ਹੁਣ LinkedIn ਅਕਾਊਂਟ ਕਿਰਾਏ 'ਤੇ ਲੈਣ ਦੇ ਨਾਮ 'ਤੇ ਹੋ ਰਹੀ ਠੱਗੀ, ਮਹਿਲਾ ਨੇ ਸੁਣਾਈ ਸਾਰੀ ਹੱਡਬੀਤੀ

ਸਕੈਮਰਸ ਲੋਕਾਂ ਨੂੰ ਵੱਖ-ਵੱਖ ਤਰੀਕਿਆਂ ਨਾਲ ਆਪਣੇ ਜਾਲ ਵਿੱਚ ਫਸਾਉਣ ਦੀ ਕੋਸ਼ਿਸ਼ ਕਰਦੇ ਹਨ। ਹੁਣ ਇੱਕ ਤਾਜ਼ਾ ਮਾਮਲੇ ਵਿੱਚ ਲਿੰਕਡਇਨ ਅਕਾਊਂਟ ਕਿਰਾਏ 'ਤੇ ਲੈਣ ਦੀ ਆਫਰ ਦੇ ਕੇ ਘੁਟਾਲਾ ਕਰਨ ਦੀ ਕੋਸ਼ਿਸ਼ ਦਾ ਪਤਾ ਲੱਗਿਆ ਹੈ।

LinkedIn

Source : TWITTER

Scam: ਹਰ ਰੋਜ਼ ਸੋਸ਼ਲ ਮੀਡੀਆ 'ਤੇ ਨਵੇਂ ਘੁਟਾਲਿਆਂ ਬਾਰੇ ਜਾਣਕਾਰੀ ਸਾਹਮਣੇ ਆ ਰਹੀ ਹੈ। ਤਾਜ਼ਾ ਮਾਮਲਾ ਬੰਗਲੁਰੂ ਦਾ ਹੈ, ਜਿੱਥੇ ਇੱਕ ਸੀਨੀਅਰ ਬ੍ਰਾਂਡ ਮਾਰਕੀਟਿੰਗ ਮੈਨੇਜਰ ਤੋਂ ਉਸ ਦਾ LinkedIn ਖਾਤਾ ਕਿਰਾਏ 'ਤੇ ਮੰਗਿਆ ਗਿਆ। ਇਹ ਵੀ ਕਿਹਾ ਗਿਆ ਸੀ ਕਿ ਇਸ ਦੇ ਬਦਲੇ ਉਸ ਨੂੰ ਪੈਸੇ ਦਿੱਤੇ ਜਾਣਗੇ। ਮੈਨੇਜਰ ਨੇ ਆਪਣੇ ਨਾਲ ਵਾਪਰੀ ਸਾਰੀ ਘਟਨਾ ਸਾਂਝੀ ਕੀਤੀ ਹੈ। ਉਦੋਂ ਤੋਂ, ਬਹੁਤ ਸਾਰੇ ਲੋਕ ਇਸ ਬਾਰੇ ਚਰਚਾ ਕਰ ਰਹੇ ਹਨ। ਆਓ ਜਾਣਦੇ ਹਾਂ ਪੂਰਾ ਮਾਮਲਾ-

ਅਕਾਊਂਟ ਦੇ ਬਦਲੇ ਪੈਸੇ ਦੇਣ ਦੀ ਕਹੀ ਗੱਲ

ਸੀਨੀਅਰ ਬ੍ਰਾਂਡ ਮਾਰਕੀਟਿੰਗ ਮੈਨੇਜਰ ਨਿਕਿਤਾ ਅਨਿਲ ਨੇ ਆਪਣੀ ਪੋਸਟ ਵਿੱਚ ਇਸ ਅਨੁਭਵ ਨੂੰ ਹੈਰਾਨੀਜਨਕ ਦੱਸਿਆ ਅਤੇ ਪੁੱਛਿਆ ਕਿ ਕੀ ਲਿੰਕਡਇਨ ਖਾਤਾ ਕਿਰਾਏ 'ਤੇ ਲੈਣਾ ਇੱਕ ਆਮ ਰੁਝਾਨ ਬਣ ਗਿਆ ਹੈ? ਨਿਕਿਤਾ ਨੇ ਦੱਸਿਆ ਕਿ ਇੱਕ ਵਿਅਕਤੀ ਨੇ ਉਸ ਨਾਲ ਸੰਪਰਕ ਕੀਤਾ ਅਤੇ ਉਸ ਦੀ ਲਿੰਕਡਇਨ ਪ੍ਰੋਫਾਈਲ ਕਿਰਾਏ 'ਤੇ ਲੈਣ ਦੀ ਪੇਸ਼ਕਸ਼ ਕੀਤੀ। ਉਹ ਖਾਤੇ ਦੇ ਬਦਲੇ ਨਿਕਿਤਾ ਨੂੰ ਪੈਸੇ ਦੇਣ ਲਈ ਤਿਆਰ ਸੀ। ਹਾਲਾਂਕਿ, ਇਸ ਪਿੱਛੇ ਉਸ ਦਾ ਅਸਲ ਇਰਾਦਾ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ।

ਇੰਨਾ ਕਿਰਾਇਆ ਕੀਤਾ ਆਫਰ

ਨਿਕਿਤਾ ਦੀ ਪੋਸਟ ਨਾਲ ਜੁੜੇ ਸਕ੍ਰੀਨਸ਼ਾਟ ਤੋਂ ਕੁਝ ਹੋਰ ਜਾਣਕਾਰੀ ਪ੍ਰਾਪਤ ਕੀਤੀ ਗਈ ਹੈ। ਜਦੋਂ ਨਿਕਿਤਾ ਨੇ ਉਸ ਵਿਅਕਤੀ ਨੂੰ ਖਾਤਾ ਕਿਰਾਏ 'ਤੇ ਲੈਣ ਦਾ ਕਾਰਨ ਪੁੱਛਿਆ, ਤਾਂ ਉਸ ਨੇ ਉਸ ਨੂੰ ਦੱਸਿਆ ਕਿ ਉਸ ਦੇ ਦੋਸਤ ਦੀ ਕੰਪਨੀ ਨੂੰ ਆਪਣਾ ਬਾਜ਼ਾਰ ਵਧਾਉਣ ਲਈ ਕੁਝ ਲਿੰਕਡਇਨ ਖਾਤਿਆਂ ਦੀ ਲੋੜ ਹੈ। ਸੁਨੇਹਾ ਭੇਜਣ ਵਾਲੇ ਵਿਅਕਤੀ ਨੇ ਨਿਕਿਤਾ ਨੂੰ ਉਸ ਦੀ ਲਿੰਕਡਇਨ ਪ੍ਰੋਫਾਈਲ ਦੇ ਬਦਲੇ ਹਰ ਹਫ਼ਤੇ 20 ਡਾਲਰ (ਲਗਭਗ 1,740 ਰੁਪਏ) ਦੇਣ ਦੀ ਪੇਸ਼ਕਸ਼ ਕੀਤੀ। ਹਾਲਾਂਕਿ, ਬਦਲੇ ਵਿੱਚ ਉਸ ਨੇ ਨਿਕਿਤਾ ਅੱਗੇ ਕੁਝ ਸ਼ਰਤਾਂ ਵੀ ਰੱਖੀਆਂ। ਉਨ੍ਹਾਂ ਦੇ ਅਨੁਸਾਰ, ਜਿੰਨਾ ਚਿਰ ਖਾਤਾ ਕਿਰਾਏ 'ਤੇ ਰਹਿੰਦਾ ਹੈ, ਨਿਕਿਤਾ ਆਪਣੀ ਸੁਰੱਖਿਆ ਜਾਣਕਾਰੀ ਵਿੱਚ ਕੋਈ ਬਦਲਾਅ ਨਹੀਂ ਕਰ ਸਕੇਗੀ ਅਤੇ ਨਾ ਹੀ ਮੁੱਢਲੇ ਡੇਟਾ ਵਿੱਚ ਕੋਈ ਬਦਲਾਅ ਕੀਤਾ ਜਾਵੇਗਾ।

ਸੁਨੇਹਾ ਭੇਜਣ ਵਾਲੇ ਵਿਅਕਤੀ ਨੇ ਨਿਕਿਤਾ ਨੂੰ ਭਰੋਸਾ ਦਿੱਤਾ ਕਿ ਉਸਦੇ ਸੰਪਰਕਾਂ ਨਾਲ ਕਿਸੇ ਵੀ ਤਰ੍ਹਾਂ ਛੇੜਛਾੜ ਨਹੀਂ ਕੀਤੀ ਜਾਵੇਗੀ। ਇਸ ਤੋਂ ਬਾਅਦ, ਉਸਨੇ ਅਕਾਊਂਟ ਆਈਡੀ ਅਤੇ ਪਾਸਵਰਡ ਵੀ ਮੰਗਿਆ। ਉਸ ਨੇ ਨਿਕਿਤਾ ਨੂੰ ਗੁੱਡਵਿਲ ਅਮਾਊਂਂਟ ਦੇ ਤੌਰ 'ਤੇ 10 ਡਾਲਰ ਦੇਣ ਦੀ ਗੱਲ ਆਖੀ। ਹਾਲਾਂਕਿ, ਨਿਕਿਤਾ ਨੇ ਉਸ ਦੀਆਂ ਗੱਲਾਂ 'ਤੇ ਵਿਸ਼ਵਾਸ ਨਹੀਂ ਕੀਤਾ ਅਤੇ ਅਕਾਊਂਟ ਦੇਣ ਤੋਂ ਮਨ੍ਹਾ ਕਰ ਦਿੱਤਾ।