Sachin Tendulkar: ਆਸਟਰੇਲੀਆ 'ਚ ਸਚਿਨ ਤੇਂਦੁਲਕਰ ਦੇ ਨਾਂ 'ਤੇ ਰੱਖਿਆ ਕ੍ਰਿਕੇਟ ਗਰਾਊਂਡ ਦਾ ਨਾਂ, ਇੰਜ ਦਿੱਤਾ ਆਸਟਰੇਲੀਆ ਨੇ ਜਨਮਦਿਨ ਦਾ ਤੋਹਫਾ

Sachin Tendulkar B'Day: ਅੱਜ (24 ਅਪ੍ਰੈਲ) ਸਚਿਨ ਤੇਂਦੁਲਕਰ ਦਾ ਜਨਮ ਦਿਨ ਹੈ। ਇਸ ਖਾਸ ਮੌਕੇ 'ਤੇ ਕ੍ਰਿਕਟ ਆਸਟ੍ਰੇਲੀਆ ਨੇ ਮਾਸਟਰ ਬਲਾਸਟਰ ਨੂੰ ਇਕ ਖਾਸ ਤੋਹਫਾ ਦਿੱਤਾ ਹੈ।

ਸਚਿਨ ਤੇਂਦੁਲਕਰ

Sachin Tendulkar, Sydney Cricket Ground: ਸਚਿਨ ਤੇਂਦੁਲਕਰ ਨੂੰ ਉਨ੍ਹਾਂ ਦੇ 50ਵੇਂ ਜਨਮ ਦਿਨ 'ਤੇ ਕ੍ਰਿਕਟ ਆਸਟ੍ਰੇਲੀਆ ਤੋਂ ਖਾਸ ਤੋਹਫਾ ਮਿਲਿਆ ਹੈ। ਕ੍ਰਿਕਟ ਆਸਟ੍ਰੇਲੀਆ ਨੇ ਇਤਿਹਾਸਕ ਸਿਡਨੀ ਕ੍ਰਿਕਟ ਮੈਦਾਨ ਦੇ ਇੱਕ ਗੇਟ ਦਾ ਨਾਮ ਸਚਿਨ ਤੇਂਦੁਲਕਰ ਦੇ ਨਾਮ 'ਤੇ ਰੱਖਿਆ ਹੈ। ਇਸ ਗੇਟ ਦਾ ਅੱਜ (24 ਅਪ੍ਰੈਲ) ਹੀ ਉਦਘਾਟਨ ਕੀਤਾ ਗਿਆ ਹੈ। ਸਚਿਨ ਦੇ ਨਾਲ-ਨਾਲ ਬ੍ਰਾਇਨ ਲਾਰਾ ਨੂੰ ਵੀ ਸਨਮਾਨਿਤ ਕੀਤਾ ਗਿਆ ਹੈ।

ਇਸ ਗੇਟ ਦਾ ਉਦਘਾਟਨ ਕਰਦੇ ਹੋਏ ਕ੍ਰਿਕਟ ਆਸਟ੍ਰੇਲੀਆ ਦੇ ਸੀਈਓ ਨਿਕ ਹਾਕਲੇ ਨੇ ਕਿਹਾ, 'ਅੱਜ ਕ੍ਰਿਕਟ ਜਗਤ ਸਚਿਨ ਤੇਂਦੁਲਕਰ ਦਾ 50ਵਾਂ ਜਨਮਦਿਨ ਮਨਾ ਰਿਹਾ ਹੈ। ਅਜਿਹੇ 'ਚ ਸਿਡਨੀ ਕ੍ਰਿਕਟ ਮੈਦਾਨ 'ਤੇ ਦੋ ਮਹਾਨ ਹਸਤੀਆਂ ਸਚਿਨ ਅਤੇ ਬ੍ਰਾਇਨ ਲਾਰਾ ਦੇ ਅਸਾਧਾਰਨ ਰਿਕਾਰਡਾਂ ਦਾ ਸਨਮਾਨ ਕਰਨ ਦਾ ਇਹ ਸਹੀ ਸਮਾਂ ਹੈ। ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਇਨ੍ਹਾਂ ਦੋਵਾਂ ਦੀਆਂ ਪ੍ਰਾਪਤੀਆਂ ਨਾ ਸਿਰਫ਼ ਮਹਿਮਾਨ ਟੀਮਾਂ ਦਾ ਹੌਸਲਾ ਵਧਾਉਣਗੀਆਂ ਸਗੋਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਇਸ ਮੈਦਾਨ 'ਤੇ ਕਦਮ ਰੱਖਣ ਵਾਲੇ ਹਰ ਖਿਡਾਰੀ ਦਾ ਹੌਸਲਾ ਵਧਾਉਣਗੀਆਂ।

ਸਚਿਨ ਤੇਂਦੁਲਕਰ ਨੇ ਸਿਡਨੀ ਕ੍ਰਿਕਟ ਗਰਾਊਂਡ 'ਤੇ ਪੰਜ ਟੈਸਟ ਮੈਚ ਖੇਡੇ ਹਨ। ਇੱਥੇ ਉਸ ਦੀ ਬੱਲੇਬਾਜ਼ੀ ਔਸਤ 157 ਹੈ। ਉਸ ਨੇ ਇਸ ਇਤਿਹਾਸਕ ਮੈਦਾਨ 'ਤੇ ਤਿੰਨ ਸੈਂਕੜਿਆਂ ਦੀ ਮਦਦ ਨਾਲ ਕੁੱਲ 785 ਦੌੜਾਂ ਬਣਾਈਆਂ ਹਨ। ਇਨ੍ਹਾਂ ਵਿੱਚ ਇੱਕ ਦੋਹਰਾ ਸੈਂਕੜਾ ਵੀ ਸ਼ਾਮਲ ਹੈ। ਜਨਵਰੀ 2004 ਵਿੱਚ ਸਚਿਨ ਨੇ 241 ਦੌੜਾਂ ਦੀ ਅਜੇਤੂ ਪਾਰੀ ਖੇਡੀ ਸੀ। ਇਸ ਦੇ ਨਾਲ ਹੀ ਬ੍ਰਾਇਨ ਲਾਰਾ ਨੇ ਇਸ ਮੈਦਾਨ 'ਤੇ ਆਪਣੇ ਕਰੀਅਰ ਦਾ ਪਹਿਲਾ ਸੈਂਕੜਾ ਲਗਾਇਆ। ਜਨਵਰੀ 1993 'ਚ ਖੇਡੇ ਗਏ ਟੈਸਟ ਮੈਚ 'ਚ ਲਾਰਾ ਨੇ 277 ਦੌੜਾਂ ਦੀ ਪਾਰੀ ਖੇਡੀ ਸੀ। ਇਸ ਮੈਦਾਨ 'ਤੇ ਸਚਿਨ ਅਤੇ ਲਾਰਾ ਦੇ ਇਨ੍ਹਾਂ ਰਿਕਾਰਡਾਂ ਕਾਰਨ ਇਸ ਗੇਟ ਦਾ ਨਾਂ 'ਬ੍ਰਾਇਨ ਲਾਰਾ-ਸਚਿਨ ਤੇਂਦੁਲਕਰ ਗੇਟਸ' ਰੱਖਿਆ ਗਿਆ ਹੈ।

ਸਚਿਨ ਤੇਂਦੁਲਕਰ ਨੇ ਇਸ ਖਾਸ ਤੋਹਫੇ 'ਤੇ ਕੀ ਕਿਹਾ?
ਸਚਿਨ ਤੇਂਦੁਲਕਰ ਨੇ ਕਿਹਾ, 'ਭਾਰਤ ਤੋਂ ਬਾਹਰ ਮੇਰਾ ਮਨਪਸੰਦ ਮੈਦਾਨ ਹਮੇਸ਼ਾ 'ਸਿਡਨੀ ਕ੍ਰਿਕਟ ਗਰਾਊਂਡ' ਰਿਹਾ ਹੈ। 1991-92 ਵਿਚ ਆਸਟ੍ਰੇਲੀਆ ਦੇ ਆਪਣੇ ਪਹਿਲੇ ਦੌਰੇ ਤੋਂ ਲੈ ਕੇ, ਮੇਰੇ ਕੋਲ ਇਸ ਮੈਦਾਨ ਨਾਲ ਜੁੜੀਆਂ ਕਈ ਵਿਲੱਖਣ ਯਾਦਾਂ ਹਨ। ਇਹ ਬਹੁਤ ਹੀ ਮਾਣ ਵਾਲੀ ਗੱਲ ਹੈ ਕਿ SCG ਵਿਖੇ ਮਹਿਮਾਨ ਖਿਡਾਰੀਆਂ ਦੇ ਗਰਾਊਂਡ ਵਿੱਚ ਦਾਖਲ ਹੋਣ ਵਾਲੇ ਗੇਟ ਦਾ ਨਾਮ ਮੇਰੇ ਅਤੇ ਮੇਰੇ ਖਾਸ ਦੋਸਤ ਬ੍ਰਾਇਨ ਦੇ ਨਾਂ 'ਤੇ ਰੱਖਿਆ ਗਿਆ ਹੈ।