ਯੁਵੀ ਦਾ ਧਮਾਕਾ, ਇੱਕੋ ਓਵਰ 'ਚ 6 ਛੱਕੇ

Written By : ਏਬੀਪੀ ਸਾਂਝਾ | Updated at : 19 Sep 2016 11:50 AM (IST)

ਤਾਰੀਖ਼ - 19 ਸਿਤੰਬਰ

ਸਾਲ - 2007

ਮੈਚ - ਭਾਰਤ ਬਨਾਮ ਇੰਗਲੈਂਡ

ਟੀ-20 ਕ੍ਰਿਕਟ ਵਿਸ਼ਵ ਕੱਪ

ਇੱਕ ਓਵਰ 'ਚ 6 ਛੱਕਿਆਂ ਦਾ ਕਮਾਲ

ਯੁਵਰਾਜ ਸਿੰਘ ਨੇ ਭਾਰਤ ਲਈ ਖੇਡਦੇ ਹੋਏ ਕਈ ਕਮਾਲ ਕੀਤੇ। ਟੈਸਟ ਮੈਚਾਂ 'ਚ ਯੁਵੀ ਕੋਈ ਵੱਡੇ ਕਮਾਲ ਨਹੀਂ ਕਰ ਸਕੇ ਪਰ ਵਨਡੇ ਅਤੇ ਟੀ-20 ਮੈਚਾਂ 'ਚ ਯੁਵੀ ਨੇ ਕਈ ਵਿਸਫੋਟਕ ਪਾਰੀਆਂ ਖੇਡੀਆਂ। ਇੰਨਾ ਪਾਰੀਆਂ ਚੋਂ ਯੁਵੀ ਦੀ ਸਭ ਤੋਂ ਯਾਦਗਾਰੀ ਪਾਰੀ ਅੱਜ ਦੇ ਹੀ ਦਿਨ ਸਾਲ 2007 'ਚ ਇੰਗਲੈਂਡ ਖਿਲਾਫ ਖੇਡੀ ਸੀ।

ਜੇਕਰ ਯੁਵੀ ਦੇ ਟੀ-20 ਕਰਿਅਰ ਤੇ ਨਜਰ ਮਾਰੀਏ ਤਾਂ ਇਹ ਪਾਰੀ ਅਜਿਹੀ ਹੈ ਜਿਸਨੂੰ ਭੁਲਾਉਣਾ ਬੇਹਦ ਮੁਸ਼ਕਿਲ ਹੈ। ਇਹ ਓਹ ਪਾਰੀ ਹੈ ਜਦ ਟੀਮ ਇੰਡੀਆ ਦੇ ਇਸ ਸਿਤਾਰੇ ਨੇ ਟੀ-20 ਵਿਸ਼ਵ ਕੱਪ 'ਚ ਇੰਗਲੈਂਡ ਖਿਲਾਫ 12 ਗੇਂਦਾਂ ਤੇ ਅਰਧ-ਸੈਂਕੜਾ ਜੜਿਆ ਸੀ।

ਭਾਰਤ ਦੀ ਧਮਾਕੇਦਾਰ ਸ਼ੁਰੂਆਤ :

ਸਾਲ 2007 'ਚ ਖੇਡੇ ਗਏ ਇਸ ਮੈਚ 'ਚ ਟੀਮ ਇੰਡੀਆ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਧਮਾਕੇਦਾਰ ਸ਼ੁਰੂਆਤ ਕੀਤੀ। ਗੰਭੀਰ ਅਤੇ ਸਿਹਵਾਗ ਦੇ ਅਰਧ-ਸੈਂਕੜੇ ਭਾਰਤੀ ਟੀਮ ਨੂੰ 136 ਦੌੜਾਂ ਤਕ ਲੈ ਗਏ। ਸਹਿਵਾਗ 52 ਗੇਂਦਾਂ ਤੇ 68 ਦੌੜਾਂ ਬਣਾ ਕੇ, ਅਤੇ ਗੰਭੀਰ 41 ਗੇਂਦਾਂ ਤੇ 58 ਦੌੜਾਂ ਬਣਾ ਕੇ ਆਉਟ ਹੋਏ। ਫਿਰ ਟੀਮ ਇੰਡੀਆ ਨੂੰ 3 ਝਟਕੇ ਲੱਗੇ ਅਤੇ ਮੈਦਾਨ ਤੇ ਪਹੁੰਚ ਗਏ ਯੁਵਰਾਜ ਸਿੰਘ।

ਮੈਦਾਨ ਤੇ ਪਹੁੰਚਿਆ ਸਿਕਸਰ ਕਿੰਗ :

ਭਾਰਤ ਦੀ ਮਜਬੂਤ ਸ਼ੁਰੂਆਤ ਨੂੰ ਦਮਦਾਰ ਅੰਤ ਦੇਣ ਦੀ ਜਿੰਮੇਦਾਰੀ ਯੁਵਰਾਜ ਸਿੰਘ ਦੇ ਮੋਡਿਆਂ ਤੇ ਸੀ। ਬਸ ਫਿਰ ਕੀ ਸੀ, ਸ਼ੁਰੂ ਹੋ ਗਈ ਚੌਕੇ-ਛੱਕਿਆਂ ਦੀ ਵਰਖਾ। ਯੁਵੀ ਨੇ ਸਟੁਅਰਟ ਬ੍ਰੌਡ ਦੇ ਇੱਕੋ ਓਵਰ 'ਚ 6 ਛੱਕੇ ਠੋਕੇ। ਇਸੇ ਦੌਰਾਨ ਯੁਵੀ ਨੇ ਟੀ-20 ਅਤੇ ਅੰਤਰਰਾਸ਼ਟਰੀ ਕ੍ਰਿਕਟ ਇਤਿਹਾਸ ਦਾ ਸਭ ਤੋਂ ਤੇਜ਼ ਅਰਧ-ਸੈਂਕੜਾ ਵੀ ਠੋਕ ਦਿੱਤਾ। ਯੁਵੀ ਨੇ 12 ਗੇਂਦਾਂ ਤੇ ਆਪਣਾ ਅਰਧ-ਸੈਂਕੜਾ ਪੂਰਾ ਕੀਤਾ ਅਤੇ 16 ਗੇਂਦਾਂ ਤੇ 58 ਦੌੜਾਂ ਦੀ ਪਾਰੀ ਖੇਡ ਭਾਰਤੀ ਟੀਮ ਨੂੰ 218 ਦੌੜਾਂ ਦੇ ਸਕੋਰ ਤਕ ਪਹੁੰਚਾ ਦਿੱਤਾ। ਯੁਵੀ ਦੀ ਪਾਰੀ 'ਚ 3 ਚੌਕੇ ਅਤੇ 7 ਛੱਕੇ ਸ਼ਾਮਿਲ ਸਨ।

ਮੈਚ ਦੇ 19ਵੇਂ ਓਵਰ 'ਚ ਹੋਇਆ ਕਮਾਲ :

ਭਾਰਤ ਨੂੰ ਚੰਗੀ ਸ਼ੁਰੂਆਤ ਮਿਲੀ ਪਰ ਜਦ ਤਕ 18ਵਾਂ ਓਵਰ ਖਤਮ ਹੋਇਆ ਤਾਂ ਸਕੋਰ 171 ਦੌੜਾਂ ਤੇ ਪਹੁੰਚਿਆ ਸੀ ਅਤੇ ਭਾਰਤੀ ਟੀਮ ਲਈ 200 ਦੌੜਾਂ ਦੇ ਸਕੋਰ ਤਕ ਪਹੁੰਚਣਾ ਮੁਸ਼ਕਿਲ ਲਗ ਰਿਹਾ ਸੀ। ਪਰ ਯੁਵੀ ਦੇ ਮਨ 'ਚ ਕੀ ਚੱਲ ਰਿਹਾ ਸੀ, ਇਹ ਸਿਰਫ ਯੁਵੀ ਜਾਣਦੇ ਸਨ। ਸਟੁਅਰਟ ਬ੍ਰੌਡ ਇਸ ਵੇਲੇ ਤਕ ਠੀਕ ਗੇਂਦਬਾਜ਼ੀ ਕਰਵਾਕੇ ਆਪਣੇ 3 ਓਵਰਾਂ 'ਚ 24 ਰਨ ਦਿੱਤੇ ਸਨ। ਬ੍ਰੌਡ ਵੀ ਨਹੀਂ ਜਾਣਦੇ ਸਨ ਕਿ ਉਨ੍ਹਾਂ ਨਾਲ ਕੀ ਹੋਣ ਵਾਲਾ ਹੈ। ਜਦ ਤਕ ਮੈਚ ਦਾ ਇਹ 19ਵਾਂ ਓਵਰ ਖਤਮ ਹੋਇਆ ਤਾਂ ਯੁਵੀ ਇਤਿਹਾਸ ਰਚ ਚੁੱਕੇ ਸਨ। ਯੁਵੀ ਨੇ ਇੱਕੋ ਓਵਰ 'ਚ 6 ਛੱਕੇ ਜੜ ਕੇ ਨਾ ਸਿਰਫ ਇਤਿਹਾਸ ਰਚਿਆ ਬਲਕਿ ਭਾਰਤੀ ਟੀਮ ਨੂੰ ਵੀ 200 ਦੌੜਾਂ ਦੇ ਪਾਰ ਪਹੁੰਚਾਇਆ।