ਪੰਜਾਬ ‘ਚ PG ਰਿਹਾਇਸ਼ ਅਤੇ ਟਿਫਿਨ ਕਾਰੋਬਾਰ ਨੂੰ ਮਿਲੀ ਰਫ਼ਤਾਰ, ਸਰਵੇਖਣ ਨੇ ਖੋਲ੍ਹੇ ਰਾਜ
Punjab PG Accommodation Business : ਪੰਜਾਬ ਵਿੱਚ ਲੋਕ ਰਵਾਇਤੀ ਕਾਰੋਬਾਰਾਂ ਤੋਂ ਇਲਾਵਾ ਹੁਣ ਪੇਇੰਗ ਗੈਸਟ (PG) ਰਿਹਾਇਸ਼, ਟਿਫ਼ਿਨ ਸੇਵਾਵਾਂ ਅਤੇ ਘਰ-ਅਧਾਰਿਤ ਛੋਟੇ ਕਾਰੋਬਾਰਾਂ ਰਾਹੀਂ ਵੀ ਵੱਡੇ ਪੱਧਰ 'ਤੇ ਆਮਦਨ ਕਮਾ ਰਹੇ ਹਨ
Punjab PG Accommodation Business : ਪੰਜਾਬ ਵਿੱਚ ਲੋਕ ਰਵਾਇਤੀ ਕਾਰੋਬਾਰਾਂ ਤੋਂ ਇਲਾਵਾ ਹੁਣ ਪੇਇੰਗ ਗੈਸਟ (PG) ਰਿਹਾਇਸ਼, ਟਿਫ਼ਿਨ ਸੇਵਾਵਾਂ ਅਤੇ ਘਰ-ਅਧਾਰਿਤ ਛੋਟੇ ਕਾਰੋਬਾਰਾਂ ਰਾਹੀਂ ਵੀ ਵੱਡੇ ਪੱਧਰ 'ਤੇ ਆਮਦਨ ਕਮਾ ਰਹੇ ਹਨ। ਅੰਕੜਾ ਅਤੇ ਪ੍ਰੋਗਰਾਮ ਲਾਗੂਕਰਨ ਮੰਤਰਾਲੇ ਵੱਲੋਂ ਕਰਵਾਏ ਗਏ ਛੇਵੇਂ ਅਖਿਲ ਭਾਰਤੀ ਆਰਥਿਕ ਸਰਵੇਖਣ ਵਿੱਚ ਇਹ ਰੁਝਾਨ ਸਾਹਮਣੇ ਆਇਆ ਹੈ। ਰਿਪੋਰਟ ਅਨੁਸਾਰ ਪੰਜਾਬ ਵਿੱਚ ਇਸ ਸਮੇਂ ਕੁੱਲ 36.46 ਲੱਖ ਅਦਾਰੇ ਕੰਮ ਕਰ ਰਹੇ ਹਨ, ਜਿਨ੍ਹਾਂ ਵਿੱਚੋਂ 23.63 ਲੱਖ ਅਦਾਰੇ ਇੱਕ ਜਾਂ ਇਸ ਤੋਂ ਵੱਧ ਕਰਮਚਾਰੀਆਂ ਨੂੰ ਰੁਜ਼ਗਾਰ ਦੇ ਰਹੇ ਹਨ। ਸਰਵੇਖਣ ਦੱਸਦਾ ਹੈ ਕਿ ਸੰਗਠਿਤ ਅਤੇ ਅਸੰਗਠਿਤ ਦੋਵਾਂ ਖੇਤਰਾਂ ਵਿੱਚ ਛੋਟੇ ਕਾਰੋਬਾਰਾਂ ਦੀ ਭੂਮਿਕਾ ਲਗਾਤਾਰ ਵਧ ਰਹੀ ਹੈ, ਜਦਕਿ ਸਿਰਫ 2.69 ਫ਼ੀਸਦੀ ਅਦਾਰੇ ਹੀ 10 ਤੋਂ ਵੱਧ ਕਰਮਚਾਰੀਆਂ ਨੂੰ ਨੌਕਰੀ ਦਿੰਦੇ ਹਨ।
ਪ੍ਰਚੂਨ ਵਪਾਰ ਅਤੇ PG ਸੇਵਾਵਾਂ ਦਾ ਵਾਧਾ
ਪ੍ਰਚੂਨ ਵਪਾਰ ਖੇਤਰ ਵਿੱਚ 3.64 ਲੱਖ ਯੂਨਿਟ ਸਰਗਰਮ ਹਨ, ਜਿਨ੍ਹਾਂ ਵਿੱਚੋਂ 91,835 ਅਦਾਰੇ ਇੱਕ ਜਾਂ ਵੱਧ ਕਰਮਚਾਰੀਆਂ ਨੂੰ ਰੁਜ਼ਗਾਰ ਦੇ ਰਹੇ ਹਨ। ਇਸੇ ਤਰ੍ਹਾਂ ਰਿਹਾਇਸ਼ ਅਤੇ ਭੋਜਨ ਸੇਵਾ ਖੇਤਰ ਵਿੱਚ 56,448 ਅਦਾਰੇ ਕੰਮ ਕਰ ਰਹੇ ਹਨ, ਜਿਨ੍ਹਾਂ ਵਿੱਚੋਂ 20,821 ਇੱਕ ਤੋਂ ਵੱਧ ਕਰਮਚਾਰੀਆਂ ਨਾਲ ਚੱਲ ਰਹੇ ਹਨ ਸ਼ਹਿਰੀ ਖੇਤਰਾਂ ਵਿੱਚ PG ਰਿਹਾਇਸ਼ਾਂ, ਕਿਰਾਏ ਦੇ ਕਮਰੇ ਅਤੇ ਟਿਫ਼ਿਨ ਸੇਵਾਵਾਂ ਆਮਦਨ ਦਾ ਮਹੱਤਵਪੂਰਨ ਸਰੋਤ ਬਣ ਰਹੀਆਂ ਹਨ। ਵਿਦਿਆਰਥੀਆਂ ਅਤੇ ਨੌਕਰੀਪੇਸ਼ਾ ਲੋਕਾਂ ਦੀ ਵਧਦੀ ਮੰਗ ਕਾਰਨ ਇਹ ਕਾਰੋਬਾਰ ਤੇਜ਼ੀ ਨਾਲ ਫੈਲ ਰਹੇ ਹਨ।
ਪਸ਼ੂ ਪਾਲਣ ਅਤੇ ਸਿੱਖਿਆ ਖੇਤਰ ਵੀ ਅੱਗੇ
ਪੰਜਾਬ ਵਿੱਚ ਪਸ਼ੂ ਪਾਲਣ ਖੇਤਰ ਦੇ 2.61 ਲੱਖ ਅਦਾਰੇ ਹਨ, ਜਿਨ੍ਹਾਂ ਵਿੱਚੋਂ 49,187 ਅਦਾਰੇ ਹੋਰ ਕਰਮਚਾਰੀਆਂ ਨੂੰ ਰੁਜ਼ਗਾਰ ਦੇ ਰਹੇ ਹਨ। ਡੇਅਰੀ ਫਾਰਮਿੰਗ ਵੱਲ ਕਿਸਾਨਾਂ ਦਾ ਰੁਝਾਨ ਵਧਣ ਕਾਰਨ ਇਹ ਖੇਤਰ ਵੀ ਮਜ਼ਬੂਤ ਹੋਇਆ ਹੈ। ਸਿੱਖਿਆ ਖੇਤਰ ਵਿੱਚ 44,325 ਸੰਸਥਾਵਾਂ ਸਰਗਰਮ ਹਨ ਅਤੇ 36,763 ਅਦਾਰੇ ਇੱਕ ਤੋਂ ਵੱਧ ਕਰਮਚਾਰੀਆਂ ਨੂੰ ਨੌਕਰੀ ਦੇ ਰਹੇ ਹਨ। ਮੁਕਾਬਲੇ ਵਾਲੀਆਂ ਪ੍ਰੀਖਿਆਵਾਂ ਦੀ ਤਿਆਰੀ ਲਈ ਕੋਚਿੰਗ ਸੈਂਟਰਾਂ ਦੀ ਗਿਣਤੀ ਵਿੱਚ ਵੀ ਲਗਾਤਾਰ ਵਾਧਾ ਦਰਜ ਕੀਤਾ ਗਿਆ ਹੈ।
ਨਿਰਮਾਣ ਅਤੇ ਹੋਰ ਸੇਵਾ ਖੇਤਰਾਂ ਦੀ ਭੂਮਿਕਾ
ਰਾਜ ਵਿੱਚ 31,654 ਨਿਰਮਾਣ ਅਦਾਰੇ ਕੰਮ ਕਰ ਰਹੇ ਹਨ, ਜਿਨ੍ਹਾਂ ਵਿੱਚੋਂ 8,849 ਹੋਰ ਲੋਕਾਂ ਨੂੰ ਰੁਜ਼ਗਾਰ ਪ੍ਰਦਾਨ ਕਰਦੇ ਹਨ। ਇਸ ਤੋਂ ਇਲਾਵਾ ਮੋਟਰ ਵਾਹਨ ਅਤੇ ਮੋਟਰਸਾਈਕਲ ਮੁਰੰਮਤ ਨਾਲ ਜੁੜੇ 47,167 ਅਦਾਰੇ ਸਰਗਰਮ ਹਨ, ਜਿਨ੍ਹਾਂ ਵਿੱਚੋਂ 21,146 ਇੱਕ ਜਾਂ ਵੱਧ ਕਰਮਚਾਰੀਆਂ ਨੂੰ ਰੁਜ਼ਗਾਰ ਦਿੰਦੇ ਹਨ। ਪਾਣੀ ਸਪਲਾਈ, ਸੀਵਰੇਜ ਅਤੇ ਰਹਿੰਦ-ਖੂੰਹਦ ਪ੍ਰਬੰਧਨ ਨਾਲ ਜੁੜੇ 16,097 ਅਦਾਰੇ ਵੀ ਕੰਮ ਕਰ ਰਹੇ ਹਨ। ਕਲਾ, ਮਨੋਰੰਜਨ ਅਤੇ ਖੇਡਾਂ ਨਾਲ ਸੰਬੰਧਿਤ 10,013 ਅਦਾਰਿਆਂ ਦੀ ਮੌਜੂਦਗੀ ਵੀ ਰਾਜ ਦੇ ਸੇਵਾ ਖੇਤਰ ਦੀ ਵਿਭਿੰਨਤਾ ਨੂੰ ਦਰਸਾਉਂਦੀ ਹੈ। ਸਰਵੇਖਣ ਦੇ ਅੰਕੜੇ ਸਪੱਸ਼ਟ ਕਰਦੇ ਹਨ ਕਿ ਪੰਜਾਬ ਵਿੱਚ ਛੋਟੇ ਅਤੇ ਘਰੇਲੂ ਕਾਰੋਬਾਰ ਰੁਜ਼ਗਾਰ ਅਤੇ ਆਮਦਨ ਦਾ ਮਹੱਤਵਪੂਰਨ ਸਾਧਨ ਬਣਦੇ ਜਾ ਰਹੇ ਹਨ, ਖ਼ਾਸ ਕਰਕੇ PG ਰਿਹਾਇਸ਼ ਅਤੇ ਟਿਫ਼ਿਨ ਸੇਵਾਵਾਂ ਵਰਗੇ ਖੇਤਰਾਂ ਵਿੱਚ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
