ਨੋਟਾਂ 'ਚ ਡੁੱਬੇ ਕੈਪਟਨ ਦੇ 'ਸੱਜਰੇ ਮੰਤਰੀ'

ਯਾਦਵਿੰਦਰ  ਸਿੰਘ ਅੰਮ੍ਰਿਤਸਰ: ਪੰਜਾਬ ਦੇ ਕੈਬਨਿਟ ਮੰਤਰੀ ਓ.ਪੀ. ਸੋਨੀ 'ਤੇ ਵਰ੍ਹਿਆ ਨੋਟਾਂ ਦਾ ਮੀਂਹ। ਕੈਬਨਿਟ ਮੰਤਰੀ ਬਣਨ ਤੋਂ ਬਾਅਦ ਓ.ਪੀ. ਸੋਨੀ ਬੁੱਧਵਾਰ ਨੂੰ ਆਪਣੇ ਹਲਕੇ ਵਿੱਚ ਰੋਡ ਸ਼ੋਅ ਕਰਨ ਪਹੁੰਚੇ ਤਾਂ ਉਨ੍ਹਾਂ 'ਤੇ ਸਮਰਥਕਾਂ ਨੇ ਨੋਟਾਂ ਨਾਲ ਬਣੇ ਹਾਰਾਂ ਦੀ ਵਾਛੜ ਹੀ ਕਰ ਦਿੱਤੀ। ਹਾਲਤ ਇਹ ਸੀ ਕਿ ਮੰਤਰੀ ਜੀ ਨੋਟਾਂ ਦੇ ਹਾਰਾਂ ਹੇਠ ਦੱਬੇ ਹੋਏ ਸਨ, ਪਰ ਫਿਰ ਵੀ ਉਨ੍ਹਾਂ ਆਪਣੇ ਸਮਰਥਕਾਂ ਨੂੰ ਨਹੀਂ ਰੋਕਿਆ। ਵੀਹ ਸਾਲ ਤੋਂ ਵਿਧਾਇਕ ਸੋਨੀ ਨੂੰ ਪਹਿਲੀ ਵਾਰ ਮੰਤਰੀ ਬਣਨ ਦਾ ਮੌਕਾ ਮਿਲਿਆ ਤਾਂ ਸ਼ਾਇਦ ਉਹ ਇਸ 'ਸੁਭਾਗੀ ਘੜੀ' ਨੂੰ ਖੁੰਝਾਉਣਾ ਨਹੀਂ ਸੀ ਚਾਹੁੰਦੇ। ਕੇਂਦਰੀ ਰਿਜ਼ਰਵ ਬੈਂਕ ਦੇ ਨਿਰਦੇਸ਼ ਹਨ ਕਿ ਨੋਟਾਂ ਨੂੰ ਸਟੇਪਲ ਆਦਿ ਨਹੀਂ ਕੀਤਾ ਜਾ ਸਕਦਾ, ਪਰ ਮੰਤਰੀ ਸਾਬ ਨੂੰ ਉਸ ਨਾਲ ਕੀ ਲੈਣ-ਦੇਣ। ਸਟੇਪਲਡ ਨੋਟਾਂ ਦੇ ਹਾਰ ਡਿੱਗਦੇ ਗਏ ਤੇ ਮੰਤਰੀ ਜੀ ਫੁੱਲੇ ਨਹੀਂ ਸੀ ਸਮਾ ਰਹੇ। ਸੋਨੀ ਨੂੰ ਬੀਤੀ 21 ਅਪ੍ਰੈਲ ਨੂੰ ਮੰਤਰੀ ਮੰਡਲ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਉਨ੍ਹਾਂ ਨੂੰ ਸਕੂਲ ਸਿੱਖਿਆ ਮੰਤਰੀ ਦਾ ਕਾਰਜਭਾਰ ਦਿੱਤਾ ਗਿਆ ਹੈ। ਸੋਨੀ ਸਾਬ 'ਤੇ ਜਿੰਨੇ ਨੋਟ ਵਰ੍ਹੇ, ਓਨੇ ਵਿੱਚ ਸਕੂਲ ਅਧਿਆਪਕਾਂ ਦੀ ਦੋ-ਚਾਰ ਮਹੀਨਿਆਂ ਦੀ ਤਨਖ਼ਾਹ ਆ ਜਾਵੇ, ਜਿਸ ਲਈ ਅਧਿਆਪਕਾਂ ਨੂੰ ਧਰਨੇ ਵੀ ਦੇਣੇ ਪੈਂਦੇ ਹਨ। ਪਰ ਇੱਧਰ ਉਨ੍ਹਾਂ ਦੇ ਮੰਤਰੀ ਹਨ, ਜਿਨ੍ਹਾਂ ਨੂੰ ਨੋਟਾਂ ਦੀ ਕੋਈ ਕਮੀ ਨਹੀਂ ਹੈ। ਬੀਤੇ ਕੱਲ੍ਹ ਸੋਨੀ ਮੰਤਰੀ ਬਣਨ ਤੋਂ ਬਾਅਦ ਜਦ ਪਹਿਲੀ ਵਾਰ ਆਪਣੇ ਹਲਕੇ ਵਿੱਚ ਪਹੁੰਚੇ ਤਾਂ ਅੰਮ੍ਰਿਤਸਰ ਜਿਵੇਂ ਥੰਮ੍ਹ ਹੀ ਗਿਆ। ਸ਼ਹਿਰ ਦੇ ਮਸ਼ਹੂਰ ਭੰਡਾਰੀ ਪੁਲ 'ਤੇ ਲੋਕ ਘੰਟਿਆਂ ਬੱਧੀ ਜਾਮ ਵਿੱਚ ਫਸੇ ਰਹੇ। ਕਾਰਨ ਇਹ ਸੀ ਕਿ ਮੰਤਰੀ ਨੇ ਓਪਨ ਜੀਪ ਵਿੱਚ ਆਪਣੇ ਸਮਰਥਕਾਂ ਨਾਲ ਸ਼ਕਤੀ ਪ੍ਰਦਰਸ਼ਨ ਕਰਦੇ ਜਾ ਰਹੇ ਸਨ। ਮੰਤਰੀ ਨੇ ਦਰਬਾਰ ਸਾਹਿਬ ਤੇ ਦੁਰਗਿਆਣਾ ਮੰਦਿਰ ਮੱਥਾ ਟੇਕਿਆ ਤੇ ਸਾਰੇ ਸ਼ਹਿਰ ਨੂੰ ਵਖ਼ਤ ਵਿੱਚ ਪਾਈ ਰੱਖਿਆ।