ਸਿਆਸੀ ਪਾਰਟੀਆਂ ਨੂੰ ਹੁਣ ਪੰਜਾਬਣਾਂ 'ਤੇ ਟੇਕ! ਇੱਕ ਕਰੋੜ ਔਰਤਾਂ ਬਣਾਉਣਗੀਆਂ ਪੰਜਾਬ ਦੀ ਨਵੀਂ ਸਰਕਾਰ

ਲੁਧਿਆਣਾ ਦੀ ਰੈਲੀ 'ਚ ਕਾਂਗਰਸ ਨੇ ਔਰਤਾਂ ਨੂੰ 50% ਸੀਟਾਂ ਦੇਣ ਦੀ ਗੱਲ ਕੀਤੀ ਸੀ। ਫਿਰ ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਵੱਡਾ ਦਾਅ ਖੇਡਿਆ।

punjab_Election

ਚੰਡੀਗੜ੍ਹ: ਸਿਆਸੀ ਪਾਰਟੀਆਂ ਨੂੰ ਹੁਣ ਪੰਜਾਬਣਾਂ 'ਤੇ ਟੇਕ ਹੈ। ਸੂਬੇ ਦੀਆਂ 96.19 ਲੱਖ ਔਰਤਾਂ ਸਿਆਸੀ ਪਾਰਟੀਆਂ ਦਾ ਭਵਿੱਖ ਤੈਅ ਕਰ ਸਕਦੀਆਂ ਹਨ। ਇਸ ਲਈ ਸਾਰੀਆਂ ਸਿਆਸੀ ਪਾਰਟੀਆਂ ਔਰਤਾਂ ਨੂੰ ਖਾਸ ਸਹੂਲਤਾਂ ਦੇਣ ਦਾ ਐਲਾਨ ਕਰ ਰਹੀਆਂ ਹਨ। ਕਾਂਗਰਸ ਸਰਕਾਰ ਨੇ ਫਰੀ ਬੱਸ ਸੇਵਾ ਦੀ ਸਹੁਲਤ ਦਿੱਤੀ ਤਾਂ ਆਮ ਆਦਮੀ ਪਾਰਟੀ ਨੇ ਸਰਕਾਰ ਬਣਨ 'ਤੇ 1000 ਰੁਪਏ ਹਰ ਔਰਤ ਦੇ ਖਾਤੇ ਵਿੱਚ ਪਾਉਣ ਦਾ ਐਲਾਨ ਕੀਤਾ ਹੈ।

ਇਹ ਸਭ ਇਸ ਲਈ ਹੋ ਰਿਹਾ ਹੈ ਕਿਉਂਕਿ ਸੂਬੇ ਵਿੱਚ ਔਰਤਾਂ ਦੀ ਆਬਾਦੀ ਡੇਢ ਕਰੋੜ ਦੇ ਕਰੀਬ ਹੈ। ਇਸ ਹਿਸਾਬ ਨਾਲ 50 ਫੀਸਦੀ ਔਰਤਾਂ ਦੇ ਵੋਟ ਹਨ। ਇਹ ਵੀ ਸੱਚਾਈ ਹੈ ਕਿ ਔਰਤਾਂ ਹਮੇਸ਼ਾਂ ਮਰਦਾਂ ਦੇ ਮੁਕਾਬਲੇ ਵੱਧ ਵੋਟਿੰਗ ਕਰਦੀਆਂ ਹਨ। ਅੰਕੜਿਆਂ ਮੁਤਾਬਕ 2019 ਦੀਆਂ ਲੋਕ ਸਭਾ ਚੋਣਾਂ 'ਚ ਮਹਿਲਾ ਵੋਟਰਾਂ ਦੀ ਗਿਣਤੀ 96.19 ਲੱਖ ਸੀ, ਜੋ ਇਸ ਵਾਰ ਚੋਣਾਂ 'ਚ ਅੰਤਮ ਵੋਟਰ ਸੂਚੀ ਆਉਣ ਤਕ 1 ਕਰੋੜ ਦੇ ਕਰੀਬ ਹੋ ਸਕਦੀ ਹੈ।


ਇਹੀ ਕਾਰਨ ਹੈ ਕਿ ਲੁਧਿਆਣਾ ਦੀ ਰੈਲੀ 'ਚ ਕਾਂਗਰਸ ਨੇ ਔਰਤਾਂ ਨੂੰ 50% ਸੀਟਾਂ ਦੇਣ ਦੀ ਗੱਲ ਕੀਤੀ ਸੀ। ਫਿਰ ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਵੱਡਾ ਦਾਅ ਖੇਡਿਆ। ਮੋਗਾ 'ਚ ਉਨ੍ਹਾਂ ਕਿਹਾ ਕਿ ਜੇਕਰ ਸਰਕਾਰ ਬਣੀ ਤਾਂ 18 ਸਾਲ ਤੋਂ ਵੱਧ ਉਮਰ ਦੀ ਹਰ ਔਰਤ ਨੂੰ 1000 ਰੁਪਏ ਪ੍ਰਤੀ ਮਹੀਨਾ ਦਿੱਤਾ ਜਾਵੇਗਾ। ਇਹ ਪੈਨਸ਼ਨ ਦੀ ਰਕਮ ਤੋਂ ਵੱਖਰਾ ਹੋਵੇਗਾ। ਇਸ 'ਚ ਕੋਈ ਆਮਦਨ ਕੈਟਾਗਰੀ ਨਹੀਂ ਰੱਖੀ ਗਈ।


ਆਉ ਪੂਰਾ ਗਣਿਤ ਸਮਝੀਏ:  ਪਿਛਲੀਆਂ ਚੋਣਾਂ ਦੌਰਾਨ ਪੰਜਾਬ 'ਚ 1 ਕਰੋੜ 98 ਲੱਖ 78 ਹਜ਼ਾਰ 654 ਵੋਟਰ ਸਨ, ਜਿਸ 'ਚ 1 ਕਰੋੜ 5 ਲੱਖ 3 ਹਜ਼ਾਰ 108 ਮਰਦ ਵੋਟਰ ਤੇ 93 ਲੱਖ 75 ਹਜ਼ਾਰ 546 ਮਹਿਲਾ ਵੋਟਰ ਸਨ। ਜਦਕਿ 2017 'ਚ 117 ਸੀਟਾਂ 'ਤੇ ਵੋਟਿੰਗ ਪੂਰੀ ਹੋਈ ਤਾਂ 80 ਲੱਖ 54 ਹਜ਼ਾਰ 558 ਮਰਦ ਤੇ 73 ਲੱਖ 26 ਹਜ਼ਾਰ 384 ਔਰਤਾਂ ਨੇ ਵੋਟ ਪਾਈ। ਇੱਥੇ ਔਰਤਾਂ ਦੀ ਗਿਣਤੀ ਬੇਸ਼ੱਕ ਘੱਟ ਹੈ, ਪਰ ਜੇਕਰ ਵੋਟ ਫ਼ੀਸਦ 'ਤੇ ਨਜ਼ਰ ਮਾਰੀਏ ਤਾਂ ਔਰਤਾਂ ਦੀ ਵੋਟ ਜ਼ਿਆਦਾ ਹੈ। 2017 'ਚ 79.2% ਔਰਤਾਂ ਨੇ 78.5% ਮਰਦਾਂ ਦੇ ਵਿਰੁੱਧ ਵੋਟ ਪਾਈ। 2012 'ਚ ਵੀ ਇਸੇ ਤਰ੍ਹਾਂ ਦੀ ਵੋਟਿੰਗ ਹੋਈ ਸੀ। ਉਸ ਸਮੇਂ ਵੋਟ ਪਾਉਣ ਵਾਲੀਆਂ ਔਰਤਾਂ ਦੀ ਗਿਣਤੀ 78.90% ਸੀ, ਜਦਕਿ 77.58% ਮਰਦ ਵੋਟਰਾਂ ਨੇ ਵੋਟ ਪਾਈ।


ਇਨ੍ਹਾਂ ਅੰਕੜਿਆਂ ਨਾਲ ਆਮ ਆਦਮੀ ਪਾਰਟੀ ਨੇ ਸਿਆਸੀ ਦਾਅ ਖੇਡਿਆ ਹੈ। ਪੰਜਾਬ 'ਚ ਔਰਤਾਂ ਮਰਦਾਂ ਨਾਲੋਂ ਵੱਧ ਵੋਟਾਂ ਪਾਉਂਦੀਆਂ ਹਨ, ਇਹ ਅੰਕੜੇ ਦੱਸਦੇ ਹਨ। ਦਿਲਚਸਪ ਗੱਲ ਇਹ ਹੈ ਕਿ ਚੋਣਾਂ 'ਚ ਉਸ ਦਾ ਕੋਈ ਸਿੱਧਾ ਐਲਾਨ ਨਹੀਂ ਹੋਇਆ। ਬੁਢਾਪਾ ਪੈਨਸ਼ਨ ਨੂੰ ਛੱਡ ਕੇ ਜਨਰਲ ਵਰਗ ਤੇ ਮੁਟਿਆਰਾਂ ਲਈ ਕੋਈ ਵੱਡਾ ਚੋਣ ਹਥਿਆਰ ਨਹੀਂ। ਇਸ ਨੂੰ ਦਿੱਲੀ ਦੇ ਮੁੱਖ ਮੰਤਰੀ ਤੇ 'ਆਪ' ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਮਹਿਸੂਸ ਕੀਤਾ। ਹੁਣ ਉਨ੍ਹਾਂ ਦਾ ਇਹ ਐਲਾਨ 18 ਸਾਲ ਤੋਂ ਵੱਧ ਉਮਰ ਦੀ ਹਰ ਔਰਤ ਲਈ ਹੈ। ਇਸ 'ਚ ਕਿਸੇ ਜਾਤ, ਧਰਮ, ਵਰਗ ਦਾ ਜ਼ਿਕਰ ਨਹੀਂ ਕੀਤਾ ਗਿਆ।


ਜੇਕਰ ਹਰ ਔਰਤ ਨੂੰ ਪੈਸਾ ਮਿਲੇਗਾ, ਤਾਂ ਇਹ ਤੈਅ ਹੈ ਕਿ ਇਹ 'ਆਪ' ਲਈ ਵੱਡਾ ਚੋਣ ਲਾਭ ਹੋ ਸਕਦਾ ਹੈ। ਵੋਟ ਨਾ ਪਾਉਣ ਵਾਲੀਆਂ ਲਗਪਗ 20% ਔਰਤਾਂ ਵੀ ਇਸ ਦਾਅ ਵੱਲ ਆਕਰਸ਼ਿਤ ਹੋਣਗੀਆਂ। ਜੇਕਰ ਗ਼ਰੀਬ ਤੇ ਮੱਧ ਵਰਗ ਵੱਲੋਂ ਜ਼ਿਆਦਾ ਵੋਟਿੰਗ ਹੁੰਦੀ ਹੈ ਤਾਂ ਉੱਥੇ ਵੀ ਕੇਜਰੀਵਾਲ ਦਾ ਦਾਅ ਜ਼ਿਆਦਾ ਅਸਰਦਾਰ ਹੋਵੇਗਾ। ਇਸ ਦੇ ਨਾਲ ਹੀ ਇਸ ਦਾਅ ਰਾਹੀਂ 'ਆਪ' ਘਰ-ਘਰ ਪਹੁੰਚ ਸਕੇਗੀ।


ਕਾਂਗਰਸ ਆਗੂ ਪ੍ਰਿਅੰਕਾ ਗਾਂਧੀ ਨੇ ਉੱਤਰ ਪ੍ਰਦੇਸ਼ (UP) 'ਚ 40% ਟਿਕਟ ਦੇਣ ਦਾ ਐਲਾਨ ਕੀਤਾ ਹੈ। ਸੋਮਵਾਰ ਨੂੰ ਲੁਧਿਆਣਾ 'ਚ ਕਾਂਗਰਸ ਦੀ ਰੈਲੀ ਹੋਣ 'ਤੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੱਧੂ ਨੇ ਕਿਹਾ ਕਿ ਯੂਪੀ 'ਚ 40 ਫ਼ੀਸਦੀ ਹੈ ਪਰ ਪੰਜਾਬ 'ਚ ਹੁਣ ਔਰਤਾਂ ਨੂੰ 50 ਫ਼ੀਸਦੀ ਟਿਕਟਾਂ ਦਿੱਤੀਆਂ ਜਾ ਸਕਦੀਆਂ ਹਨ। ਸੀਐਮ ਚਰਨਜੀਤ ਚੰਨੀ ਨੇ ਵੀ ਔਰਤਾਂ ਦੇ ਯੋਗਦਾਨ ਦੀ ਸ਼ਲਾਘਾ ਕੀਤੀ। ਕੇਜਰੀਵਾਲ ਦੇ ਦਾਅ ਤੋਂ ਬਾਅਦ ਇਹ ਤੈਅ ਹੈ ਕਿ ਕਾਂਗਰਸ ਵੀ ਜਲਦੀ ਹੀ ਔਰਤਾਂ ਲਈ ਸਿੱਧੇ ਤੌਰ 'ਤੇ ਲਾਭ ਦੇਣ ਦਾ ਐਲਾਨ ਕਰ ਸਕਦੀ ਹੈ ਤਾਂ ਜੋ 'ਆਪ' ਨੂੰ ਟੱਕਰ ਦਿੱਤੀ ਜਾ ਸਕੇ।