ਨੌਜਵਾਨ ਨੇ ਰੁਜ਼ਗਾਰ ਲਈ ਲਾਇਆ ਅਨੋਖਾ ਜੁਗਾੜ, ਸੂਰਜੀ ਊਰਜਾ ਰਾਹੀਂ ਕਮਾਈ

ਅੰਮ੍ਰਿਤਸਰ: ਡੇਰਾ ਬਾਬਾ ਨਾਨਕ ਦੇ ਰਹਿਣ ਵਾਲੇ ਲਖਬੀਰ ਨੇ ਰੁਜ਼ਗਾਰ ਲਈ ਨਵਾਂ ਤਰੀਕਾ ਲੱਭ ਨਿਵੇਕਲੀ ਮਿਸਾਲ ਪੇਸ਼ ਕੀਤੀ ਹੈ। ਪੈਰਾਂ ਤੋਂ ਅਪਾਹਜ ਲਖਬੀਰ ਰਿਕਸ਼ਾ ਚਲਾ ਕੇ ਆਪਣੇ ਪਰਿਵਾਰ ਦਾ ਪੇਟ ਪਾਲ ਰਿਹਾ ਹੈ। ਇਸ ਨਿਵੇਕਲੀ ਮਿਸਾਲ ਤਹਿਤ ਉਸ ਨੇ ਆਪਣੇ ਰਿਕਸ਼ੇ ਉਪਰ ਸੋਲਰ ਸਿਸਟਮ ਨੂੰ ਫਿੱਟ ਕੀਤਾ ਹੈ। ਸੂਰਜੀ ਕਿਰਨਾਂ ਵਰਤ ਕੇ ਉਹ ਸੋਲਰ ਸਿਸਟਮ ਰਾਹੀਂ ਆਪਣਾ ਰਿਕਸ਼ਾ ਚਲਾ ਰਿਹਾ ਹੈ।

ਲਖਬੀਰ ਨੇ ਸੂਰਜੀ ਊਰਜਾ ਦਾ ਭਰਪੂਰ ਫਾਇਦਾ ਚੁੱਕਦਿਆਂ ਇਸ ਨੂੰ ਆਪਣੇ ਰਿਕਸ਼ਾ ਉੱਪਰ ਲਾ ਕੇ ਦਰਸਾਇਆ ਹੈ ਕਿ ਸੂਰਜੀ ਊਰਜਾ ਰੁਜ਼ਗਾਰ ਲਈ ਵੀ ਕੰਮ ਦੇ ਸਕਦੀ ਹੈ। ਇਸ ਤੋਂ ਪਹਿਲਾਂ ਸੋਲਰ ਸਿਸਟਮ ਰਾਹੀਂ ਆਮ ਤੌਰ 'ਤੇ ਲਾਈਟਾਂ ਚੱਲਦੀਆਂ ਦੇਖੀਆਂ ਹੋਣਗੀਆਂ ਪਰ ਸੂਰਜੀ ਊਰਜਾ ਨਾਲ ਰਿਕਸ਼ਾ ਚਲਾਉਣ ਦੀ ਪਹਿਲੀ ਮਿਸਾਲ ਸਾਹਮਣੇ ਆਈ ਹੈ। 'ਏਬੀਪੀ ਸਾਂਝਾ' ਨਾਲ ਖਾਸ ਗੱਲਬਾਤ ਦੌਰਾਨ ਲਖਬੀਰ ਨੇ ਦੱਸਿਆ ਕਿ ਉਸ ਨੂੰ ਇਹ ਰਿਕਸ਼ਾ ਦਾਨ ਵਜੋਂ ਮਿਲਿਆ ਸੀ। ਉਸ ਨੇ ਇਸ ਉੱਪਰ ਸੋਲਰ ਸਿਸਟਮ ਲਾ ਕੇ ਇਸ ਨੂੰ ਵਰਤੋਂ ਵਿੱਚ ਲਿਆਂਦਾ ਕਿਉਂਕਿ ਉਸ ਦੇ ਦਿਮਾਗ ਵਿੱਚ ਸੀ ਕਿ ਸੂਰਜ ਦੀਆਂ ਕਿਰਨਾਂ ਨੂੰ ਵਰਤ ਕੇ ਉਹ ਬਿਜਲੀ ਬਚਾ ਸਕਦਾ ਹੈ। ਦੇਸ਼ ਵਿੱਚ ਤਾਂ ਬਿਜਲੀ ਦੀ ਪਹਿਲਾਂ ਹੀ ਬਹੁਤ ਕਿੱਲਤ ਹੈ ਤੇ ਜੇਕਰ ਥੋੜ੍ਹਾ ਹੀ ਸਹੀ ਪਰ ਬਾਕੀ ਸਾਰੇ ਵੀ ਲਖਬੀਰ ਵਾਂਗ ਰਿਕਸ਼ੇ ਉੱਪਰ ਸੋਲਰ ਸਿਸਟਮ ਨੂੰ ਇਸਤੇਮਾਲ ਕਰਨ ਤਾਂ ਵੱਡੀ ਮਾਤਰਾ ਵਿੱਚ ਬਿਜਲੀ ਬਚਾਈ ਜਾ ਸਕਦੀ ਹੈ। ਲਖਬੀਰ ਡੇਰਾ ਬਾਬਾ ਨਾਨਕ ਤੋਂ ਵੱਖ-ਵੱਖ ਖੇਤਰਾਂ ਦਾ ਗੇੜਾ ਲਾ ਕੇ ਆਪਣੀ ਰੋਜ਼ੀ ਰੋਟੀ ਚਲਾ ਰਿਹਾ ਹੈ।