ਕਣਕ ਦੀ ਥਾਂ ਕੀਤੀ ਫੁੱਲਾਂ ਦੀ ਖੇਤੀ, ਚੰਗੇ ਮੁਨਾਫੇ ਦੀ ਸੀ ਉਮੀਦ, ਅਚਾਨਕ ਕੁਦਰਤ ਦੇ ਕਹਿਰ ਨੇ ਕੀਤਾ ਸਭ ਕੁਝ ਬਰਬਾਦ
ਕਿਸਾਨਾਂ ਦਾ ਕਹਿਣਾ ਹੈ ਕਿ ਸਾਡੇ ਕੋਲ ਨਾ ਤਾਂ ਕਣਕ ਹੈ ਤੇ ਨਾ ਹੀ ਪਸ਼ੂਆਂ ਲਈ ਤੂੜੀ ਹੈ ਕਿਉਂਕਿ ਇਸ ਵਾਰ ਅਸੀਂ ਆਮ ਫ਼ਸਲ ਦੀ ਬਜਾਏ ਫੁੱਲਾਂ ਦੀ ਫ਼ਸਲ ਉਗਾਈ ਸੀ। ਹੁਣ ਉਹ ਵੀ ਬਰਬਾਦ ਹੋ ਗਈ ਹੈ ਤੇ ਉਨ੍ਹਾਂ ਕੋਲ ਖਾਣ ਲਈ ਵੀ ਕਣਕ ਨਹੀਂ ਹੈ।
ਅਨਿਲ ਜੈਨ ਦੀ ਰਿਪੋਰਟ
Sangrur News: ਪਿਛਲੇ ਦਿਨੀਂ ਅਸਮਾਨ ਤੋਂ ਵਰ੍ਹੀ ਆਫਤ ਨੇ ਜਿੱਥੇ ਕਿਸਾਨਾਂ ਦੀਆਂ ਫ਼ਸਲਾਂ ਬਰਬਾਦ ਕਰ ਦਿੱਤੀਆਂ, ਉੱਥੇ ਹੀ ਦੋਹਰੇ ਫ਼ਸਲੀ ਚੱਕਰ ਨੂੰ ਛੱਡ ਕੇ ਨਵੀਆਂ ਫ਼ਸਲਾਂ ਉਗਾਉਣ ਵਾਲੇ ਕਿਸਾਨਾਂ ਦੇ ਘਰ ਦੇ ਚੁੱਲੇ ਵੀ ਬੁੱਝਦੇ ਨਜ਼ਰ ਆ ਰਹੇ ਹਨ।
ਹਾਸਲ ਜਾਣਕਾਰੀ ਮੁਤਾਬਕ ਸੰਗਰੂਰ ਦੇ ਪਿੰਡ ਗਿੱਦੜਿਆਣੀ ਵਿੱਚ ਕਿਸਾਨ 150 ਤੋਂ 200 ਏਕੜ 'ਚ ਫੁੱਲਾਂ ਦੀ ਖੇਤੀ ਕਰਦੇ ਹਨ ਪਰ ਹੁਣ ਗੜ੍ਹੇਮਾਰੀ ਕਾਰਨ ਉਨ੍ਹਾਂ ਦੀ ਫਸਲ ਬਰਬਾਦ ਹੋ ਗਈ ਹੈ। ਇਨ੍ਹਾਂ ਕਿਸਾਨਾਂ ਵੱਲੋਂ ਅਮਰੀਕਾ, ਹਾਲੈਂਡ ਤੇ ਜਰਮਨੀ ਵਿੱਚ 300 ਤੋਂ 500 ਕਿੱਲੋ ਬੀਜ ਵੇਚਿਆ ਜਾਂਦਾ ਸੀ। ਕਿਸਾਨਾਂ ਦਾ ਕਹਿਣਾ ਹੈ ਕਿ ਅਜੇ ਵੀ ਬੱਦਲ ਸਿਰ 'ਤੇ ਹਨ। ਬਾਰਸ਼ ਹੋ ਰਹੀ ਹੈ। ਉਨ੍ਹਾਂ ਨੂੰ ਰਾਤ ਨੂੰ ਨੀਂਦ ਵੀ ਨਹੀਂ ਆਉਂਦੀ। ਜਿਨ੍ਹਾਂ ਖੇਤਾਂ ਨੂੰ ਦੇਖ ਕੇ ਚਿਹਰੇ 'ਤੇ ਖੁਸ਼ੀ ਝਲਕਦੀ ਸੀ, ਹੁਣ ਖੇਤਾਂ 'ਚ ਜਾਣ ਨੂੰ ਦਿਲ ਨਹੀਂ ਕਰਦਾ।
ਸੰਗਰੂਰ ਦੇ ਪਿੰਡ ਗਿੱਦੜਿਆਣੀ ਦੇ ਕਿਸਾਨ ਕੁਝ ਸਾਲਾਂ ਤੋਂ ਫੁੱਲਾਂ ਦੀ ਖੇਤੀ ਕਰ ਰਹੇ ਹਨ। ਇਨ੍ਹਾਂ ਫੁੱਲਾਂ ਦੇ ਬੀਜ ਦੇਸ਼-ਵਿਦੇਸ਼ ਦੀਆਂ ਕੰਪਨੀਆਂ ਵਿੱਚ ਬਹੁਤ ਮਹਿੰਗੇ ਵਿਕਦੇ ਹਨ। ਇਨ੍ਹਾਂ ਕਿਸਾਨਾਂ ਨੂੰ ਕਾਫੀ ਲਾਭ ਵੀ ਹੋ ਰਿਹਾ ਸੀ। ਇਨ੍ਹਾਂ ਕਿਸਾਨਾਂ ਤੋਂ ਵਿਦੇਸ਼ੀ ਕੰਪਨੀਆਂ ਸਿੱਧੇ ਤੌਰ 'ਤੇ ਫੁੱਲਾਂ ਦੀ ਖੇਤੀ ਕਰਵਾ ਰਹੀਆਂ ਸੀ ਪਰ ਪਿਛਲੇ ਦਿਨਾਂ 'ਚ ਮੌਸਮ ਦੀ ਹੋਈ ਗੜਬੜੀ ਕਾਰਨ ਜਿੱਥੇ ਕਿਸਾਨਾਂ ਦੀ ਫ਼ਸਲ ਪੂਰੀ ਤਰ੍ਹਾਂ ਬਰਬਾਦ ਹੋ ਗਈ, ਉੱਥੇ ਹੀ ਫ਼ਸਲ 'ਤੇ ਲੱਗਿਆ ਬੀਜ ਵੀ ਪੂਰੀ ਤਰ੍ਹਾਂ ਤਬਾਹ ਹੋ ਗਿਆ ਹੈ।
ਕਿਸਾਨਾਂ ਦਾ ਕਹਿਣਾ ਹੈ ਕਿ ਕੁਝ ਦਿਨ ਪਹਿਲਾਂ ਲੋਕ ਖੇਤਾਂ ਵਿੱਚ ਤਸਵੀਰਾਂ ਖਿੱਚਵਾਉਣ ਜਾਂਦੇ ਸੀ ਕਿਉਂਕਿ ਇਨ੍ਹਾਂ ਖੇਤਾਂ 'ਚ ਜਿੱਥੋਂ ਤੱਕ ਨਜ਼ਰ ਜਾਂਦੀ ਸੀ, ਸਾਰੀ ਧਰਤੀ ਰੰਗ-ਬਿਰੰਗੇ ਫੁੱਲਾਂ ਨਾਲ ਢੱਕੀ ਹੋਈ ਸੀ। ਕਿਸਾਨ ਵੀ ਖੁਸ਼ ਸਨ ਕਿ ਚੰਗੀ ਫਸਲ ਕਰਕੇ ਇਸ ਵਾਰ ਵਧੀਆ ਮੁਨਾਫਾ ਹੋਵੇਗਾ ਪਰ 30 ਮਾਰਚ ਨੂੰ ਅਸਮਾਨ ਤੋਂ ਹੋਈ ਗੜ੍ਹੇਮਾਰੀ ਨੇ ਸੁਪਨੇ ਚੂਰ ਕਰ ਦਿੱਤੇ। ਹੁਣ ਉਹ ਸਰਕਾਰ ਨੂੰ ਬੇਨਤੀ ਕਰ ਰਹੇ ਹਨ ਕਿ ਮੁਆਵਜ਼ਾ ਦਿੱਤਾ ਜਾਏ।
ਕਿਸਾਨਾਂ ਦਾ ਕਹਿਣਾ ਹੈ ਕਿ ਸਾਡੇ ਕੋਲ ਨਾ ਤਾਂ ਕਣਕ ਹੈ ਤੇ ਨਾ ਹੀ ਪਸ਼ੂਆਂ ਲਈ ਤੂੜੀ ਹੈ ਕਿਉਂਕਿ ਇਸ ਵਾਰ ਅਸੀਂ ਆਮ ਫ਼ਸਲ ਦੀ ਬਜਾਏ ਫੁੱਲਾਂ ਦੀ ਫ਼ਸਲ ਉਗਾਈ ਸੀ। ਹੁਣ ਉਹ ਵੀ ਬਰਬਾਦ ਹੋ ਗਈ ਹੈ ਤੇ ਉਨ੍ਹਾਂ ਕੋਲ ਖਾਣ ਲਈ ਵੀ ਕਣਕ ਨਹੀਂ ਹੈ।