ਇਰਾਨ 'ਚ ਜ਼ਬਰਦਸਤ ਭੂਚਾਲ, 129 ਮੌਤਾਂ,ਸੈਂਕੜੇ ਜ਼ਖ਼ਮੀ

ਤਹਿਰਾਨ : ਐਤਵਾਰ ਨੂੰ ਇਰਾਨ ਤੇ ਇਰਾਕ ਦੀ ਸਰਹੱਦ ਦੇ ਨਾਲ ਲੱਗਦੇ ਇਲਾਕੇ ਵਿੱਚ ਜਬ਼ਰਦਸਤ ਭੂਚਾਲ ਆਇਆ। ਰਿਕਟਰ ਪੈਮਾਨੇ ਉੱਤੇ ਇਸ ਦੀ ਗਤੀ 7.2 ਮਾਪੀ ਗਈ। ਭੂਚਾਲ ਕਾਰਨ ਇਰਾਨ ਵਿੱਚ 129 ਲੋਕ ਮਾਰੇ ਗਏ ਜਦਕਿ ਸੈਂਕੜੇ ਹੋਰ ਜ਼ਖ਼ਮੀ ਹੋ ਗਏ। ਇਹ ਜਾਣਕਾਰੀ ਇਰਾਨੀ ਅਧਿਕਾਰੀਆਂ ਨੇ ਦਿੱਤੀ।

ਇਰਾਨ ਦੇ ਰਾਸ਼ਟਰਪਤੀ ਹਸਨ ਰੂਹਾਨੀ ਨੇ ਗ੍ਰਹਿ ਮੰਤਰੀ ਨਾਲ ਫੋਨ ਉੱਤੇ ਹੋਈ ਗੱਲਬਾਤ ਵਿੱਚ ਆਖਿਆ ਕਿ ਅਧਿਕਾਰੀਆਂ ਵੱਲੋਂ ਵੱਧ ਤੋਂ ਵੱਧ ਕੋਸਿ਼ਸ਼ ਕੀਤੇ ਜਾਣ ਦੀ ਲੋੜ ਹੈ। ਐਤਵਾਰ ਨੂੰ ਇਰਾਨੀ ਸੋਸ਼ਲ ਮੀਡੀਆ ਉੱਤੇ ਇਹ ਚਰਚਾ ਚੱਲ ਰਹੀ ਸੀ ਕਿ ਲੋਕਾਂ ਵੱਲੋਂ ਖਾਸਤੌਰ ਉੱਤੇ ਕਰਮਨਸ਼ਾਹ ਤੇ ਘਸਰ-ਏ ਸਿ਼ਰੀਨ ਵਿੱਚ ਆਪਣੇ ਘਰ ਖਾਲੀ ਕੀਤੇ ਜਾ ਰਹੇ ਹਨ।

ਇਰਾਨ ਦੀ ਅਰਧ ਸਰਕਾਰੀ ਇਲਨਾ ਨਿਊਜ਼ ਏਜੰਸੀ ਨੇ ਦੱਸਿਆ ਕਿ ਇਸ ਭੂਚਾਲ ਨਾਲ ਇਰਾਨ ਦੇ 14 ਪ੍ਰੋਵਿੰਸਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਭੂਚਾਲ ਕਾਰਨ ਕਰਮਨਸ਼ਾਹ ਤੇ ਇਲਾਮ ਪ੍ਰੋਵਿੰਸਾਂ ਦੇ ਸਕੂਲਾਂ ਨੂੰ ਸੋਮਵਾਰ ਨੂੰ ਬੰਦ ਰੱਖਿਆ ਜਾਵੇਗਾ।

ਕੋਲੀਵੈਂਡ ਨੇ ਦੱਸਿਆ ਕਿ ਭੂਚਾਲ ਕਾਰਨ ਇਰਾਨ ਦੇ ਪੱਛਮੀ ਸ਼ਹਿਰ ਮੇਹਰਾਨ ਤੇ ਇਲਾਮ ਵਿੱਚ ਬਿਜਲੀ ਸਪਲਾਈ ਠੱਪ ਹੋ ਗਈ। ਉਨ੍ਹਾਂ ਇਹ ਵੀ ਦੱਸਿਆ ਕਿ 35 ਰੈਸਕਿਊ ਟੀਮਾਂ ਇਸ ਸਮੇਂ ਸਹਾਇਤਾ ਮੁਹੱਈਆ ਕਰਵਾ ਰਹੀਆਂ ਹਨ।

ਇਸਲਾਮਿਕ ਰਿਪਬਲਿਕ ਆਫ ਇਰਾਨ ਨਿਊਜ਼ ਨੈੱਟਵਰਕ ਨੇ ਦੇਸ਼ ਦੀਆਂ ਐਮਰਜੰਸੀ ਮੈਡੀਕਲ ਸਰਵਿਸਿਜ਼ ਦੇ ਮੁਖੀ ਪੀਰਹੁਸੈਨ ਕੋਲੀਵੈਂਡ ਦੇ ਹਵਾਲੇ ਨਾਲ ਦੱਸਿਆ ਕਿ 61 ਲੋਕ ਮਾਰੇ ਜਾ ਚੁੱਕੇ ਹਨ ਤੇ ਇਰਾਨ ਦੀ ਸਰਹੱਦ ਦੇ ਅੰਦਰ 300 ਲੋਕ ਜ਼ਖ਼ਮੀ ਹੋ ਗਏ ਹਨ।

ਯੂਐਸ ਜਿਓਲਾਜੀਕਲ ਸਰਵੇਅ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਭੂਚਾਲ ਦਾ ਕੇਂਦਰ ਪੂਰਬੀ ਇਰਾਕੀ ਸ਼ਹਿਰ ਹਾਲਾਬਜ਼ਾ ਤੋਂ 31 ਕਿਲੋਮੀਟਰ ਬਾਹਰਵਾਰ ਸੀ।

ਇਰਾਨ ਦੇ ਸਰਕਾਰੀ ਟੀਵੀ ਅਨੁਸਾਰ ਇਰਾਕੀ ਅਧਿਕਾਰੀਆਂ ਨੇ ਛੇ ਮੌਤਾਂ ਹੋਣ ਦੀ ਜਾਣਕਾਰੀ ਦਿੱਤੀ ਹੈ ਜਦਕਿ ਇਰਾਕ ਵਿੱਚ ਜ਼ਖ਼ਮੀਆਂ ਦੀ ਗਿਣਤੀ 200 ਦੱਸੀ ਗਈ ਹੈ। ਹਾਲਾਂਕਿ ਇਰਾਕੀ ਸਰਕਾਰ ਵੱਲੋਂ ਇਸ ਸਬੰਧ ਵਿੱਚ ਕੋਈ ਸਰਕਾਰੀ ਟਿੱਪਣੀ ਨਹੀਂ ਕੀਤੀ ਗਈ।