ਐਪਲ ਤੇ ਸੈਮਸੰਗ ਨੂੰ ਪਛਾੜ ਇਸ ਫੋਨ ਨੇ ਕਾਇਮ ਕੀਤੀ ਸਰਦਾਰੀ

ਨਵੀਂ ਦਿੱਲੀ: ਵਨਪਲੱਸ ਫਾਊਂਡਰ ਤੇ ਸੀਈਓ ਪਿੱਟ ਲਾਓ ਨੇ ਕਿਹਾ ਕਿ ਵਨਪਲੱਸ ਨੇ ਭਾਰਤ 'ਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਕੰਪਨੀ ਦੇ ਰੈਵੇਨਿਊ ਦਾ ਤੀਜਾ ਸਭ ਤੋਂ ਵੱਡਾ ਹਿੱਸਾ ਭਾਰਤੀ ਗਾਹਕਾਂ ਤੋਂ ਆਉਂਦਾ ਹੈ।

ਗਲੋਬਲ ਰਿਸਰਚ ਫਰਮ ਕਾਊਂਟਰਪੁਆਇੰਟ ਨੇ ਕਿਹਾ ਕਿ ਵਨਪਲੱਸ ਨੇ ਸੈਮਸੰਗ ਨੂੰ ਪਛਾੜਦਿਆਂ ਸਾਲ 2018 ਦੇ ਦੂਜੇ ਕੁਆਰਟਰ 'ਚ ਪ੍ਰੀਮੀਅਮ ਸਮਾਰਟਫੋਨ ਸੈਗਮੈਂਟ 'ਚ ਪਹਿਲੇ ਨੰਬਰ 'ਤੇ ਕਬਜ਼ਾ ਕਰ ਲਿਆ ਹੈ। ਦੱਸ ਦਈਏ ਕਿ ਪ੍ਰੀਮੀਅਮ ਸਮਾਰਟਫੋਨ ਸੈਗਮੈਂਟ 30,000 ਰੁਪਏ ਤੋਂ ਵੱਧ ਕੀਮਤ ਵਾਲੇ ਹੁੰਦੇ ਹਨ। ਵਨਪਲੱਸ ਦਾ ਸ਼ੇਅਰ ਜਿੱਥੇ 40 ਫੀਸਦੀ ਹੈ, ਉੱਥੇ ਹੀ 34 ਫੀਸਦੀ ਨਾਲ ਸੈਮਸੰਗ ਦੂਜੇ ਨੰਬਰ 'ਤੇ ਹੈ ਜਦਕਿ ਐਪਲ ਨੂੰ ਸਿਰਫ 14 ਫੀਸਦੀ ਸ਼ੇਅਰ ਮਿਲੇ।

ਕਾਊਂਟਰਪੁਆਇੰਟ ਮੁਤਾਬਕ ਵਨਪਲੱਸ ਦੇ ਹਰ ਫਲੈਗਸ਼ਿਪ ਸਮਾਰਟਫੋਨ ਦੇ ਲਾਂਚ ਨਾਲ ਭਾਰਤ 'ਚ ਕੰਪਨੀ ਦੇ ਗਾਹਕ ਵਧੇ ਹਨ। ਭਾਰਤੀ ਸਮਾਰਟਫੋਨ ਬਾਜ਼ਾਰ ਦੀ ਗੱਲ ਕਰੀਏ ਤਾਂ ਸੈਮਸੰਗ ਤੇ ਸ਼ਿਓਮੀ 'ਚ ਜ਼ਬਰਦਸਤ ਟੱਕਰ ਚੱਲ ਰਹੀ ਹੈ।

ਰਿਸਰਚ ਮੁਤਾਬਕ ਭਾਰਤ 'ਚ 20,000 ਰੁਪਏ ਤੱਕ ਦੇ ਮੋਬਾਇਲ ਬਜ਼ਾਰ 'ਚ ਚੀਨੀ ਕੰਪਨੀਆਂ ਦੀ ਹਿੱਸੇਦਾਰੀ 62 ਫੀਸਦੀ ਹੋ ਗਈ ਹੈ ਜੋ ਕਿ ਸਾਲ 2014 'ਚ 17 ਫੀਸਦੀ ਸੀ। ਚੀਨੀ ਕੰਪਨੀਆਂ ਨੇ ਭਾਰਤ 'ਚ ਆਪਣੇ ਮੋਬਾਈਲਾਂ ਦੀ ਵਿਕਰੀ ਕਾਫੀ ਵਧਾ ਲਈ ਹੈ ਤੇ ਅਜਿਹੇ 'ਚ ਐਪਲ ਤੇ ਸੈਮਸੰਗ ਨੂੰ ਭਾਰਤੀ ਬਾਜ਼ਾਰ ਨੂੰ ਸਮਝਣ ਲਈ ਨਵੇਂ ਤਰੀਕੇ ਅਪਣਾਉਣ ਦੀ ਲੋੜ ਹੈ।