ਰੌਬਟ ਦੀ ਰਿਪੋਰਟ
ਚੰਡੀਗੜ੍ਹ: ਇਸ ਸਾਲ ਕਿਸਾਨਾਂ ਨੇ ਕਮਾਲ ਕਰ ਦਿੱਤੀ ਹੈ। ਇਸ ਵਾਰ ਝੋਨੇ ਦੀ ਬਿਜਾਈ ਤਾਂ ਘੱਟ ਹੋਈ ਪਰ ਫਸਲ ਪਿਛਲੇ ਸਾਲ ਨਾਲੋਂ ਵੀ ਵੱਧ। ਕਿਸਾਨਾਂ ਨੇ ਇਸ ਸਾਲ ਤਕਰੀਬਨ 2 ਲੱਖ ਹੈਕਟੇਅਰ ਘੱਟ ਜ਼ਮੀਨ ਤੇ ਝੋਨੇ ਦੀ ਬਿਜਾਈ ਕੀਤੀ ਪਰ ਫਸਲ ਦਾ ਝਾੜ ਇਸ ਵਾਰ ਪਿਛਲੇ ਸਾਲ ਦੇ ਮੁਕਾਬਲੇ 26 ਫੀਸਦ ਜ਼ਿਆਦਾ ਹੈ। ਇਸ ਦੌਰਾਨ ਵਿਰੋਧੀ ਪਾਰਟੀਆਂ ਤੇ ਕਿਸਾਨ ਕੈਪਟਨ ਸਰਕਾਰ ਨੂੰ ਘੇਰ ਰਹੀਆਂ ਹਨ। ਉਨ੍ਹਾਂ ਦਾ ਇਲਜ਼ਾਮ ਹੈ ਕਿ ਪੰਜਾਬ ਦੀਆਂ ਮੰਡੀਆਂ ਵਿੱਚ ਦੂਜੇ ਰਾਜਾਂ ਤੋਂ ਲਿਆਂਦਾ ਗਿਆ ਸਸਤਾ ਝੋਨਾ ਮਹਿੰਗੇ ਭਾਅ ਤੇ ਵੇਚਿਆ ਗਿਆ ਹੈ।
ਦਰਅਸਲ, ਪੰਜਾਬ ਵਿੱਚ ਕਿਸਾਨ ਖੇਤੀ ਕਾਨੂੰਨਾਂ ਖਿਲਾਫ ਵਿਰੋਧ ਪ੍ਰਦਰਸ਼ਨ ਕਰ ਰਹੇ ਹਨ। ਇਸ ਦੌਰਾਨ ਅਨਾਜ ਨਾਲ ਭਰੇ ਟੱਰਕਾਂ ਨੂੰ ਫੜ੍ਹਨ ਦਾ ਸਿਲਸਿਲਾ ਇੱਕ ਮਹੀਨੇ ਪਹਿਲਾਂ ਹੀ ਸ਼ੁਰੂ ਹੋ ਗਿਆ ਸੀ ਪਰ ਇਸ ਦਾ ਮਤਲਬ ਤੇ ਮਕਸਦ ਹੁਣ ਸਮਝ ਆਇਆ ਹੈ। ਪੰਜਾਬ ਸਰਕਾਰ ਫਸਲ ਦੀ ਸਟੋਰਜ਼ ਦੇ ਰਿਕਾਰਡ ਤੋੜ ਆਪਣੀ ਪਿੱਠ ਥਾਪੜ ਰਹੀ ਸੀ ਪਰ ਕਿਸਾਨ ਬੰਪਰ ਫਸਲ ਦੀ ਬਜਾਏ ਇਸ ਨੂੰ ਬਾਹਰੀ ਸੂਬਿਆਂ ਦੇ ਅਨਾਜ ਨਾਲ ਬੰਪਰ ਫਾਇਦੇ ਦਾ ਸੌਦਾ ਦੱਸ ਰਹੀ ਹੈ।
ਦੂਜੇ ਸੂਬਿਆਂ ਵਿੱਚੋਂ 800 ਤੋਂ 1000 ਰੁਪਏ ਪ੍ਰਤੀ ਕੁਇੰਟਲ ਝੋਨਾ ਖਰੀਦ ਕੇ ਪੰਜਾਬ ਅੰਦਰ 1888 ਰੁਪਏ ਪ੍ਰਤੀ ਕੁਇੰਟਲ MSP ਤੇ ਪੰਜਾਬ ਵਿੱਚ ਵੇਚਿਆ ਜਾਂਦਾ ਹੈ। ਪੰਜਾਬ ਵਿੱਚ ਵਪਾਰੀਆਂ ਤੇ ਸੂਬਾ ਸਰਕਾਰ ਦੀਆਂ ਖਰੀਦ ਏਜੰਸੀਆਂ ਨਾਲ ਮਿਲ ਕੇ ਇਹ ਮਿਲੀਭੁਗਤ ਚੱਲ ਰਹੀ ਹੈ। ਮੁਨਾਫੇ ਦੇ ਇਸੇ ਸੌਦੇ ਕਾਰਨ ਇਸ ਵਾਰ ਖਰੀਦ ਕਾਫੀ ਵਧ ਗਈ ਹੈ।
ਹਾਸਲ ਜਾਣਕਾਰੀ ਅਨੁਸਾਰ ਪਿਛਲੀ ਵਾਰ ਦੇ ਮੁਕਾਬਲੇ ਇਸ ਸਾਲ ਪੰਜਾਬ ਵਿੱਚ ਦੋ ਲੱਖ ਹੈਕਟੇਅਰ ਘੱਟ ਜ਼ਮੀਨ ਦੀ ਬਿਜਾਈ ਹੋਈ ਸੀ। ਸਾਲ 2019 ਵਿੱਚ, ਜਿੱਥੇ 22.91 ਲੱਖ ਹੈਕਟੇਅਰ ਰਕਬੇ ਵਿੱਚ ਝੋਨੇ ਦੀ ਬਿਜਾਈ ਕੀਤੀ ਗਈ ਸੀ, ਇਸ ਵਾਰ 20.86 ਲੱਖ ਹੈਕਟੇਅਰ ਰਕਬੇ ਵਿੱਚ ਝੋਨੇ ਦੀ ਬਿਜਾਈ ਕੀਤੀ ਗਈ ਸੀ।
ਇਸ ਵਾਰ ਬਾਸਮਤੀ ਦੀ ਬਿਜਾਈ ਵਾਲੇ ਖੇਤਰ ਵਿੱਚ ਥੋੜ੍ਹਾ ਜਿਹਾ ਵਾਧਾ ਹੋਇਆ ਹੈ। ਪਿਛਲੇ ਸਾਲ ਜਿਥੇ ਬਾਸਮਤੀ ਦੀ ਬਿਜਾਈ 6.29 ਲੱਖ ਹੈਕਟੇਅਰ ਰਕਬੇ ਵਿੱਚ ਕੀਤੀ ਗਈ ਸੀ, ਬਾਸਮਤੀ ਦੀ ਬਿਜਾਈ ਇਸ ਵਾਰ 6.50 ਲੱਖ ਹੈਕਟੇਅਰ ਰਕਬੇ ਵਿੱਚ ਕੀਤੀ ਗਈ ਸੀ। ਪੰਜਾਬ ਸਰਕਾਰ ਦੇ ਅੰਕੜਿਆਂ ਅਨੁਸਾਰ 17 ਨਵੰਬਰ ਤੱਕ 208 ਲੱਖ ਮੀਟ੍ਰਿਕ ਟਨ ਝੋਨਾ (ਬਾਸਮਤੀ ਸਮੇਤ) ਮੰਡੀਆਂ ਵਿੱਚ ਪਹੁੰਚ ਚੁੱਕਾ ਹੈ। ਪਿਛਲੇ ਸਾਲ ਸਿਰਫ 169 ਲੱਖ ਮੀਟ੍ਰਿਕ ਟਨ ਮੰਡੀਆਂ ਵਿੱਚ ਪਹੁੰਚਿਆ ਸੀ। ਇਹ ਰਿਕਾਰਡ ਵਾਧਾ ਸ਼ੱਕ ਪੈਦਾ ਕਰ ਰਿਹਾ ਹੈ।
ਪੰਜਾਬ ਮੰਡੀ ਬੋਰਡ ਦੇ ਚੇਅਰਮੈਨ ਲਾਲ ਸਿੰਘ ਇਹ ਮੰਨਣ ਲਈ ਤਿਆਰ ਨਹੀਂ ਹਨ ਕਿ ਜ਼ਮੀਨ ਬਹੁਤ ਘੱਟ ਸੀ, ਤਾਂ ਫਿਰ ਫਸਲ ਕਿਵੇਂ ਵਧੀ? ਚੇਅਰਮੈਨ ਅਨੁਸਾਰ ਇਸ ਵਾਰ ਝੋਨੇ ਦਾ ਝਾੜ ਪ੍ਰਤੀ ਹੈਕਟੇਅਰ ਵਿੱਚ 26 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ ਤੇ ਇਹੀ ਕਾਰਨ ਹੈ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਸਾਲ ਹੁਣ ਤਕ 207 ਲੱਖ ਮੀਟ੍ਰਿਕ ਟਨ ਝੋਨੇ ਦੀ ਖਰੀਦ ਕੀਤੀ ਜਾ ਚੁੱਕੀ ਹੈ। ਲਾਲ ਸਿੰਘ ਨੇ ਇਸ ਗੱਲ ਤੋਂ ਇਨਕਾਰ ਕੀਤਾ ਕਿ ਬਾਹਰਲੇ ਸੂਬਿਆਂ ਤੋਂ ਝੋਨਾ ਪੰਜਾਬ ਵਿੱਚ ਵਿਕ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿੱਚ ਕਿਸਾਨ ਧਰਨੇ ’ਤੇ ਚੱਲ ਰਹੇ ਹਨ, ਇਸ ਲਈ ਇਹ ਸੰਭਵ ਨਹੀਂ।