ਟਰੂਡੋ ਨੇ ਪਰਿਵਾਰ ਸੰਗ ਕੀਤੇ ਤਾਜ ਮਹਿਲ ਦੇ ਦੀਦਾਰੇ

ਨਵੀਂ ਦਿੱਲੀ: ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਆਪਣੀ ਪਤਨੀ ਗ੍ਰੇਗੋਰ ਟਰੂਡੋ ਤੇ ਬੱਚੇ ਜ਼ੇਵੀਅਰ, ਏਲਾ-ਗ੍ਰੇਸ ਤੇ ਹੈਡ੍ਰੀਅਨ ਸੰਗ ਆਗਰਾ ਦੇ ਤਾਜ ਮਹਿਲ ਦੇ ਦੀਦਾਰ ਕੀਤੇ। ਟਰੂਡੋ ਇਸ ਤੋਂ ਬਾਅਦ ਮਥੁਰਾ ਦੇ ਚੂਰਮੂਰਾ ਵਿੱਚ ਜੰਗਲੀ ਜੀਵ-ਰੱਖ (ਹਾਥੀ ਬਚਾਅ ਕੇਂਦਰ) ਦੀ ਸੈਰ ਵੀ ਕਰਨਗੇ। ਆਪਣੇ ਹਫ਼ਤਾ ਲੰਮੇ ਭਾਰਤ ਦੌਰੇ 'ਤੇ ਆਏ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਆਗਰਾ ਦੇ ਨਾਲ-ਨਾਲ ਅੰਮ੍ਰਿਤਸਰ, ਅਹਿਮਦਾਬਾਦ, ਮੁੰਬਈ ਤੇ ਨਵੀਂ ਦਿੱਲੀ ਜਾਣਗੇ। ਟਰੂਡੋ ਦਾ ਇਸ ਦੌਰੇ 'ਤੇ ਆਉਣ ਦਾ ਮਕਸਦ ਮਹਿਲਾ ਸਸ਼ਕਤੀਕਰਨ ਤੇ ਵਪਾਰ ਵਿੱਚ ਵਾਧਾ ਕਰਨ ਦੇ ਨਾਲ-ਨਾਲ ਭਾਰਤ ਤੇ ਕੈਨੇਡਾ ਦਰਮਿਆਨ ਵਿੱਤੀ ਮਜ਼ਬੂਤੀ ਲਿਆਉਣਾ ਹੈ। ਜਸਟਿਨ ਟਰੂਡੋ ਪਰਿਵਾਰ ਤੋਂ ਇਲਾਵਾ ਆਪਣੇ 5 ਮੰਤਰੀਆਂ ਨਾਲ ਭਾਰਤ ਪੁੱਜੇ ਹਨ। 17 ਫਰਵਰੀ ਨੂੰ ਭਾਰਤ ਪੁੱਜੇ ਕੈਨੇਡੀਅਨ ਪ੍ਰਧਾਨ ਮੰਤਰੀ ਦਾ 23 ਤਾਰੀਖ਼ ਨੂੰ ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਰਾਸ਼ਟਰਪਤੀ ਭਵਨ ਵਿੱਚ ਰਸਮੀ ਸਵਾਗਤ ਕਰਨਗੇ।