ੍ਰਾਪਤ ਨਹੀਂ ਹੋਇਆ ਹੈ।
ਭਾਰਤ ਨੂੰ ਇਸ 'ਸਿਕਸ' ਦਾ ਦੁੱਖ ਵੱਖਰਾ
ਪਰਿਲ ਓਲੰਪਿਕ 'ਚ ਹੁਣ ਤੱਕ 6 ਈਵੈਂਟ ਹੋ ਚੁੱਕੇ ਹਨ, ਜਿਨ੍ਹਾਂ 'ਚ ਭਾਰਤੀ ਖਿਡਾਰੀ ਤਮਗੇ ਦੀ ਦਹਿਲੀਜ਼ 'ਤੇ ਪਹੁੰਚ ਕੇ ਖਾਲੀ ਹੱਥ ਪਰਤੇ ਹਨ। ਨਿਸ਼ਾਨੇਬਾਜ਼ ਅਰਜੁਨ ਬਾਬੂਟਾ ਪੁਰਸ਼ਾਂ ਦੀ 10 ਮੀਟਰ ਏਅਰ ਰਾਈਫਲ ਸ਼ੂਟਿੰਗ ਵਿੱਚ ਚੌਥੇ ਸਥਾਨ ’ਤੇ ਰਿਹਾ। ਤੀਰਅੰਦਾਜ਼ ਧੀਰਜ ਬੋਮਾਦੇਵਰਾ ਅਤੇ ਅੰਕਿਤਾ ਭਗਤਾ ਮਿਕਸਡ ਟੀਮ ਮੁਕਾਬਲੇ ਵਿੱਚ ਚੌਥੇ ਸਥਾਨ ’ਤੇ ਰਹੇ। ਮਨੂ ਭਾਕਰ ਨੇ ਭਾਵੇਂ ਦੋ ਕਾਂਸੀ ਦੇ ਤਗਮੇ ਜਿੱਤੇ ਹੋਣ ਪਰ ਉਹ 25 ਮੀਟਰ ਮਹਿਲਾ ਪਿਸਟਲ ਤੋਂ ਖੁੰਝ ਗਈ। ਨਿਸ਼ਾਨੇਬਾਜ਼ ਮਹੇਸ਼ਵਰੀ ਚੌਹਾਨ ਅਤੇ ਅਨੰਤਜੀਤ ਸਿੰਘ ਨਾਰੂਕਾ ਸਕੀਟ ਮਿਕਸਡ ਟੀਮ ਮੁਕਾਬਲੇ ਵਿੱਚ ਹਾਰ ਗਏ, ਜਦੋਂ ਕਿ ਸਟਾਰ ਬੈਡਮਿੰਟਨ ਖਿਡਾਰੀ ਲਕਸ਼ੈ ਸੇਨ ਕਾਂਸੀ ਦੇ ਤਗ਼ਮੇ ਦੇ ਮੈਚ ਵਿੱਚ ਹਾਰ ਗਏ। ਵੇਟਲਿਫਟਰ ਮੀਰਾਬਾਈ ਚਾਨੂ ਵੀ ਚੌਥੇ ਸਥਾਨ 'ਤੇ ਰਹੀ।