Silver Prices: ਅੱਜ ਫਿਰ ਚਾਂਦੀ ਦੀ ਕੀਮਤ 'ਚ 20,000 ਰੁਪਏ ਤੱਕ ਆਈ ਵੱਡੀ ਗਿਰਾਵਟ, ਜਾਣੋ ਡਿੱਗਣ ਦੇ ਵੱਡੇ ਕਾਰਨ ਅਤੇ ਅੱਗੇ ਕੀ ਹੋ ਸਕਦਾ? ਜਾਣੋ 10 ਗ੍ਰਾਮ ਸੋਨੇ-ਚਾਂਦੀ ਦੇ ਤਾਜ਼ਾ ਰੇਟ
ਜੇਕਰ ਤੁਸੀਂ ਚਾਂਦੀ ਖਰੀਦਣ ਦੀ ਸੋਚ ਰਹੇ ਹੋ ਜਾਂ ਇਸ ਵਿੱਚ ਨਿਵੇਸ਼ ਕੀਤਾ ਹੋਇਆ ਹੈ, ਤਾਂ ਅੱਜ ਦੀ ਖ਼ਬਰ ਤੁਹਾਨੂੰ ਹੈਰਾਨ ਕਰ ਸਕਦੀ ਹੈ। ਚਾਂਦੀ ਦੇ ਬਾਜ਼ਾਰ ਵਿੱਚ ਅੱਜ ਵੱਡਾ ਉਲਟਫੇਰ ਦੇਖਣ ਨੂੰ ਮਿਲਿਆ ਹੈ। ਰਿਕਾਰਡ ਹਾਈ ’ਤੇ ਪਹੁੰਚਣ ਤੋਂ ਬਾਅਦ..
ਜੇਕਰ ਤੁਸੀਂ ਚਾਂਦੀ ਖਰੀਦਣ ਦੀ ਸੋਚ ਰਹੇ ਹੋ ਜਾਂ ਇਸ ਵਿੱਚ ਨਿਵੇਸ਼ ਕੀਤਾ ਹੋਇਆ ਹੈ, ਤਾਂ ਅੱਜ ਦੀ ਖ਼ਬਰ ਤੁਹਾਨੂੰ ਹੈਰਾਨ ਕਰ ਸਕਦੀ ਹੈ। ਚਾਂਦੀ ਦੇ ਬਾਜ਼ਾਰ ਵਿੱਚ ਅੱਜ ਵੱਡਾ ਉਲਟਫੇਰ ਦੇਖਣ ਨੂੰ ਮਿਲਿਆ ਹੈ। ਰਿਕਾਰਡ ਹਾਈ ’ਤੇ ਪਹੁੰਚਣ ਤੋਂ ਬਾਅਦ ਚਾਂਦੀ ਨੇ ਨਿਵੇਸ਼ਕਾਂ ਨੂੰ ਝਟਕਾ ਦਿੱਤਾ ਹੈ। ਪਿਛਲੇ ਦੋ ਦਿਨਾਂ ਵਿੱਚ ਚਾਂਦੀ ਦੀ ਕੀਮਤ ਵਿੱਚ ਇੰਨੀ ਵੱਡੀ ਗਿਰਾਵਟ ਆਈ ਹੈ ਕਿ ਹਰ ਕੋਈ ਹੈਰਾਨ ਹੈ। ਅੱਜ ਮਲਟੀ ਕਮੋਡਿਟੀ ਐਕਸਚੇਂਜ (MCX) ’ਤੇ ਚਾਂਦੀ ਇਕੋ ਦਿਨ ਵਿੱਚ ਕਰੀਬ 5 ਫ਼ੀਸਦੀ ਤੱਕ ਡਿੱਗ ਗਈ। ਕੱਲ੍ਹ ਵੀਰਵਾਰ ਨੂੰ ਚਾਂਦੀ 4 ਲੱਖ ਰੁਪਏ ਪ੍ਰਤੀ ਕਿਲੋ ਦੇ ਪੱਧਰ ਤੱਕ ਪਹੁੰਚੀ ਸੀ, ਪਰ ਕੁਝ ਹੀ ਸਮੇਂ ਵਿੱਚ ਇਸ ਦੀ ਕੀਮਤ ਕਰੀਬ 20 ਹਜ਼ਾਰ ਰੁਪਏ ਘੱਟ ਹੋ ਗਈ।
ਇਸ ਸਥਿਤੀ ਵਿੱਚ ਲੋਕਾਂ ਦੇ ਮਨ ਵਿੱਚ ਸਭ ਤੋਂ ਵੱਡਾ ਸਵਾਲ ਇਹੀ ਹੈ ਕਿ ਚਾਂਦੀ ਇੰਨੀ ਤੇਜ਼ੀ ਨਾਲ ਕਿਉਂ ਡਿੱਗੀ ਅਤੇ ਕੀ ਅੱਗੇ ਵੀ ਇਹ ਗਿਰਾਵਟ ਜਾਰੀ ਰਹੇਗੀ ਜਾਂ ਇੱਥੋਂ ਮੁੜ ਤੇਜ਼ੀ ਆ ਸਕਦੀ ਹੈ। ਆਓ ਜਾਣਦੇ ਹਾਂ ਕਿ ਅਚਾਨਕ ਐਸਾ ਕੀ ਹੋਇਆ ਕਿ ਚਾਂਦੀ ਦੀ ਚਮਕ ਫਿੱਕੀ ਪੈ ਗਈ।
ਅੱਜ ਚਾਂਦੀ-ਸੋਨੇ ਦਾ ਭਾਅ ਕੀ ਹੈ?
30 ਜਨਵਰੀ 2026 ਦੀ ਸਵੇਰ MCX ’ਤੇ ਚਾਂਦੀ ਦੀ ਕੀਮਤ ਵਿੱਚ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲੀ। ਸਵੇਰੇ 9 ਵੱਜ ਕੇ 7 ਮਿੰਟ ’ਤੇ ਮਾਰਚ ਐਕਸਪਾਇਰੀ ਵਾਲੀ ਚਾਂਦੀ 3,79,942 ਰੁਪਏ ਪ੍ਰਤੀ ਕਿਲੋ ’ਤੇ ਟ੍ਰੇਡ ਕਰ ਰਹੀ ਸੀ। ਇਸ ਵਿੱਚ ਕਰੀਬ 19,951 ਰੁਪਏ, ਯਾਨੀ ਲਗਭਗ 4.99 ਫ਼ੀਸਦੀ ਦੀ ਕਮੀ ਦਰਜ ਕੀਤੀ ਗਈ। ਪਿਛਲੇ ਕਾਰੋਬਾਰੀ ਦਿਨ ਚਾਂਦੀ 3,99,893 ਰੁਪਏ ਪ੍ਰਤੀ ਕਿਲੋ ’ਤੇ ਬੰਦ ਹੋਈ ਸੀ, ਜਦਕਿ ਅੱਜ ਬਾਜ਼ਾਰ ਖੁਲਦੇ ਹੀ ਚਾਂਦੀ ਦੀ ਕੀਮਤ ਵਿੱਚ ਤੇਜ਼ ਗਿਰਾਵਟ ਆ ਗਈ। ਜਦਕਿ ਸੋਨਾ ਕਰੀਬ 3 ਹਜ਼ਾਰ ਰੁਪਏ ਡਿੱਗ ਗਿਆ। ਇਸ ਨਾਲ ਸੋਨਾ 1.66 ਲੱਖ ਰੁਪਏ ਪ੍ਰਤੀ 10 ਗ੍ਰਾਮ ਦੇ ਨੇੜੇ ਆ ਗਿਆ ਹੈ।
ਕੱਲ੍ਹ ਤੋਂ ਅੱਜ ਤੱਕ ਚਾਂਦੀ ਕਿੰਨੀ ਡਿੱਗੀ?
29 ਜਨਵਰੀ ਨੂੰ MCX ’ਤੇ ਚਾਂਦੀ ਨੇ ਪਹਿਲੀ ਵਾਰ 4 ਲੱਖ ਰੁਪਏ ਪ੍ਰਤੀ ਕਿਲੋ ਦਾ ਅੰਕੜਾ ਪਾਰ ਕੀਤਾ ਸੀ। ਉਸ ਸਮੇਂ ਬਾਜ਼ਾਰ ਵਿੱਚ ਜ਼ਬਰਦਸਤ ਤੇਜ਼ੀ ਸੀ ਅਤੇ ਚਾਂਦੀ ਸੋਨੇ ਨਾਲੋਂ ਵੀ ਬਿਹਤਰ ਪ੍ਰਦਰਸ਼ਨ ਕਰ ਰਹੀ ਸੀ। ਪਰ ਕੁਝ ਹੀ ਮਿੰਟਾਂ ਵਿੱਚ ਹਾਲਾਤ ਬਦਲ ਗਏ। ਮੁਨਾਫ਼ਾ ਵਸੂਲੀ ਸ਼ੁਰੂ ਹੋਣ ਨਾਲ ਕੀਮਤਾਂ ਤੇਜ਼ੀ ਨਾਲ ਫਿਸਲਣ ਲੱਗ ਪਈਆਂ ਅਤੇ ਇਕੋ ਦਿਨ ਵਿੱਚ ਚਾਂਦੀ ਕਰੀਬ 65,000 ਰੁਪਏ ਤੱਕ ਡਿੱਗ ਗਈ। ਅੱਜ, ਯਾਨੀ 30 ਜਨਵਰੀ ਨੂੰ, ਇਹ ਗਿਰਾਵਟ ਹੋਰ ਵੀ ਗਹਿਰੀ ਹੋ ਗਈ।
ਗਲੋਬਲ ਬਾਜ਼ਾਰ ਵਿੱਚ ਵੀ ਕਮਜ਼ੋਰ ਪਈ ਚਾਂਦੀ
ਚਾਂਦੀ ਦੀ ਗਿਰਾਵਟ ਸਿਰਫ਼ ਦੇਸੀ ਬਾਜ਼ਾਰ ਤੱਕ ਹੀ ਸੀਮਿਤ ਨਹੀਂ ਰਹੀ। ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਵੀ ਚਾਂਦੀ ਦਬਾਅ ਹੇਠ ਨਜ਼ਰ ਆਈ। ਗਲੋਬਲ ਮਾਰਕੀਟ ਵਿੱਚ ਚਾਂਦੀ ਕਰੀਬ 3.5 ਫ਼ੀਸਦੀ ਡਿੱਗ ਕੇ ਲਗਭਗ 110.41 ਡਾਲਰ ਪ੍ਰਤੀ ਔਂਸ ਦੇ ਆਸ-ਪਾਸ ਆ ਗਈ। ਇਸ ਤੋਂ ਪਹਿਲਾਂ ਉੱਥੇ ਵੀ ਚਾਂਦੀ ਨੇ ਤੇਜ਼ ਉਛਾਲ ਦਿਖਾਇਆ ਸੀ, ਪਰ ਅਚਾਨਕ ਹੋਈ ਵਿਕਰੀ ਨੇ ਪੂਰੇ ਮਾਹੌਲ ਨੂੰ ਪਲਟ ਕੇ ਰੱਖ ਦਿੱਤਾ।
ਚਾਂਦੀ ਦੀਆਂ ਕੀਮਤਾਂ ਕਿਉਂ ਡਿੱਗੀਆਂ? ਜਾਣੋ 3 ਵੱਡੀਆਂ ਵਜ੍ਹਾ
1. ਮੋਟਾ ਮੁਨਾਫ਼ਾ ਕਮਾਉਣ ਲਈ ਵਿਕਰੀ (ਪ੍ਰਾਫ਼ਿਟ ਬੁਕਿੰਗ) ਦਾ ਅਸਰ
ਚਾਂਦੀ ਦੀਆਂ ਕੀਮਤਾਂ ਵਿੱਚ ਆਈ ਇਸ ਵੱਡੀ ਗਿਰਾਵਟ ਦੇ ਪਿੱਛੇ ਕਈ ਕਾਰਨ ਹਨ। ਸਭ ਤੋਂ ਵੱਡੀ ਵਜ੍ਹਾ ਮੋਟਾ ਮੁਨਾਫ਼ਾ ਕਮਾਉਣ ਲਈ ਨਿਵੇਸ਼ਕਾਂ ਵੱਲੋਂ ਕੀਤੀ ਗਈ ਵਿਕਰੀ ਨੂੰ ਮੰਨਿਆ ਜਾ ਰਿਹਾ ਹੈ। ਪਿਛਲੇ ਕੁਝ ਹਫ਼ਤਿਆਂ ਦੌਰਾਨ ਚਾਂਦੀ ਬਹੁਤ ਤੇਜ਼ੀ ਨਾਲ ਚੜ੍ਹੀ ਸੀ, ਜਿਸ ਕਾਰਨ ਨਿਵੇਸ਼ਕਾਂ ਨੇ ਉੱਚੇ ਪੱਧਰ ’ਤੇ ਮੁਨਾਫ਼ਾ ਕੱਢਣਾ ਸ਼ੁਰੂ ਕਰ ਦਿੱਤਾ। ਇਸ ਤੋਂ ਇਲਾਵਾ ਬਾਜ਼ਾਰ ਵਿੱਚ ਖਰੀਦ ਦਾ ਦਬਾਅ ਵੀ ਘੱਟ ਹੋ ਗਿਆ ਅਤੇ ਜਿੱਥੇ ਤੱਕ ਕੀਮਤਾਂ ਪਹੁੰਚ ਗਈਆਂ ਸਨ, ਉੱਥੇ ਅਸਲੀ ਮੰਗ ਨਜ਼ਰ ਨਹੀਂ ਆਈ। ਜਿਵੇਂ ਹੀ ਵਿਕਰੀ ਵਧੀ, ਚਾਂਦੀ ਦੀਆਂ ਕੀਮਤਾਂ ਤੇਜ਼ੀ ਨਾਲ ਹੇਠਾਂ ਆ ਗਈਆਂ।
2. ਸੋਨੇ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਦਾ ਅਸਰ
ਸੋਨੇ ਦੀਆਂ ਕੀਮਤਾਂ ਵਿੱਚ ਰਿਕਾਰਡ ਪੱਧਰ ਤੋਂ ਆਈ ਤੇਜ਼ ਗਿਰਾਵਟ ਦਾ ਪ੍ਰਭਾਵ ਚਾਂਦੀ ’ਤੇ ਵੀ ਪਿਆ ਹੈ। ਆਮ ਤੌਰ ’ਤੇ ਜਦੋਂ ਸੋਨਾ ਕਮਜ਼ੋਰ ਹੁੰਦਾ ਹੈ, ਤਾਂ ਚਾਂਦੀ ਵਰਗੀਆਂ ਹੋਰ ਕੀਮਤੀ ਧਾਤਾਂ ’ਤੇ ਵੀ ਦਬਾਅ ਬਣ ਜਾਂਦਾ ਹੈ। ਸੋਨੇ ਵਿੱਚ ਆਈ ਕਮੀ ਤੋਂ ਬਾਅਦ ਨਿਵੇਸ਼ਕਾਂ ਦਾ ਭਰੋਸਾ ਕੁਝ ਹੱਦ ਤੱਕ ਡੋਲਿਆ ਅਤੇ ਉਨ੍ਹਾਂ ਨੇ ਚਾਂਦੀ ਤੋਂ ਵੀ ਪੈਸਾ ਕੱਢਣਾ ਸ਼ੁਰੂ ਕਰ ਦਿੱਤਾ।
3. ਦੁਨੀਆ ਭਰ ਦੀ ਉਥਲ-ਪੁਥਲ ਦਾ ਅਸਰ
ਦੁਨੀਆ ਭਰ ਦੀ ਸਥਿਤੀ ਅਜੇ ਸਪੱਸ਼ਟ ਨਹੀਂ ਹੈ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਈਰਾਨ ਨਾਲ ਪਰਮਾਣੂ ਸਮਝੌਤੇ 'ਤੇ ਗੱਲਬਾਤ ਕਰਨ ਦੀ ਗੱਲ ਕੀਤੀ ਸੀ, ਜਦਕਿ ਈਰਾਨ ਨੇ ਅਮਰੀਕਾ ਅਤੇ ਉਸ ਦੇ ਸਹਿਯੋਗੀਆਂ ਨੂੰ ਜਵਾਬੀ ਕਾਰਵਾਈ ਦੀ ਚਿਤਾਵਨੀ ਦਿੱਤੀ ਹੈ। ਇਸ ਦੇ ਨਾਲ ਹੀ ਅਮਰੀਕਾ ਦੇ ਸੈਂਟਰਲ ਬੈਂਕ ਨੇ ਵਿਆਜ ਦਰਾਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਹੈ। ਨਿਵੇਸ਼ਕ ਜੂਨ ਵਿੱਚ ਸੰਭਾਵਿਤ ਵਿਆਜ ਵਿੱਚ ਕਟੌਤੀ ਦੀ ਉਡੀਕ ਕਰ ਰਹੇ ਹਨ। ਫੇਡ ਮੁਖੀ ਦਾ ਕਾਰਜਕਾਲ ਮਈ 'ਚ ਖਤਮ ਹੋਣ ਵਾਲਾ ਹੈ, ਜਿਸ ਕਾਰਨ ਭਵਿੱਖ ਦੀ ਨੀਤੀ ਨੂੰ ਲੈ ਕੇ ਬਾਜ਼ਾਰ 'ਚ ਅਨਿਸ਼ਚਿਤਤਾ ਬਣੀ ਹੋਈ ਹੈ।
ਕੀ ਅੱਗੇ ਵੀ ਚਾਂਦੀ ਹੋਰ ਡਿੱਗੇਗੀ?
ਮਾਹਿਰਾਂ ਦਾ ਮੰਨਣਾ ਹੈ ਕਿ ਇੰਨੀ ਤੇਜ਼ ਗਿਰਾਵਟ ਤੋਂ ਬਾਅਦ ਕੁਝ ਸਮੇਂ ਲਈ ਚਾਂਦੀ ਦੀਆਂ ਕੀਮਤਾਂ ਵਿੱਚ ਉਤਾਰ-ਚੜ੍ਹਾਅ ਬਣਿਆ ਰਹਿ ਸਕਦਾ ਹੈ। ਜੇਕਰ ਵਿਸ਼ਵ ਪੱਧਰੀ ਸੰਕੇਤ ਕਮਜ਼ੋਰ ਰਹਿੰਦੇ ਹਨ ਅਤੇ ਸੋਨੇ ’ਤੇ ਦਬਾਅ ਬਣਿਆ ਰਹਿੰਦਾ ਹੈ, ਤਾਂ ਚਾਂਦੀ ’ਤੇ ਵੀ ਇਸਦਾ ਅਸਰ ਅੱਗੇ ਤੱਕ ਜਾਰੀ ਰਹਿ ਸਕਦਾ ਹੈ।
ਨਿਵੇਸ਼ਕਾਂ ਨੂੰ ਹੁਣ ਕੀ ਕਰਨਾ ਚਾਹੀਦਾ ਹੈ?
ਜੇ ਤੁਸੀਂ ਪਹਿਲਾਂ ਤੋਂ ਹੀ ਚਾਂਦੀ ਵਿੱਚ ਨਿਵੇਸ਼ ਕੀਤਾ ਹੋਇਆ ਹੈ, ਤਾਂ ਘਬਰਾਹਟ ਵਿੱਚ ਆ ਕੇ ਕੋਈ ਫ਼ੈਸਲਾ ਕਰਨ ਤੋਂ ਬਚੋ। ਕੀਮਤਾਂ ਬਹੁਤ ਤੇਜ਼ੀ ਨਾਲ ਡਿੱਗੀਆਂ ਹਨ, ਇਸ ਲਈ ਕੁਝ ਸਮੇਂ ਲਈ ਸਥਿਰਤਾ ਆਉਣ ਦੀ ਉਡੀਕ ਕਰਨੀ ਬਿਹਤਰ ਰਹੇਗੀ। ਨਵੇਂ ਨਿਵੇਸ਼ਕ ਇੱਕ ਵਾਰ ਵਿੱਚ ਵੱਡੀ ਰਕਮ ਲਗਾਉਣ ਦੀ ਬਜਾਏ ਹੌਲੀ-ਹੌਲੀ ਨਿਵੇਸ਼ ਕਰਨ ਦੀ ਰਣਨੀਤੀ ਅਪਣਾ ਸਕਦੇ ਹਨ। ਬਾਜ਼ਾਰ ਦੀ ਦਿਸ਼ਾ ਸਾਫ਼ ਹੋਣ ਤੋਂ ਬਾਅਦ ਹੀ ਅਗਲਾ ਕਦਮ ਚੁੱਕਣਾ ਸਮਝਦਾਰੀ ਹੋਵੇਗੀ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
