ਲੰਡਨ: ਧਰਤੀ ਦੇ ਦੱਖਣੀ ਧਰੁਵ ਭਾਵ ਅੰਟਾਰਕਟਿਕਾ ਵਿੱਚ ਇੰਗਲੈਂਡ ਦੇ ਰਿਸਰਚ ਸੈਂਟਰ ਕੋਲ ਬਰਫ਼ ਦਾ ਇੱਕ ਵੱਡਾ ਤੋਦਾ (ਆਈਸਬਬਰਗ) ਟੁੱਟ ਗਿਆ। ਇਹ ਹਿੱਸਾ ਦਿੱਲੀ ਸ਼ਹਿਰ ਤੋਂ ਥੋੜ੍ਹਾ ਜਿਹਾ ਵੱਡਾ ਹੈ। ਇਸ ਵਿੱਚ ਤਰੇੜਾਂ ਤਾਂ ਪਹਿਲਾਂ ਹੀ ਪੈ ਗਈਆਂ ਸਨ; ਇਸੇ ਲਈ ਵਿਗਿਆਨੀ ਪਹਿਲਾਂ ਤੋਂ ਹੀ ਕੋਈ ਵੱਡਾ ਬਰਫ਼ਾਨੀ ਤੋਦਾ ਟੁੱਟਣ ਦਾ ਖ਼ਦਸ਼ਾ ਪ੍ਰਗਟਾ ਰਹੇ ਸਨ।
ਇਸ ਤੋਦੇ ਦੀ ਮੋਟਾਈ 150 ਮੀਟਰ ਹੈ। ਇਸ ਦੇ ਟੁੱਟਣ ਤੋਂ ਬਾਅਦ ਬ੍ਰਿਟਿਸ਼ ਅੰਟਾਰਕਟਿਕ ਸਰਵੇ (BAS) ਨੇ ਇੱਕ ਵਿਡੀਓ ਬਣਾ ਕੇ ਆਪਣੇ ਟਵਿਟਰ ਹੈਂਡਲ ਤੋਂ ਜਾਰੀ ਕੀਤੀ ਹੈ। ਇਸ ਆਈਸਬਰਗ ਦਾ ਖੇਤਰਫਲ ਲਗਪਗ 1,270 ਵਰਗ ਕਿਲੋਮੀਟਰ ਹੈ। ਵੀਡੀਓ ’ਚ ਕੈਪਚਰ ਕੀਤੀ ਤਰੇੜ ਹੁਣ ਇੱਕ ਕਿਲੋਮੀਟਰ ਤੋਂ ਜ਼ਿਆਦਾ ਹੋ ਗਈ ਹੈ।
BAS ਦਾ ਇਹ ਰਿਸਰਚ ਸਟੇਸ਼ਨ ਜ਼ਿਆਦਾ ਠੰਢ ਕਾਰਣ ਹਾਲੇ ਬੰਦ ਹੈ। ਇਸ ਵਿੱਚ ਰਹਿਣ ਵਾਲੇ 12 ਵਿਅਕਤੀਆਂ ਦਾ ਸਟਾਫ਼ ਪਹਿਲਾਂ ਹੀ ਇੱਥੋਂ ਨਿੱਕਲ ਗਿਆ ਸੀ। ਠੰਢ ਦੇ ਮੌਸਮ ਵਿੱਚ ਇੱਥੇ ਤਾਪਮਾਨ ਮਨਫ਼ੀ 50 ਡਿਗਰੀ ਸੈਲਸੀਅਸ ਤੋਂ ਵੀ ਹੇਠਾਂ ਜਾ ਸਕਦਾ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਅੰਟਾਰਕਟਿਕ ਵਿੱਚ ਬਰਫ਼ ਦੀ ਪਰਤ ਹਰ ਸਾਲ ਸਮੁੰਦਰ ਵੱਲ ਦੋ ਕਿਲੋਮੀਟਰ ਤੱਕ ਖਿਸਕ ਜਾਂਦੀ ਹੈ। ਇਸ ਕਾਰਣ ਬਰਫ਼ ਦੇ ਕੁਝ ਹਿੱਸੇ ਟੁੱਟਦੇ ਹਨ। ਇਹ ਕੁਦਰਤੀ ਪ੍ਰਕਿਰਿਆ ਹੈ।
ਜੇ ਅੰਟਾਰਕਿਟ ਦੀ ਸਾਰੀ ਬਰਫ਼ ਪਿਘਲ ਕੇ ਸਮੁੰਦਰ ਵਿੱਚ ਸਮਾ ਗਈ, ਤਾਂ ਸਮੁੰਦਰ ਕੰਢੇ ਵੱਸੇ ਦੁਨੀਆ ਦੇ ਕਈ ਸ਼ਹਿਰ ਅਤੇ ਟਾਪੂ ਸਦਾ ਲਈ ਡੁੱਬ ਜਾਣਗੇ ਕਿਉਂਕਿ ਬਰਫ਼ ਪਿਘਲਣ ਨਾਲ ਸਮੁੰਦਰ ਵਿੱਚ ਪਾਣੀ ਦਾ ਪੱਧਰ 70 ਮੀਟਰ ਤੱਕ ਵਧ ਜਾਵੇਗਾ।