Virat Kohli's Fitness: 2021-22 ਦੇ ਸੀਜ਼ਨ 'ਚ ਵਿਰਾਟ ਕੋਹਲੀ ਭਲੇ ਹੀ ਬੱਲੇ ਨਾਲ ਅਸਫਲ ਰਹੇ ਪਰ ਫਿਟਨੈੱਸ ਦੇ ਮਾਮਲੇ 'ਚ ਉਹ ਭਾਰਤੀ ਖਿਡਾਰੀਆਂ 'ਚ ਸਭ ਤੋਂ ਵਧੀਆ ਰਹੇ ਹਨ। ਇਸ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਪਿਛਲੇ ਸੀਜ਼ਨ 'ਚ ਉਸ ਨੂੰ ਕਿਸੇ ਵੀ ਤਰ੍ਹਾਂ ਦੀ ਵੱਡੀ ਸੱਟ ਜਾਂ ਕਿਸੇ ਹੋਰ ਤਰ੍ਹਾਂ ਦੀ ਸਮੱਸਿਆ ਦਾ ਸਾਹਮਣਾ ਨਹੀਂ ਕਰਨਾ ਪਿਆ ਸੀ। ਉਸ ਨੂੰ ਇੱਕ ਵਾਰ ਵੀ ਇਲਾਜ ਲਈ ਨੈਸ਼ਨਲ ਕ੍ਰਿਕਟ ਅਕੈਡਮੀ (ਐਨਸੀਏ) ਜਾਣ ਦੀ ਲੋੜ ਨਹੀਂ ਪਈ, ਜਦੋਂ ਕਿ ਕੁੱਲ 70 ਖਿਡਾਰੀਆਂ ਨੇ ਇਲਾਜ ਲਈ ਐਨਸੀਏ ਦਾ ਦੌਰਾ ਕੀਤਾ।
ਬੀਸੀਸੀਆਈ ਦੇ ਸੀਈਓ ਹਿਮਾਂਗ ਅਮੀਨ ਦੁਆਰਾ ਤਿਆਰ ਕੀਤੀ ਗਈ ਐਨਸੀਏ ਦੀ ਕਾਰਜ ਰਿਪੋਰਟ ਵਿੱਚ ਇਹ ਖ਼ੁਲਾਸਾ ਹੋਇਆ ਹੈ ਕਿ ਪਿਛਲੇ ਸੀਜ਼ਨ ਵਿੱਚ ਦੇਸ਼ ਭਰ ਵਿੱਚ 70 ਖਿਡਾਰੀਆਂ ਨੂੰ 96 ਜਟਿਲ ਸੱਟਾਂ ਲੱਗੀਆਂ ਸਨ, ਜਿਨ੍ਹਾਂ ਦਾ ਇਲਾਜ ਐਨਸੀਏ ਦੀ ਮੈਡੀਕਲ ਟੀਮ ਦੁਆਰਾ ਕੀਤਾ ਗਿਆ ਸੀ। ਇਨ੍ਹਾਂ 70 ਖਿਡਾਰੀਆਂ ਵਿੱਚੋਂ 23 ਸੀਨੀਅਰ ਟੀਮ ਦੇ ਕੇਂਦਰੀ ਠੇਕੇ ਦੇ ਖਿਡਾਰੀਆਂ ਵਿੱਚ ਸ਼ਾਮਲ ਸਨ। 25 ਖਿਡਾਰੀ ਇੰਡੀਆ-ਏ, ਇੱਕ ਖਿਡਾਰੀ ਅੰਡਰ-19, ਸੱਤ ਖਿਡਾਰੀ ਸੀਨੀਅਰ ਮਹਿਲਾ ਟੀਮ ਅਤੇ 14 ਖਿਡਾਰੀ ਵੱਖ-ਵੱਖ ਰਾਜਾਂ ਦੀਆਂ ਟੀਮਾਂ ਦੇ ਸਨ।
ਇਨ੍ਹਾਂ 23 ਕੇਂਦਰੀ ਕੰਟਰੈਕਟ ਖਿਡਾਰੀਆਂ ਨੂੰ ਜਾਣਾ ਪਿਆ ਐੱਨਸੀਏ
ਕਪਤਾਨ ਰੋਹਿਤ ਸ਼ਰਮਾ (ਹੈਮਸਟ੍ਰਿੰਗ), ਉਪ-ਕਪਤਾਨ ਕੇਐਲ ਰਾਹੁਲ (ਪੋਸਟ ਹਰਨੀਆ ਸਰਜਰੀ), ਚੇਤੇਸ਼ਵਰ ਪੁਜਾਰਾ, ਸ਼ਿਖਰ ਧਵਨ, ਹਾਰਦਿਕ ਪੰਡਯਾ, ਸ਼ਿਖਰ ਧਵਨ, ਉਮੇਸ਼ ਯਾਦਵ, ਰਵਿੰਦਰ ਜਡੇਜਾ, ਰਿਸ਼ਭ ਪੰਤ, ਇਸ਼ਾਂਤ ਸ਼ਰਮਾ, ਸ਼੍ਰੇਅਸ ਅਈਅਰ, ਸੂਰਿਆਕੁਮਾਰ, ਮੇਅਕੁਮਾਰ ਏ. , ਯੁਜਵੇਂਦਰ ਚਾਹਲ, ਵਾਸ਼ਿੰਗਟਨ ਸੁੰਦਰ, ਕੁਲਦੀਪ ਯਾਦਵ, ਭੁਵਨੇਸ਼ਵਰ ਕੁਮਾਰ, ਅਜਿੰਕਿਆ ਰਹਾਣੇ, ਆਰ ਅਸ਼ਵਿਨ, ਅਕਸ਼ਰ ਪਟੇਲ, ਰਿਧੀਮਾਨ ਸਾਹਾ।
ਫਿਟਨੈੱਸ ਹੈ ਵਿਰਾਟ ਦੀ ਤਾਕਤ
ਵਿਰਾਟ ਕੋਹਲੀ ਫਿਟਨੈੱਸ ਨੂੰ ਲੈ ਕੇ ਕਾਫੀ ਸਾਵਧਾਨ ਹਨ। ਉਸ ਦੇ ਡਾਈਟ ਚਾਰਟ ਵਿੱਚ ਅਜਿਹੀ ਕੋਈ ਵੀ ਚੀਜ਼ ਸ਼ਾਮਲ ਨਹੀਂ ਹੈ ਜੋ ਉਸ ਦੀ ਫਿਟਨੈੱਸ ਨੂੰ ਪ੍ਰਭਾਵਿਤ ਕਰਦੀ ਹੋਵੇ। ਇਸ ਦੇ ਨਾਲ ਹੀ ਉਹ ਲਗਾਤਾਰ ਵਰਕਆਊਟ ਕਰਦੇ ਹਨ। ਇਹੀ ਕਾਰਨ ਹੈ ਕਿ ਪਿਛਲੇ ਚਾਰ ਸਾਲਾਂ 'ਚ ਉਨ੍ਹਾਂ ਨੂੰ ਅਜਿਹੀ ਕੋਈ ਸੱਟ ਨਹੀਂ ਲੱਗੀ, ਜਿਸ ਕਾਰਨ ਉਨ੍ਹਾਂ ਨੂੰ ਟੀਮ ਤੋਂ ਬਾਹਰ ਹੋਣਾ ਪਿਆ। ਸਾਲ 2018 'ਚ ਆਖਰੀ ਵਾਰ ਉਸ ਨੂੰ ਪਿੱਠ 'ਚ ਦਰਦ ਹੋਇਆ ਸੀ। ਉਦੋਂ ਤੋਂ ਉਸ ਨੇ ਆਪਣੇ ਆਪ ਨੂੰ ਬਿਹਤਰ ਤਰੀਕੇ ਨਾਲ ਫਿੱਟ ਰੱਖਿਆ ਹੈ।