Qatar Residence Permit : ਕਤਰ 'ਚ ਬਦਲੇ ਵੀਜ਼ਾ ਨਿਯਮ ! ਸਮੇਂ ਤੋਂ ਵੱਧ ਰਹਿਣ 'ਤੇ ਹਰ ਰੋਜ਼ ਦੇਣਾ ਪਵੇਗਾ ਭਾਰੀ ਜੁਰਮਾਨਾ
Qatar Residence Permit : ਖਾੜੀ ਦੇਸ਼ ਕਤਰ ਵਿੱਚ ਨੌਕਰੀ ਜਾਂ ਕਾਰੋਬਾਰ ਕਰਨ ਵਾਲੇ ਪ੍ਰਵਾਸੀ ਨਾਗਰਿਕਾਂ ਲਈ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ।
Qatar Residence Permit : ਖਾੜੀ ਦੇਸ਼ ਕਤਰ ਵਿੱਚ ਨੌਕਰੀ ਜਾਂ ਕਾਰੋਬਾਰ ਕਰਨ ਵਾਲੇ ਪ੍ਰਵਾਸੀ ਨਾਗਰਿਕਾਂ ਲਈ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਕਤਰ ਸਰਕਾਰ ਨੇ ਨਵਾਂ ਨਿਯਮ ਲਾਗੂ ਕਰਦੇ ਹੋਏ ਰਿਹਾਇਸ਼ੀ ਪਰਮਿਟ (Residence Permit) ਰੱਦ ਹੋਣ ਤੋਂ ਬਾਅਦ ਦੇਸ਼ ਵਿੱਚ ਰਹਿਣ ਲਈ ਦਿੱਤੀ ਜਾਣ ਵਾਲੀ ਮਿਆਦ ਅੱਧੀ ਕਰ ਦਿੱਤੀ ਹੈ। ਹੁਣ ਪ੍ਰਵਾਸੀਆਂ ਨੂੰ ਵੀਜ਼ਾ ਜਾਂ ਰਿਹਾਇਸ਼ੀ ਪਰਮਿਟ ਰੱਦ ਹੋਣ ਤੋਂ ਬਾਅਦ ਦੇਸ਼ ਛੱਡਣ ਜਾਂ ਆਪਣਾ ਸਟੇਟਸ ਕਾਨੂੰਨੀ ਤੌਰ 'ਤੇ ਠੀਕ ਕਰਨ ਲਈ ਕੇਵਲ 14 ਦਿਨਾਂ ਦਾ ਸਮਾਂ ਮਿਲੇਗਾ।
ਗਲਫ ਨਿਊਜ਼ ਦੀ ਰਿਪੋਰਟ ਮੁਤਾਬਕ, ਪਹਿਲਾਂ ਮਿਲਣ ਵਾਲਾ 30 ਦਿਨਾਂ ਦਾ "ਗ੍ਰੇਸ ਪੀਰੀਅਡ" ਹੁਣ ਘਟਾ ਕੇ 14 ਦਿਨ ਕਰ ਦਿੱਤਾ ਗਿਆ ਹੈ। ਇਸ ਤਬਦੀਲੀ ਦੀ ਜਾਣਕਾਰੀ ਗ੍ਰਹਿ ਮੰਤਰਾਲੇ ਦੇ ਜਨ ਸੰਪਰਕ ਵਿਭਾਗ ਵੱਲੋਂ ਸੁਰੱਖਿਅਤ ਯਾਤਰਾ ਪ੍ਰਕਿਰਿਆਵਾਂ ਸਬੰਧੀ ਆਯੋਜਿਤ ਇੱਕ ਵੈਬਿਨਾਰ ਦੌਰਾਨ ਦਿੱਤੀ ਗਈ।
ਐਅਰਪੋਰਟ ਪਾਸਪੋਰਟ ਵਿਭਾਗ ਦੇ ਕੈਪਟਨ ਅਲੀ ਅਹਿਮਦ ਅਲੀ ਅਲ ਕੁਵਾਰੀ ਨੇ ਦੱਸਿਆ ਕਿ ਰਿਹਾਇਸ਼ੀ ਪਰਮਿਟ ਰੱਦ ਹੋਣ ਤੋਂ ਬਾਅਦ ਜੇ ਕੋਈ ਵਿਅਕਤੀ 14 ਦਿਨਾਂ ਤੋਂ ਵੱਧ ਕਤਰ ਵਿੱਚ ਰਹਿੰਦਾ ਹੈ ਤਾਂ ਉਸ ਨੂੰ ਹਰ ਰੋਜ਼ 10 ਕਤਰੀ ਰਿਆਲ (ਲਗਭਗ ₹230 ਭਾਰਤੀ ਰੁਪਏ) ਜੁਰਮਾਨਾ ਦੇਣਾ ਪਵੇਗਾ।
ਇਹ ਐਲਾਨ ਕਤਰ ਵਿੱਚ ਰਹਿ ਰਹੇ ਅਤੇ ਕੰਮ ਕਰ ਰਹੇ ਹਜ਼ਾਰਾਂ ਭਾਰਤੀ ਪ੍ਰਵਾਸੀਆਂ ਲਈ ਬਹੁਤ ਮਹੱਤਵਪੂਰਨ ਹੈ। ਹੁਣ ਉਨ੍ਹਾਂ ਨੂੰ ਰਿਹਾਇਸ਼ੀ ਪਰਮਿਟ ਰੱਦ ਹੋਣ ਦੇ ਤੁਰੰਤ ਬਾਅਦ ਦੇਸ਼ ਛੱਡਣ ਜਾਂ ਨਵੀਂ ਨੌਕਰੀ ਦੀ ਵਿਵਸਥਾ ਕਰਨ ਲਈ ਤੇਜ਼ੀ ਨਾਲ ਕਦਮ ਚੁੱਕਣੇ ਪੈਣਗੇ।
ਅਲ ਕੁਵਾਰੀ ਨੇ ਯਾਤਰੀਆਂ ਨੂੰ ਆਪਣੇ ਵੀਜ਼ੇ ਦੀ ਮਿਆਦ ਅਤੇ ਪਾਸਪੋਰਟ 'ਤੇ ਲੱਗੇ ਵੀਜ਼ਾ ਸਟੈਂਪ ਵਿੱਚ ਦਰਜ ਰਹਿਣ ਦੀ ਮਿਆਦ ਧਿਆਨ ਨਾਲ ਜਾਂਚਣ ਦੀ ਸਲਾਹ ਵੀ ਦਿੱਤੀ। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਵਿਜ਼ਿਟ ਵੀਜ਼ਾ ਦੀ ਮਿਆਦ ਖਤਮ ਹੋਣ ਤੋਂ ਬਾਅਦ ਵੀ ਕਤਰ ਵਿੱਚ ਰਹਿਣ 'ਤੇ ਹਰ ਰੋਜ਼ 200 ਕਤਰੀ ਰਿਆਲ (ਲਗਭਗ ₹4,600 ਭਾਰਤੀ ਰੁਪਏ) ਦਾ ਭਾਰੀ ਜੁਰਮਾਨਾ ਲੱਗੇਗਾ।
ਯਾਤਰੀਆਂ ਨੂੰ ਯਾਤਰਾ ਤੋਂ ਪਹਿਲਾਂ Metrash ਮੋਬਾਈਲ ਐਪ ਰਾਹੀਂ ਆਪਣੇ ਵੀਜ਼ਾ ਦੀ ਸਥਿਤੀ ਦੀ ਜਾਂਚ ਕਰਨ ਦੀ ਸਲਾਹ ਦਿੱਤੀ ਗਈ ਹੈ। ਅਧਿਕਾਰੀ ਦੇ ਅਨੁਸਾਰ, ਐਪ ਵਿੱਚ ਟ੍ਰੈਫਿਕ ਚਲਾਨ, ਓਵਰਸਟੇ ਜੁਰਮਾਨਾ ਜਾਂ ਹੋਰ ਕੋਈ ਬਕਾਇਆ ਰਕਮ ਵੀ ਚੈੱਕ ਕਰਨੀ ਚਾਹੀਦੀ ਹੈ, ਕਿਉਂਕਿ ਇਹ ਯਾਤਰਾ 'ਤੇ ਅਸਰ ਪਾ ਸਕਦੀ ਹੈ।
ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਯਾਤਰੀਆਂ ਨੂੰ ਇਮੀਗ੍ਰੇਸ਼ਨ ਪ੍ਰਕਿਰਿਆ ਤੇਜ਼ ਕਰਨ ਲਈ ਹਮਾਦ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਉਪਲਬਧ ਇਲੈਕਟ੍ਰਾਨਿਕ ਗੇਟ (E-Gate) ਸਿਸਟਮ ਦੀ ਵਰਤੋਂ ਕਰਨ ਲਈ ਉਤਸ਼ਾਹਿਤ ਕੀਤਾ। ਇਸ ਵੇਲੇ ਐਅਰਪੋਰਟ ਪਾਸਪੋਰਟ ਵਿਭਾਗ ਆਗਮਨ ਅਤੇ ਰਵਾਨਗੀ ਟਰਮੀਨਲਾਂ 'ਤੇ ਕੁੱਲ 76 ਈ-ਗੇਟ ਚਲਾ ਰਿਹਾ ਹੈ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
