Punjab News: ਪੰਜਾਬ ਦੇ ਲੁਧਿਆਣਾ ਵਿੱਚ ਸੋਮਵਾਰ ਨੂੰ ਆਮ ਆਦਮੀ ਪਾਰਟੀ ਆਪਣਾ ਮੇਅਰ ਬਣਾਉਣ ਜਾ ਰਹੀ ਹੈ। ਆਪ ਪਾਰਟੀ ਭਲਕੇ ਗੁਰੂਨਾਨਕ ਭਵਨ ਵਿਖੇ ਕੌਂਸਲਰ ਦੇ ਸਹੁੰ ਚੁੱਕ ਸਮਾਗਮ ਵਿੱਚ ਮੇਅਰ, ਸੀਨੀਅਰ ਡਿਪਟੀ ਮੇਅਰ ਅਤੇ ਡਿਪਟੀ ਮੇਅਰ ਦਾ ਐਲਾਨ ਕਰੇਗੀ। ਪਰ ਇਸ ਨਾਲ 'ਆਪ' ਨੇ ਕਾਂਗਰਸ ਨੂੰ ਵੱਡਾ ਝਟਕਾ ਦਿੱਤਾ ਹੈ।
ਕਾਂਗਰਸਾ ਦਾ ਇੱਕ ਹੋਰ ਕੌਂਸਲਰ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋ ਗਿਆ ਹੈ। ਵਾਰਡ ਨੰਬਰ 41 ਦੀ ਕੌਂਸਲਰ ਮਮਤਾ ਰਾਣੀ 'ਆਪ' ਵਿੱਚ ਸ਼ਾਮਲ ਹੋ ਗਈ ਹੈ। ਸੂਬਾ ਪ੍ਰਧਾਨ ਅਤੇ ਮੰਤਰੀ ਅਮਨ ਅਰੋੜਾ ਨੇ ਮਮਤਾ ਰਾਣੀ ਤੋਂ ਇਲਾਵਾ, ਸੀਨੀਅਰ ਕਾਂਗਰਸੀ ਆਗੂਆਂ ਬਲਵਿੰਦਰ ਸਿੰਘ, ਮਨੀ ਰਾਮ ਅਤੇ ਵਿਸ਼ਾਲ ਧਵਨ ਨੂੰ ਵੀ ਪਾਰਟੀ ਵਿੱਚ ਸ਼ਾਮਲ ਕੀਤਾ।
ਹੁਣ ਬਿਨਾਂ ਵਿਧਾਇਕਾਂ ਦੀ ਵੋਟਿੰਗ ਤੋਂ ਬਣੇਗਾ 'ਆਪ' ਦਾ ਮੇਅਰ
ਦੱਸ ਦੇਈਏ ਕਿ ਹੁਣ ਤੱਕ ਆਮ ਆਦਮੀ ਪਾਰਟੀ ਵਿਧਾਇਕਾਂ ਨੂੰ ਵੋਟ ਪਾ ਕੇ ਆਪਣਾ ਬਹੁਮਤ ਸਾਬਤ ਕਰਨ ਦੀ ਤਿਆਰੀ ਕਰ ਰਹੀ ਸੀ। ਵਿਧਾਇਕਾਂ ਨੂੰ ਸਦਨ ਵਿੱਚ ਵੋਟ ਪਾਉਣ ਦਾ ਅਧਿਕਾਰ ਹੈ ਜਾਂ ਨਹੀਂ, ਇਸ ਬਾਰੇ ਵਿਵਾਦ ਚੱਲ ਰਹੇ ਸਨ। ਇਹ ਵੀ ਡਰ ਹੈ ਕਿ ਜੇਕਰ ਦੋ ਸਾਲਾਂ ਬਾਅਦ ਵਿਧਾਨ ਸਭਾ ਚੋਣਾਂ ਵਿੱਚ 'ਆਪ' ਵਿਧਾਇਕਾਂ ਦੀ ਗਿਣਤੀ ਘੱਟ ਜਾਂਦੀ ਹੈ, ਤਾਂ ਪਾਰਟੀ ਨਿਗਮ ਸਦਨ ਵਿੱਚ ਦੁਬਾਰਾ ਘੱਟ ਗਿਣਤੀ ਵਿੱਚ ਹੋ ਜਾਵੇਗੀ। ਪਰ ਮਮਤਾ ਰਾਣੀ ਦੇ 'ਆਪ' ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ, ਹੁਣ ਆਮ ਆਦਮੀ ਪਾਰਟੀ ਵਿਧਾਇਕਾਂ ਦੀ ਵੋਟਿੰਗ ਤੋਂ ਬਿਨਾਂ ਵੀ 48 ਮੈਂਬਰਾਂ ਨਾਲ ਬਹੁਮਤ ਸਾਬਤ ਕਰ ਸਕਦੀ ਹੈ।
'ਆਪ' ਨੇ ਕਾਂਗਰਸ ਦੇ 4 ਕੌਂਸਲਰ ਤੋੜੇ
ਮੇਅਰ ਦੀ ਚੋਣ ਲਈ ਲਾਬਿੰਗ ਵਿੱਚ ਰੁੱਝੀ ਆਮ ਆਦਮੀ ਪਾਰਟੀ ਨੇ ਕਾਂਗਰਸ ਨੂੰ ਸਭ ਤੋਂ ਵੱਧ ਨੁਕਸਾਨ ਪਹੁੰਚਾਇਆ ਹੈ। ਨਿਗਮ ਚੋਣਾਂ ਵਿੱਚ ਆਮ ਆਦਮੀ ਪਾਰਟੀ ਦੇ 41 ਉਮੀਦਵਾਰ ਜਿੱਤੇ ਸਨ, ਜਦੋਂ ਕਿ ਬਹੁਮਤ ਲਈ 48 ਮੈਂਬਰਾਂ ਦੀ ਲੋੜ ਸੀ। ਆਮ ਆਦਮੀ ਪਾਰਟੀ ਨੇ ਕਾਂਗਰਸ ਤੋਂ ਸਭ ਤੋਂ ਵੱਧ 4 ਕੌਂਸਲਰ ਤੋੜੇ।
ਇਨ੍ਹਾਂ ਵਿੱਚੋਂ ਮਮਤਾ ਰਾਣੀ ਸਮੇਤ ਤਿੰਨ ਕੌਂਸਲਰ ਆਤਮ ਨਗਰ ਹਲਕੇ ਤੋਂ ਹਨ। ਦੋ ਆਜ਼ਾਦ ਅਤੇ ਇੱਕ ਭਾਜਪਾ ਕੌਂਸਲਰ ਵੀ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋਏ ਹਨ। ਜਿੱਥੋਂ ਤੱਕ ਮੇਅਰ ਦੇ ਚਿਹਰੇ ਦਾ ਸਵਾਲ ਹੈ, ਇਹ ਲਗਭਗ ਤੈਅ ਹੈ ਕਿ ਮੇਅਰ ਪੂਰਬੀ ਅਤੇ ਪੱਛਮੀ ਹਲਕਿਆਂ ਤੋਂ ਹੋਵੇਗਾ। ਦੋਵੇਂ ਵਿਧਾਇਕਾਂ ਗੁਰਪ੍ਰੀਤ ਗੋਗੀ ਅਤੇ ਅਸ਼ੋਕ ਪਰਾਸ਼ਰ ਪੱਪੀ ਦੀਆਂ ਪਤਨੀਆਂ ਚੋਣਾਂ ਹਾਰ ਗਈਆਂ ਸਨ। ਇਸ ਲਈ ਹੁਣ ਮੇਅਰ ਦੇ ਅਹੁਦੇ ਲਈ ਪ੍ਰਿੰਸੀਪਲ ਇੰਦਰਜੀਤ ਕੌਰ ਅਤੇ ਨਿਧੀ ਗੁਪਤਾ ਦੇ ਨਾਮ ਚਰਚਾ ਵਿੱਚ ਹਨ।